Амультфильм «Абраскьыл ифырхаҵара» аԥсшәаҟынтә англыз бызшәахьы еиҭагоуп АААК аинформациатә портал амчала.
Аԥсуа шәаҳәаҩы, асахьаҭыхҩы, амультипликатор Асҭамыр Кәыҵниа 2020 шықәсазы иаԥиҵаз амультфильм «Абраскьыл ифырхаҵара» англыз бызшәахьы еиҭагоуп Адунеизегьтәи аԥсуа-абаза конгресс аинфопортал амчала. Уажәшьҭа автор ихаҭагьы, аиҭагара иалахыз агәыԥгьы агәра ганы иҟоуп амультфильм аудиториа акырынтә ишазҳауа.
Абраскьыл англыз бызшәала «дышцәажәаз»
Амультфильм иалоу адиалогқәа зегьы аԥсшәаҟынтә англыз бызшәахьы еиҭалгеит АААК аинфопортал аредактор хада Амина Лазԥҳа.
Аконгресс азы зхаҭабзиара ҳараку аиҭагареи адуближи аҟаҵара акырӡа ихадаран азы, афильм аус адулара дадрыԥхьалеит англызшәа ныҟәызго, уи зхатәы бызшәоу ауаҩы. Англыз Калли Сингх ԥшьышықәса раахыс Аҟәа дынхоит, абызшәа арҵара инапы алакуп. Иара иоуп абри апроект ахь иаарыԥхьаз.
Амина Лазԥҳа лажәақәа рыла, амультфильм аус адылулонаҵы абыжьҭҟьақәа реиҭагараан ауадаҩрақәа лԥылеит. Абраҟа англыз ицхыраара даараӡа ихәарҭахеит.
«Аԥсшәаҟынтә англыз бызшәахь ишиашоу абыжьҭҟьақәа реиҭагара алшо иҟамызт. Ари алаф анеиҭоуго еиԥшуп, аҵакы еиқәурхашт, аха аемоциақәа иаҵоу зегьыҵәҟьа узаарԥшӡом. Сара англыз бызшәала Калли иеилсыркаауан абарҭ абыжьҭҟьақәа ахархәара анрымоу, доусы иаанаго, анаҩс иара ихатәы бызшәаҿы иақәнаго азиԥшаарц. Абасала мацара еилыршәшәаны ҳазнеит атекст зегьы. Ҵакылагьы, експрессиалагьы еицназго ажәақәа ҳаԥшаауан», – ҳәа аиҭагара акәама-ҵамақәа дрылацәажәеит аинфопротал аредактор хада.
Уи инацҵаны илҳәеит акыр ишымариамыз амультфильм иалоу ашәагьы аиҭагара, аԥсшәа иаҷыдоу аритм аҟазшьа ццак амшала.
Амина Лазԥха иазгәалҭеит, амультфильм апродиусер Мзауҷ Ԥлиа аханатә игәы ишҭаз уи аиталиан бызшәахьы аиҭагара, аха аинфопортал аҟны ари абызшәа ахархәара амаӡам аҟнытә, Аконгресс ажәалагала ҟанаҵеит англыз бызшәахьы еиҭагазарц.
«Англыз бызшәала ииз аперсонажцәа аӡәырҩы аԥсышәала идырцәажәахьеит – Бетмен, Ауаҩы-Бызкаҭаҳа уҳәа егьырҭгьы. Ҳара иаҳҭаххеит аԥсуа фырхаҵа Абраскьыл англыз бызшәала иҿахәы иҳәарц. Ари ашьаҿа иабзоураны аԥсуа персонаж ҳтәыла анҭыҵ деицырдыруа дҟалоит. Уи анахысгьы, аҳәаанырцәтәи ҳдиаспора ахаҭарнакцәа жәпаҩык англыз бызшәа рдыруеит, урҭгьы аинтерес роуеит ари амультфильм ахәаԥшра», – лҳәеит Амина Лазԥҳа.
Лара иазгәалҭеит, амультфильм абжьы ахазҵоз зегьы, аиҭагараҿы ицхыраауаз, астудиаҿы абжьы ҭазыҩуазгьы хәыда-ԥсада аус шыруаз.
«Зегьы ргәацԥыҳәаны ирыдыркылеит англыз бызшәала аԥсуа мультфильм арцәажәара аидеиа, убри аҟнытә гәахәарыла иақәшаҳаҭхеит апроект аҽалархәра», – лҳәеит аинфопортал аредактор хада.
«Абраскьыл ифырхаҵара» автор Асҭамыр Кәыҵниа имультфильм аԥсшәаҟынтә англыз бызшәахьы иахьеиҭаргаз деигәырӷьеит, иагьџьашьатәуп ҳәа ахиҳәааит.
«Ҳара ҳҟын еиҳарак англыз бызшәаҟынтә аԥсшәахь амультфильмқәа еиҭаргоит. Уажәы ҳара ҳаалыҵ адунеижәларбжьаратә еицәажәага бызшәахьы еиҭагоуп, уи абзоуралагьы афильм аудиториа акырынтә иазҳауеит», – иҳәеит Кәыҵниа.
Иара иҭабуп ҳәа реиҳәеит адублиаж аԥшьызгаз Адунеизегьтәи аԥсуа-абаза конгресс аусзуҩцәа, инапы иҵыҵых аусумҭа аганахьала иаадырԥшыз аинтерес азы.
«АААК аҟынтә иаҳзасит сареи афильм аспонсор Мзауҷ Ԥлиеи адублиаж ҟаҳҵар ауама ҳәа. Ҳәара аҭахума, ҳазыразхеит. Сара с-иутуб канал аҿы амультфильм ицәгьамкәа иахәаԥшхьеит, аха иара аҵакы ззеилкаауа аԥсуааи аурысқәеи роуп (урысшәала асубтитрқәа ацуп – азгә.). Шьҭарнахыс амультфильм аҳәаанырцәтәи ҳдиаспора зегьы ахәаԥшыртә иҟалоит, урҭ рыдагьы англыз бызшәа здыруа зегьы. Уи акраҵанакуеит, избан акәзар амультфильм абзоуралагьы егьырҭ ажәларқәа ркультура акыр еилукаауеит», – ҳәа агәра ганы дыҟоуп Кәыҵниа.
Амультфильм абыжь ҿыцқәа
Амультфильм афырхацәақәак рыбжьы рхазҵаз аԥсуа версиа аус адызулоз адублиаж актиорцәа роуп. Убас, Ерик Миқаа Адауы дааирԥшуеит, афильм автор Асҭамыр Кәыҵниа епизодк аҿы ицәырҵуа ахәылԥҵыс абжьы ахаиҵеит аҩ-версиак рҿы. Аха англыз текст аиҳарак абжьы ахазҵаз адублиор ҿыцқәа роуп – Валери Берзениа, Алан Џьонуа, Калли Сингх, Дауҭ Логәуа.
Алан Џьонуа – зегь раасҭа иқәыԥшу апроект алахәыла иоуп, иара зынӡа дхәыҷуп – фышықәса ихыҵуеит, амультфильм аҟны Адауы иҷкәын абжьы ихеиҵеит. Аҷкәын ицқьаны англыз бызшәала дцәажәоит, хышықәса анихыҵуаз нахыс абызшәа иҳәо далагеит, Калли Сингх иҟны иҽазыҟаиҵоит. Иара иаб Дамеи Џьонуа ишиҳәо ала, Алан англыз бызшәа амультфильмқәа дышрыхәаԥшуаз иҵеит.
«Алан хышықәса анихыҵ аахыс англыз бызшәа аҵара даҿуп. Англыз бызшәала амультфильмқәа дрыхәаԥшуан. Аԥсышәала дызхәаԥшышаз зынӡа ирацәамызт, ирласны дырхысит зегьы», – иҳәеит аҷкәын иаб.
Адублиаж ҭарҩит акомпозитор, амузыкант Анри Гәымба истудиаҿы. Кали Сингх абжьы аҭаҩраангьы дыцхыраауан, англыз ажәақәа ринтониациеи рҳәашьеи акала имхәанчахарц азы. Иара ихаҭа афырхаҵа хада – Абраскьал абжьы ихеиҵеит, иара иоуп зегьы иреиҳаны ицәажәогьы.
«Сара исгәаԥхеит агәыԥ иалаз зегьы аус шыруаз, абаҩхатәреи апрофессионализми аарԥшны. Сара сазыԥшӡамызт абысҟаҩык англыз бызшәа рдыруеит ҳәа. Аԥсшәеи англыз бызшәеи рҟны еиԥшу ашьҭыбжьқәа рацәоуп, убри аҟнытә аҳәашьаҿы проблема дук аӡәгьы имоуӡеит», – иҳәеит Сингх.
Иазгәаҭатәуп, иара ихаҭагьы аԥсуа ажәақәа ицқьаны ишиҳәо. Аԥсны дынхонаҵы хатәгәаԥхарала аԥсшәа аҵара далагеит.
«Аԥсуа бызшәа аҵара сцәыцәгьахоз џьысшьон. Аха ашьшьыҳәа ажәақәа сҵо салаган, иахьазы исҭаху сҳәаратәы сыҟоуп», – иҳәеит арҵаҩы аԥсышәала. Анаҩс урысшәала иациҵеит: «Иара убри аамҭазы аурысшәагьы аҵара саҿуп, убри аҟнытә аҩ-бызшәак ансцәеилаҩашьо ыҟоуп. Ара аиҳараҩык урысшәала ицәажәоит, убри аҟнытә Аԥсны уанынха аурысшәагьы удыруазароуп».
Ашәаҳәаҩ Нарсоу Абыхәба амультфильм аоригинал аҟны ашәа иҳәоит. Англыз версиаҿгьы иара уи ашәа еиҭаганы иҳәеит.
«Ашкол аҿы, нас ауниверситет аҿгьы англыз бызшәа сҵон, аха абызшәа иахьеи-уахеи ианумаҳауа, мамзар уусура ианадҳәалам, иухашҭуа рацәахоит, аҳәашьаҿгьы агхақәа уоур ауеит. Убри азыҳәаны ашәа аҭаҩраан Калли уамакала дсыцхрааит», – ҳәа еиҭеиҳәеит Нарсоу.
Адублиаж актиор иаҳасабала дықәгылеит АААК аусзуҩ – аҭыԥантәи аҟәшақәеи аҿар рактивреи ҳәаақәызҵо Валери Берзениа. Иара Абраскьыл иҽы Бзоу абжьы ахеиҵеит.
«Аԥсны анҭыҵ инхо ҳдиаспора аиҳараҩӡак аԥсшәеи аурысшәеи рыздырӡом. Убри аҟнытә аԥсуа мультфильм еилыркааратә иҟаларц азы, еиҭагатәын. Англыз версиагьы аԥсуа цәаҩа аханы иҟаларц ҳҽазаҳшәеит», – иҳәеит дааԥышәырччаны Валери Берзениа.
Амузыкант Ерик Миқаа Адауы абжьы ихеиҵеит аԥсуа версиаҿгьы англыз версиаҿгьы. Ари апроект аҭакԥхықәра ду зцу, угәы зырхыҭхыҭуа акоуп ҳәа ахиҳәааит: аԥсышәала иаԥҵоу амультфильм англыз бызшәахьы ииаугоит, уи абызшәала ихәыцуа ахәаԥшыҩгьы аԥсуа лакә зеиԥшроу ибарц, аҵакы еиликаарц. Амузыкант инаҵшьны иазгәеиҭеит хықәкыла уҽазкны аԥсуа милаҭтә легендақәеи аҳәамҭақәеи рыла амультфильмқәа ҭыхлатәуп ҳәа.
«Сара санхәыҷыз сандуцәеи сабдуцәеи аԥсуа лакәқәа срыларааӡеит. Дара убас ирацәоуп, уахынла санышьҭарҵоз акы ҩынтә еиҭарҳәомызт шамахамзар. Абарҭ алакәқәа амультфильмқәа рылхтәуп, уи ҳалшаратә ҳаҟоуп ҳара. Гарри Поттер иеиԥш, ма ахәыҷқәа уажәы изхәаԥшуа егьырҭ амультфильмқәа акала иреиҵамкәа аинтерес рыцзаауан аԥсуа лакәқәагьы аекран ахь ииагазар. Асҭамыр Кәыҵниа аиҳарак ихатә џьабаала мацара абри аус даҿын акраамҭа. Сгәыӷуеит хара имгакәа егьырҭ ипроектқәагьы амеценатцәа рҟынтә иақәнагоу азхьаԥшра роуп ҳәа», – иҳәеит Ерик Миқаа.
Асҭамыр Кәыҵниа аԥсуа легендақәа ртематика даҽуижьҭеи ԥыҭк ҵуеит. Аԥхьаӡа акомиксқәа ҭихуан. Раԥхьатәи Асҭамыр икомикс Абраскьыл изкын, уи ҭыҵит 2009 шықәсазы. Усҟан адгылара инаҭеит Аԥсуа бызшәа аҿиара афонд. Ари аҭыжьымҭа аԥхьаҩцәа ргәы иақәшәеит, уи ашьҭахь Асҭамыр Кәыҵниа аҩбатәи акомиксгьы инапы иҵихит аԥсуа жәлар рфырхаҵа Наԥҳа Кьагәа иҭоурых иазкны.
Иахьагьы акомикс ҿыцқәа аус рыдулара даҿуп. Аҵыхәтәахьы инеигоит амультфильм «Кәтаӷьцәахылԥа» асценари. «Абраскьыл ифырхаҵара» аҩбатәи ахәҭагьы иҩит, уаҟа аромантикатә тема цәырҵуеит - афырхаҵа аҭыԥҳа ԥшӡа деиқәирхоит.
Амультфильм «Абраскьыл ифырхаҵара» апремиера мҩаԥысит 2020 шықәса нанҳәа 27 рзы Аҟәа, Ражьден Гәымба ихьӡ зху Аԥсуа ҳәынҭқарратә филармониаҿы. Ари аҭоурых афырхаҵа хада Абраскьыл – зегь ириааиуа хаҵа ӷәӷәоуп, дагьԥагьоуп. Иара атәым қәылаҩцәа рҟынтә ижәлар ихьчарц диит, ачҳареи амч дуӡӡеи злаз фырхаҵаны изҳаит. Иибжьаз иҽы Арашь дақәтәаны убри иус ԥшьа анагӡара далагеит. Алегенда ишаҳәо ала, аамҭа цацыԥхьаӡа аӷацәа ирҿагылаз Абраскьыл Анцәагьы датәеимбо дҟалеит, уи дагьахьдырхәит аҵыхәтәан. Афырхаҵа иҽи иареи ҭыҵшьа рымамкәа аҳаԥы иҭаҿарҳәеит.
шәҭалароуп, ма шәыҽҭажәыҩроуп.