Итрадициатәу аԥсуа хәымпал «Сустар» Аконгресс ахьӡала ҳамҭа ҷыдак аҳасабала иқәгылан аетнопарк «Аԥсны» имҩаԥысыз есышықәсатәи ахыцуаа ртурнир аҟны. Аҟәатәи ахыцуаа рыклуб «Афырхы» алахәцәеи атрадициатә спортхкы абзиабаҩцәеи рыбжьара аицлабрақәа мҩаԥысит цәыббра 29 рзы. 

Аԥсуа милаҭтә парк ашҭаҿы рҽеизыргеит ахыцуаа рыклуб алахәцәа, Нхыҵ Кавказынтә иааз асасцәа, иара убас ари атрадициатә спортхкы абзиабаҩцәа маҷҩымкәа. Атурнир Аԥсны жәлар рџьынџьтәылатә еибашьраҿы Аиааира амш иазкны имҩаԥысит. Аицлабра рхы аладырхәит 18-ҩык ахыцуаа.

Ахыцуаа рыклуб «Афырхы» иалахәу, атурнир аӡбаҩ хадас иҟаз Адгәыр Какоба Адунеизегьтәи аԥсуа-абаза конгресс ахаҭарнакцәа иҭабуп ҳәа реиҳәеит ари аусмҩаԥгатә адгылара ахьарҭаз.

«Аиааира амш аламҭалаз ахыцуаа ртурнир амҩаԥгара уажәшьҭа атрадициатә ҟазшьа шьҭнахит. Ҳара ҳзы иҳаҭыр дууп Адунеизегьтәи аԥсуа-абаза конгресс аԥсуа хәымпал «Сустар» ҳамҭа ҷыдас иахьықәнаргылаз. Ҳара уи ҳазыԥшӡамызт, даара ҳаигәырӷьеит. АААК аусзуҩцәа атурниргьы иалахәуп, аамҭа кьаҿк иалагӡаны ақәҿиара бзиақәагьы аадырԥшхьеит. Хазы лымкаала иҭабуп ҳәа иасҳәар сҭахуп Аконгресс Иреиҳаӡоу ахеилак ахантәаҩы Мусса Ҳабал-иԥа Егзакь ахыцуаа абас дахьрызҿлымҳахаз», – иҳәеит Какоба.

Ахыцуаа еиндаҭлон ԥшь-хысра хкык рыла х-сааҭк инарзынаԥшуа. Атурнир алахәцәа иааинырсланы абжьгарақәа анрырҭа ашьҭахь аицлабрахь ииасит. Раԥхьа ацәҟьарақәа 30 метра бжьаҵаны иргыланы ихысуан. Анаҩс «аԥсыуала» ҳәа изышьҭоу ахысрахь ииасит: ахыцуаа зны бжала иааҳәны 5 метрак адистанциа ахьыбжьоу ацәҟьара иақәкны ихысуеит, анаҩс ихысцыԥхьаӡа еиҳа-еиҳа ихараны инаскьоит, 30 метра адистанциа ҟалаанӡа, убра ианынаӡалак нахыс ҩаԥхьа ихысуа иааскьо иалагоит. «Аԥсуа цәҟьара» аихсреи 30 метра рҟынтә ахысреи рылҵшәақәа еицырҵон. Иԥхьаӡаны ианалга ашьҭахь еилкаахеит аиааира шигаз Нхыҵ Кавказынтә иааз ахыцуаҩ Ахмед Кушхов. Аҩбатәи аҭыԥ аанылкылеит Елена Лабахәуа, ахԥатәи – Адамыр Аршба.

Анаҩс атурнир алахәцәа зегьы иреиҳау адистанциаҟынтә ахысрахь ииасит – уи 75 метра инаӡон. Ахыцуаа еиуеиԥшым ацәҟьарақәа хәба ирықәшәар акәын. Уи рылшеит хҩык атурнир алахәцәа: Валери Берзениа, Адамыр Аршба, Ахмед Кушхов. Арҭ ахҩыкгьы ари аицлабраҿы аииара ргеит ҳәа ишьан.

 Убас, ахыцуаҩ Ахмед Кушхов аиааира игеит 30, 75 метра рҟынтә ахысраҿи «аԥсуа цәҟьара» ақәыршәараҿи.

«Ахыц салахысуеижьҭеи хәышықәса ҵуеит, Аԥсныҟа аицлабра схы аласырхәырц саауеижьҭеи сынтәа хышықәсоуп. Ари аус сгәазырԥхаз ахыцуаа рыклуб аԥҵаҩы Баҭал Џьапуа иоуп. Ахыци ахәымпали зныкгьы знапаҿы изымкыц ирабжьызгоит рхы ԥыршәарц», – иҳәеит Кушхов.

Аҵыхәтәантәи аԥшьбатәи аиндаҭлара – 10 метрак рҟынтә ахысра – Адунеизегьтәи аԥсуа-абаза конгресс аԥшьгарала уажәтәи афбатәи атурнир раԥхьаӡа акәны иаларгалеит. Абраҟа аиааира згоз ианаршьон аҳамҭа ҷыда – аԥсуа хәымпал «Сустар», уи Аконгрессаа абџьарҟаҵаҩ Арсен Емкужов иҟны иҿарҵеит, ажәытәан аԥсуаа злахысуаз ахәымпал аиԥш зеиԥшу еиҭашьақәыргыланы иҟаиҵарц.

Аконгресс аҳамҭа ҷыда даиааит ахыцуаҩ Елена Лабахәуа. Лара лоуп «Сустар» занаршьазгьы.

«Ахыц алахысра – иџьашьахәу акоуп. Ахыцуаҩи ацәҟьареи еизынхоит, рыбжьара уаҳа акагь ыҟаӡам. Аӡәгьы дузыжьаӡом, аҽыргызмалрагьы ауӡом. Ахыцуаҩ илоу зегь ааирԥшыроуп. Убри ауп иара уалашҩыкны уҟазҵогьы. Ахысра ухдырра џьарак еизнагоит, иааукәыршоу адунеи еиҳа иуныруа уҟанаҵоит, уцәеижьгьы еиҳа иузыӡырҩуа иҟалоит», – лҳәеит Елена Лабахәуа.

АААК Аҿар рыҿиареи абаҩрҵәыра аларҵәареи рыҟәша аиҳабы Валери Берзениа имҩаԥысыз аицлабара инаҭаз ацәаныррақәа ҳацеиҩишеит.

«Уаанӡа атурнир аҟны х-хысра хкык рыла ҳаиндаҭлон. Уажәы Аконгресс абзоурала аԥшьбатәи ахкгьы аларгалеит. Аԥсуа хәымпал «Сустар» - ҳамҭа дууп дарбанзаалак ахыцуаҩ изы. Атурнир алахәцәа зегьы рзы иҳаҭыр дууп, иагьхьӡуп Аиааира амш иадҳәалоу аицлабра алахәхара. Ахысра бзиа ибаны аицлабра иахәаԥшырц иааз ахьырацәоугьы угәы иамыхәар залшом», – иҳәеит Берзениа.

Ахыцуаа афбатәи ртурнир иалахәын аҳәса рацәаҩны. Урҭ реиҳараҩык аклуб «Афырхы» иалахәқәоу роуп.

«Есышықәса ари аспортхкы интересс изкуа ауаа рхыԥхьаӡара иацлоит. Аклуб ахь иааины рҽанырҵоит хәыҷгьы-дугьы. Ҳаигәырӷьоит ауааԥсыра рыбжьара аԥсуа милаҭ хәмаррақәа абас азҿлымҳара ахьрымоу. Знык аклуб ахь зшьаҿа еихызго зегьы иаразнак ахысра иаланахалоит. Избан акәзар ари ҳшьа иалоуп. Ҳабдуцәа наџьнатә аахыс ахыци ахәымпали ркын, ахысра иазҟазан. Урҭ ирылшоз ҳаргьы иҳалшозар ҳҭахуп, уи азоуп аҵара ҳзазхьуа», – лҳәеит ахыцуаа рыклуб «Афырхы» иалахәу Илона Кәыҵниаԥҳа.

Ахыцуаа рыклуб «Афырхы» аԥҵан 2016 шықәсазы аԥсуа милаҭтә қьабзқәа реиқәырхаҩ Баҭал Џьапуа дызхагылаз гәыԥҩык ауаа раԥшьгарала. Есышықәса аклуб имҩаԥнагоит уажәшьҭа итрадициатәхаз атурнирқәа: ҳаибашьраҿы Аиааира амш иазкны, Аџьынџьтәылатә еибашьра ду аҿы Аиааира амш иадҳәаланы, иара убас Аԥсны Афырхаҵа Валери Делба игәалашәара ахьӡала.