Саид Барганџьиа

АААК Иреиҳаӡоу ахеилак ахантәаҩы ихраҿа агаразы аиндаҭларақәа – есышықәсатәи зхы иақәиҭу аиқәԥаразы атурнир, сынтәа акультуратә-спорттә фестиваль «Абаза» аҳәаақәа ирҭагӡаны имҩаԥысыз хыркәшахеит Гәдоуҭа ақалақь аҟны. Еиуеиԥшым ақалақьқәа рҟынтә иааз аспортсменцәа ҿарацәа еиндаҭлон ақәратә категориақәа ҩбеи акапантә категориақәа жәибжьи рыла.

Ихадоу аиааирагаҩ ихьӡ рылаҳәахоит афестиваль ахԥатәи амш азы, Аҟәа имҩаԥысуа аныҳәаҿы. Егьырҭ аиааирагаҩцәа рыхьӡқәа иахьа еилкаахеит.

Зхы иақәиҭу аиқәԥара аклуб «Абаза» ауснагӡаратә директор Леонид Боџьгәуа иазгәеиҭеит, зегьы иреиҳаны ахьтәы медалқәа шарҳаз Аԥснытәи акоманда.

«Аиааира згақәаз зегьы иранашьоуп амедалқәеи ахраҿақәеи. Актәи аҭыԥқәа аанызкылаз ирыҭоуп иара убас жәаба-жәаба нызқь мааҭ. Аха атурнир аҳамҭа хада – АААК Иреиҳаӡоу ахеилак ахантәаҩы Мусса Егзакь ихраҿа – занашьахо иоуп иреиҳаӡоу маӡас иҟоу, уи еилаҳкаауеит уаҵәы, агәырӷьаратә концерт аҟны», – иҳәеит иара.

Атурнир аихшьаалақәа рыла иреиӷьу азыҟаҵаҩыс дыԥхьаӡоуп Адам Цәеиба (Аԥсны), иреиӷьу ақәԥаҩыс - Алан Табулов (Ҟарачы-Черқьесиа), иреиӷьу атехника аарԥшразы аԥхьахә ианашьан аԥсуа қәԥаҩы Данил Ԥлиа. 

Аиааира агәазыҳәаразы аҳамҭа ианашьан Алан Нахушев (Ҟабарда-Балкариа). Аҳамҭақәа зауз ақәԥаҩцәа разыҟаҵаҩцәа зегьы аҳаҭыртә бӷьыцқәа рыҭан.

Боџьгәуа иазгәеиҭеит атурнир аҩаӡара ҳаракны ишымҩаԥысыз, еснагь еиԥшгьы абаҩхатәра злоу аспортсменцәа рацәаҩны ишаанарԥшыз.

«Атурнир еиднакылеит 200-ҩык раҟара ақәԥаҩцәа, аиашьаратә ҟазшьа амангьы имҩаԥысит. Аспортсменцәа аӡәырҩы ари атурнир аҿы ҳаԥхьаҟагьы еиԥылап ҳәа ишақәгәыӷуа рҳәеит», – ҳәа азгәеиҭеит иара.

Гәдоуҭа араион ахада Руслан Ладариа, Мусса Егзакь ихраҿа агаразы зхы иақәиҭу аиқәԥара атурнир даараӡа аҵак ду амоуп, иаҭахны иҟоу акоуп ҳәа иԥхьаӡоит.

«Ҳара даара ҳаигәырӷьоит ари атурнир ақалақь-фырхаҵа Гәдоуҭа иахьымҩаԥсыуа. Ари атурнир авторитет ду амоуп, уи еиднакылоит абаҩхатәра злоу аспортсменцәа ҿарацәа рацәаҩны. Ҳара ари атурнир ҳадгылоит, аԥхьаҟагьы гәахәара дула ҳақалақь аҿы иҳадаҳкылалоит», – иҳәеит Ладариа.

Зхы иақәиҭу аиқәԥаразы Аԥсны азыҟаҵаҩ хада Џьарназ Бениа иакәзаргьы, иазгәеиҭеит Егзакь ихьӡ зху атурнир Аԥсны аҩныҵҟеиԥш уи анҭыҵгьы авторитет ду шамоу. Уи иазгәеиҭеит иара убас, Аԥсны аиқәԥара аспорт хкы аҿиараҿы Мусса Егзакь илагала шдуу.

АБРИ АХҬЫС ИАЗКУ АВИДЕО АХӘАԤШРА >>

"Иара иҟаиҵо ацхыраара абзоурала 35-ҩык ауаа инареиҳаны зыҟаҵаҩцәас аус руеит, аулафахәгьы роуеит. Аԥсны ахьынӡанаӡа-ааӡо 600-ҩык аспортсменцәа аиқәԥара иалоуп, Мусса Егзакь иҟаиҵо ацхырааралагьы иаҭаху зегь рыла еиқәыршәоуп», – иҳәеит азыҟаҵаҩ хада.

Атурнир ихы алаирхәит Аԥснытәи ақәԥаҩ Леон Багаҭелиа. Леон жәашықәса ихыҵуеит, ақәԥарахь дныҟәоижьҭеи хышықәса ҵуеит.

«Сара сазыҟаҵаҩ Адам Цәеиба иоуп. Ари атурнир аҩынтә раан салахәуп. Ҵыԥх актәи аҭыԥ ааныскылеит, сынтәа сымч маҷк иазымхеит. Аиндаҭлаҩцәа даара иӷәӷәақәоуп. Шьҭарнахыс еиҳангьы сҽадцаланы сҽазыҟасҵалоит, ҳаԥхьаҟа аҳамҭа хада саиааирц», –игәы ацԥыҳәаны иҳәеит аспортсмен.

Атурнир ахьтәы медал агаҩцәа ируаӡәку Краснодартәи ақәԥаҩ Џьамал Солтамурадовгьы имчқәа ԥишәарц атурнир ахь дахьааиз аиааира игеит.

«Сара даараӡа ирацәаны атурнирқәа схы рыласырхәхьеит. Аханатә аиааира агара сҽазсырхион, ус иагьыҟалеит», – иҳәеит ақәԥаҩ.

Атурнир ахәшьара ҳаракы арҭеит уи алахәцәа реиԥш азыҟаҵаҩцәагьы. Убас, Ҟабарда-Балкариатәи азыҟаҵаҩ Руслан Нахушев атурнир аиҿкааҩцәа иҭабуп ҳәа реиҳәеит ирҭаз ааԥхьаразы, иагьазгәеиҭеит аицлабрақәа рыҩаӡара ҳаракны ишымҩаԥысыз.

«Ари атурнир ахь ԥшьышықәса раахыс ҳаауеит. Ҳара иааҳгеит15-ҩык аспортсменцәа еиуеиԥшым ақәратә категориақәа ирыҵаркуа», – иҳәеит иара.

Мусса Егзакь ихраҿа агаразы атурнир раԥхьаӡа акәны Аԥсны имҩаԥысит 2011 шықәсазы. Арҭ ашықәсқәа ирылагӡаны уи ахьӡ-аԥша аиуит Аԥсны анҭыҵгьы. Сынтәа атурнир еизнагеит ҩышәҩык аспортсменцәа, урҭ ааит ақалақьқәа Москва, Санкт-Петербург, Ростов, Краснодар, Калининград, Шәача рҟынтә, иара убас Ҟарачы-Черқьестәылеи, Ҟабарда-Балкариеи, Нхыҵи Аахыҵи Уаԥстәылеи, Ингәыштәылеи, Даӷьсҭани рҟынтә, Аԥсны ақалақьқәа зегьы рҟынтә. Аспортсменцәа еиндаҭлоит ақәратә категориақәа ҩбеи акапантә категориақәа жәибжьи рҟны. Ихадоу аҳамҭа – Мусса Егзакь ихраҿа занаршьо деилкаахоит ахәаша, жьҭаарамза 18 – афестиваль «Абаза» аҵыхәтәантәи амш азы. Уи ихьӡ рыларҳәоит Аҟәа, Амҳаџьырцәа рыԥшаҳәаҿы имҩаԥысуа аконцерт аҿы.