Иахьазы Аԥсны иахьаҵанакуа COVID-19 ачымазара зыдбалоу ҳәа уаҩ дыҟам. Абри атәы АААК аинфопортал ԥхынгәы 14 рзы иазеиҭалҳәеит Аԥсны Агәабзиарахьчара аминистрраҟны иаԥҵоу Ауааԥсыра акоронавирустә ҿкы рацәыхьчаразы аоперативтә штаб алахәыла, аҭҵаарадырратә усуразы Аексперименталтә патологиеи атерапиеи ринститут адиректор ихаҭыԥуаҩ, аиммунологиеи авирусологиеи рлабораториа аиҳабы Алиса Матуа.

Лара иацылҵеит Гәдоуҭатәи ахәышәтәырҭаҟынтә ргәы бзиаханы ишылрыҩааз акоронавирус захьны иҟаз аҵыхәтәантәи ҩыџьа апациентцәа – урыстәылатәи арратә ҵараиурҭақәа ирҭоу аԥсуа студентцәа.

«Ари, ҳәарада, иажәабжь бзиаӡоуп. Аха аҽырҭынчра заацәоуп. Ҳара акоронавирустә ҿкы еиԥшу ҟазшьақәа зхы иадызбало ауаа ргәаҭара иацаҳҵоит. Уи аус есыҽны имҩаԥаҳгоит», – лҳәеит аштаб алахәыла.

Алиса Матуа иазгәалҭеит Аԥсны ишьақәырӷәӷәаз акоронавирустә хҭысқәа зегьы аҳәаанырцәынтә «иаагаз» шракәыз.

«Аҳәынҭқарратә ҳәаақәа шарку иаанхар, ҳаҩнуҵҟатәи аепидемиологиатә ҭагылазаашьа шҭышәынтәалоу еиқәхароуп», – ҳәа лыԥхьаӡоит аексперт.

Ԥхынгәы 14 рзтәи адыррақәа рыла, апандемиа аамҭа иалагӡаны Аԥсны акоронавирустә чымазара рыдырбалеит 38-ҩык ауааԥсыра. Урҭ рахьтә аӡәы лыԥсҭазаара далҵит, егьырҭ зегьы ргәы бзиаханы ахәышәтәырҭа илҩаауп.

COVID-19 Кавказ алаҵәара астатистика шәахәаԥшырц шәылшоит абри азхьарԥш шәықәныҟәаны>>