Адунеизегьтәи аԥсуа-абаза конгресс ахатә саит аҟны аусура иалагеит арабтә версиа, уи аартра адырҳәалеит бызшәарацәала еиқәыршәоу апортал аус ауеижьҭеи шықәсык аҵра. Уажәшьҭа АААК аинформациатә портал ф-бызшәак рыла аус ауеит.
АААК апресс-маҵзура
Ахаша, цәыббра 18 рзы АААК асаит шықәсык ахыҵра инақәыршәаны, аинфопортал аҟны аусура иалагеит араб бызшәала ицәажәо ҳџьынџьуаа ирзынархоу абызшәатә версиа. Иахьа уажәраанӡа асаит хә-бызшәак ракәын иамаз – аԥсшәа, абаза бызшәа, аурысшәа, англыз бызшәа, аҭырқәшәа. Убас ала, арабтә бызшәа афбатәи бызшәаны иҟалеит.
«Уажәшьҭа Адунеизегьтәи аԥсуа-абаза конгресс апортал официалла ф-бызшәак рыла ицәажәоит, – лҳәеит апортал анапхгаҩы Амина Лазԥҳа. – Арҭ бызшәақәа рылоуп излацәажәо хыԥхьаӡара рацәала адунеи зегь аҟны инхо аԥсуа-абаза диаспора. Уажәшьҭа, Египет, Иорданиа, Шьамтәыла уҳәа убас Мрагылара Ааигәа иатәу егьырҭ атәылақәеи рҿы инхо аԥсуа-абаза диаспора ахаҭарнакцәа аинформациа роур рылшоит Аконгресс аусура иазкны, ҳажәлар рҭоурыхи ркультуреи, рҭоурыхтә ԥсадгьыл аҿы имҩаԥысуа ахҭыс хадақәеи уҳәа ирызкны – дара ирдыруа араб бызшәала аматериалқәа ирыԥхьаны. Ишиашоу Аԥсны иадҳәалам араб дунеи ааидкылангьы убри ала ҳаӡбахә раҳар рылшоит ҳара ҳхаҭақәа ҳҟынтә, ҳаргьы еиҳа инарҭбааны ҳхы еиҭаҳҳәартә ҳҟалеит».
Аинфопортал анапхгаҩы еиҭалҳәеит, асаит аспециалистцәа арабтә версиа шықәсыбжак иназынаԥшуа аус адулара ишаҿыз.
Лара иазгәалҭеит, араб бызшәа ахатә ҷыдарақәа шамоу, абызшәа аганахьала аиԥш, атехника аганахьала ахархәараангьы, убри аҟнытә «еиҳа ирацәаны аамҭа аҭаххеит уи аус адулара», зусура хыцаркхахьоу егьырҭ абызшәатә версиақәа ирҿырԥшны иугозар.
Лазԥҳа иазгәалҭеит иара убас, араб бызшәатә версиа аартра ишаԥхьанеиуаз апортал аус ауеижьҭеи шықәсык ала уаҟа икьыԥхьыз аматериалқәа зегьы реиҭагареи, рҭыжьреи. «Иааидкыланы атексттә материалқәа 350 инарзынаԥшуа иҟоуп, амедиафаилқәа ракәзар – х-нызқь инареиҳауп», – ҳәа ацылҵеит лара.
Абызшәатә версиа ҿыц алшара ҟанаҵоит иара убас Мрагылара Ааигәа иқәынхо аԥсуа-абаза милаҭ ахаҭарнакцәа араб бызшәала Аконгресс алаларазы анкета харҭәааны АААК ахәҭакхара, иара уи хықәкыс иамоу, ишдыру еиԥш – адунеи зегьы иқәынхо апсуа-абаза жәлар ахаҭарнакцәа зегьы аимадара рыбжьаҵароуп.
Амина Лазԥҳа адырра ҟалҵеит, иахьазы Аконгресс аинформациатә портал аусзуҩцәа аус шадыруло асаит атехникатә лшара ҿыцқәа рыла аибыҭара, урҭ анаҩс хәҭа-хәҭала асаит афункционал иагәылаҵахоит. 2020 шықәсазы иӡыргахоит аинтерес зҵоу аинформациатә проектқәа рацәаны ҳәа азгәалҭеит апортал анапхгаҩы.
Лара иацылҵеит, ари апроект есааира аԥсҭазаара иаларҵәахо агәҭакқәеи апланқәеи рацәаны ишамоу.
خطوة جبارة والف مبروك لاهلنا في الوطن و في الشتات. تمنياتنا للجميع التقدم و التضامن والازدهار
шәҭалароуп, ма шәыҽҭажәыҩроуп.