Санкт-Петербургтәи аҳәынҭқарратә абнанхамҩатә университет адкыларатә комиссиа ахантәаҩы Елена Богатова Аԥснытәи абитуриентцәа ирзеиҭалҳәеит аҵараиурҭа аӡбахә Аконгресс апресс-центр аҟны имҩаԥысыз апрезентациаҿы. Лара абитуриентцәа иралҳәеит ауниверситет аҿы аҵара иацу абзиарақәеи иунаҭо алшарақәеи ртәы. Иаҳҳәап, ари аҵараиурҭа иара ахатәы зеиԥшынхарҭа амоуп, уи аҵакыра зегьы ашәарҭадара аганахьала уақәгәыӷуа иҟоуп.

Адкыларатә комиссиа аиҳабы илҳәеит иахьазы ауниверситет аҟны аҵара шырҵо 65 тәыла рҟынтә астудентцәа.

Аиԥылара ахҳәаа аҭо, Елена Богатова иазгәалҭоит иааиз аҿар ауниверситет аҭаларазы азҿлымҳара ду шаадырԥшыз.

«Аҿарацәа рлымҳа кыдҵаны исзыӡырҩуан, апрезентациа иазҿлымҳаны иахәаԥшуан, аинтерес шрымаҵәҟьаз рлакҭа ианыԥшуан. Сара даара исгәаԥхеит ҳаиԥылара. Доусы иара инаалаша ҳәа ииԥхьаӡо ахырхарҭа алиххьеит», – ҳәа адырра ҟалҵеит Богатова.

Оҭар Аргәын аӡыргарахь дааит Спнкт-Петербургтәи абнанхамҩатә университет аҭалара иҭахны. Иара аҵара иҵалар игәы иҭоуп аинформациатә технологиақәа рфакультет аҟны.

«Абри аҩыза алшара шыҟоу ааигәоуп ианыздырыз, Кан Ҭаниа (АААК аппарат анапхгаҩы – аред.) Facebook аҿтәи идаҟьаҿы саԥхьеит, иара уи аухаҵәҟьа аҩны иҳаӡбеит абри алшара ҳхы ишаҳархәо. Сгәыӷуеит, аҭалара сылшап ҳәа, ауниверситет саанахәап ҳәа», – иҳәеит аҷкәын.

Светлана Квеселава ари аиԥылараҿы анык лаҳасабала иааиз дыруаӡәкуп. Санкт-Петербургтәи абнанхамҩатә университет аҭалара шыҟало атәы даԥхьеит АААК аинфопортал аҟны, лара апресс-центр ахь дааит ҩыџьа лԥацәа лыманы.

«Апрезентациа ак ҳаҩмыжькәа ҳазыӡырҩит, еиҳангьы агәра ҳгеит ари аҵараиурҭа аҭалара ишаԥсоу», – лҳәеит ан.

Санкт-Петербургтәи абнанхамҩатә университет дҭаларц игәы иҭоуп Максим Матуагьы.

«Х-сааҭк ицоз апрезентациа иҳамбаӡакәа иаанҵәеит. Уажәшьҭа, аҵараиурҭа аӡбахә абас инҭкааны иансаҳа, иаҳагьы исҭаххеит сҭаларц. Схазы иалыскааит аландшафттә дизаин афакультет», – иҳәеит Матуа.

Апрезентациа иаҭааит зынӡа жәаҩык абитуриентцәа, дара зегьы хымԥада ауниверситет аҭалара хықәкыс ирымоуп.

Санкт-Петербургтәи абнанхамҩатә университет 2021 шықәсазы аҭалара зҭаху зегьы, апрезентациа иақәымшәаз, мамзаргьы ихьшәаны уи аӡбахә заҳаз, Аҟәа Адунеизегьтәи аԥсуа-абаза конгресс аофис ахь иааир рылшоит абри аҭыӡҭыԥ ала: Лакоба имҩа 109, ахәаша, лаҵара 14, асааҭ 11:00 рзы.

Абитуриентцәа рнапаҿы иркызароуп атәылауаҩшәҟәы ахкьыԥхьаа, аттестат аоригинал ма ахкьыԥхьаа, 3x4 сантиметр зшәагаа ыҟоу афотоқәа фба, аԥсуа тәылауаҩра ма аурыс тәылауаҩра шьақәзырӷәӷәо адокумент.

Аԥсни Ҭырқәтәылеи рҟынтә абитуриентцәа Санкт-Петербургтәи ауниверситет аҭаларазы рышәҟәқәа аларҵар рылшоит

АИЛЫРКААГА: Сергеи Киров ихьӡ зху Санкт-Петербургтәи аҳәынҭқарратә абнанхамҩатә (абнатехникатә) университет (СПбГЛТУ) 2020 шықәсазы 217 шықәса ахыҵит, араҟа иуоур улшоит ибжьаратәу, иреиҳаӡоу, ихарҭәаау аҵара. Абнанхамҩеи, амҿы аус адулареи, абнатә химиеи, ақьаадҭыжьреи, агидролизи рганахьала аспециалистцәа разыҟаҵареи, рзанааҭдырра аизырҳареи, аҭҵаарадырратә усқәа мҩаԥыргартә еиԥши аус рыднаулоит, ишьаҭанкылатәу аҭҵаарақәа мҩаԥнагоит.

Санкт-Петербургтәи абнанхамҩатә университет Урыстәыла аиԥш зеиԥшу аҵараиурҭақәа раԥхьа апофессионалтә ҵара еиуеиԥшым аҩаӡарақәа рыла иуоуртә еиԥш асистемахь ииасит.

Иахьазы араҟа аҵара рҵоит 600-ҩык инареиҳаны астудентцәа 42 тәыла рҟынтә. Ауниверситет аҭҵаарадырратә уасхыр ӷәӷәа амоуп. Арҵаҩратә коллектив ахәшьара ҳаракы змоу итрадициатәу аметодикақәа реиԥш, иҿыцу арҵаратә хырхарҭақәа рхы иыдархәоит, идырҿиоит. Апрофессортә-рҵаҩратә еилазаара акәзар, зыҩаӡара ҳаракӡоу ҟазацәоуп.