COVID-19 апандемиа аамҭазы Аԥсны ишьақәгылаз аепидемиологиатә ҭагылазаашьеи иалагалоу аԥкрақәа рырԥсыҽразы иҟоу алшарақәеи ирылацәажәеит Ауааԥсыра акоронавирустә ҿкы рацәыхьчаразы акоординациатә штаб аилатәараҿы.
Аԥсны иахьазы акоронавирус иадҳәаланы иҟоу аепидемиологиатә ҭагылазаашьа маншәалоуп иҳәеит агәабзиарахьчара аминистр Ҭамаз Ҵахнакьиа аԥшьаша, рашәара 11 рзы имҩаԥысыз Аԥсны ауааԥсыра акоронавирустә ҿкы рацәыхьчаразы акоординациатә штаб аилатәараҿы.
Абри аҩыза аҭагылазаашьа шьақәгылеит ианаамҭаз имҩаԥгаз аҿкы аҿагыларатә ԥкрақәа ирыбзоураны ҳәа азгәеиҭеит аминистр. Иара аштаб алахәцәа адырра риҭеит апандемиа аамҭа иалагӡаны Аԥсныҟа ишаагаз амедицинатә маҭәахәқәеи, ахархәагақәеи, ахыхьчагақәагьы уахь иналаҵаны, иааидкыланы 67 миллиони 353 нызқьи 772 мааҭ рыхә.
Рашәарамза нҵәаанӡа иазыԥшуп еиҭагьы амедицинатә маҭәахәқәа раагара, урҭ аахәахоит Аԥсны иҟоу аурысқәа руаԥшь еизыргаз аԥарала – 9 миллионк мааҭ инареиҳаны.
«Иахьазы Аԥсны иҟоуп арыԥҳақәа аҳауарҭарсга аппаратқәа 60, урҭ рахьтә 22 аахәоуп хазҭоу ашықәс хәажәкырамза инаркны. Апандемиа аамҭа иалагӡаны аҿкы амазараа аарԥшразы имҩаԥгоуп 5900 инареиҳаны ПЦР-ҭҵаарақәа. Агәаҭара иахысит 1241-ҩык, аҭҵаарақәа 1677 мҩаԥгоуп», – иҳәеит Ҭамаз Ҵахнакьиа.
Атәылаҿы иалагалоу аԥкрақәа рырԥсыҽра азҵаара дазааҭгыло Аԥсны аԥыза-министр Александр Анқәаб иазгәеиҭеит ашәарҭадара аиқәырхаразы, ҳтәылахь акоронавирус «аарымгарц» азы, аҳәынҭқарратә ҳәаақәа макьана иаркызароуп ҳәа.
«Ҳҳәаақәа шарку иаанхароуп, нас убри шьаҭас иҟаҵаны атәыла аҩнуҵҟа аԥкрақәа рырԥсыҽра ҟалоит», – иҳәеит Александр Анқәаб.
Иара иазгәеиҭеит, аҳәаа аартхар Аԥсныҟа иаауа ауаа рхыԥхьаӡара акырӡа иацлоит, уи иахҟьангьы аепидемиологиатә ҭагылазаашьа цәгьахар ҟалоит ҳәа.
Ҩ-сааҭк ицоз аусуратә еилатәара ашьҭахь Акоординациатә штаб алахәцәа ирыӡбеит COVID-19 иадҳәалоу аҭагылазаашьазы Ақәҵара ҿыц шьақәыргылазарц, иааиуа амшқәа рзы уи Аԥсны ахада Аслан Бжьаниа дахәаԥшырц инапаҿы иҭахоит. Адокумент ҿыц кьыԥхьхоит аҳәынҭқарра ахада иофициалтә саит аҟны иааиуа амчыбжь алагамҭазы.
Иахьатәи амш азы Аԥсны акоронавирустә хҭысқәа 36 азгәаҭоуп, 27-ҩык ргәы бзиахеит, аӡәы лыԥсҭазаара далҵит. Гәдоуҭатәи ахәышәтәырҭаҿы ишьҭоуп ааҩык апациентцәа. 481-ҩык Аҟәатәи асасааирҭа «Аиҭар» аҟны ҩы-мчыбжьатәи акарантин рхыргеит. Иахьазы уа иҟоуп 16-ҩык ауааԥсыра.
COVID-19 Кавказ алаҵәара астатистика шәахәаԥшырц шәылшоит абри азхьарԥш шәықәныҟәаны
шәҭалароуп, ма шәыҽҭажәыҩроуп.