Адунеизегьтәи аԥсуа-абаза конгресс Аинфопортал иаԥнаҵаз онлаин-проект «Аԥсышәала ҳцәажәоит/Абазала ҳцәажәоит» информациатә партниорс иазыҟалеит абызшәатә школ Capital School Center.
Аинновациатә школ Capital School Center, Адунеизегьтәи аԥсуа-абаза конгресс Аинфопортал иаԥнаҵаз онлаин-проект «Аԥсышәала ҳцәажәоит/Абазала ҳцәажәоит» адгылара анаҭоит. Ихацыркыз аусеицура иабзоураны, аԥсшәеи абазеи бызшәеи рҵара иазку авидеоурокқәа уажәшьҭа АААК апортали аканалқәеи рҟнеиԥш, икьыԥхьуп Capital School Center аинтернет аҿтәи адаҟьақәа зегьы рҟынгьы.
Аинфопортал анапхгаҩы, абызшәатә апроект автор Амина Лазԥҳа илҳәеит, Адунеизегьтәи аԥсуа-абаза конгресс иалахәу, ақәҿиара дуқәа змоу Москватәи абызшәатә школқәа ирхыԥхьаӡалоу ари ашкол аԥҵаҩцәа Ирина Цәышԥҳаи Ролан Агрбеи апроект атәы ааигәа ишырзеиҭалҳәаз, уи инацҵаны аинформациатә партниорцәас аҟалара шрыдылгалаз.
«Дара, хымԥада, Аконгресс ахықәкқәеи ахыдҵақәеи ирыдгылоит, ирықәшаҳаҭуп, лымкаалагьы ахатәы бызшәа арҿиара иазку азҵаарақәа рҟны, убри азыҳәан иҟаҳҵаз ааԥхьара иаразнак ирыдыркылеит, апроект «Аԥсышәала ҳцәажәоит/Абазала ҳцәажәоит» иадгылеит. Ҳара ҳзы гәахәароуп, иаԥаҳҵаз онлаин-проект амҽхак арҭбааразы ари аҩыза алшара ахьҳазцәырҵыз. Уи абзоурала иҳалшоит АААК Иреиҳаӡоу ахеилак ахантәаҩы Мусса Егзакь Аконгресс аҿаԥхьа иқәиргыло ахыдҵақәа ируаку – аԥсуа бызшәеи абаза бызшәеи рҵарахьы ауаа рхьарԥшреи, радыԥхьалареи – анагӡара», – лҳәеит Лазԥҳа.
Лара иазгәалҭеит Capital School Center иахьазы ишамоу миллионк инареиҳаны анапаҵаҩцәа, иара убасгьы асоциалтә ҳақәа рҟны уи ахәаԥшцәа рымҽхак 10-миллионҩык рҟынӡа ишынаӡо, убри аҟнытә ашкол иамоу аинтернет-шҭахәаԥшқәа «абызшәа арҿиареи, аларҵәареи, иара убас ԥхьаҟатәи аусеицуреи рзы уаҳа назҭахым цхыраагӡаны» иҟалоит ҳәа.
Хаҵеи ԥҳәыси Ролан Агрбеи Ирина Цәышԥҳаи хышықәсаҟа раԥхьоуп ианаԥырҵаз Capital School Center. Ашкол аусура раԥхьатәи амшқәа инадыркны, егьырҭ абызшәақәа инарываргыланы арҵаратә программа иалаҵан аԥсуа бызшәагьы.
Ирина Цәышԥҳа дазыразуп ахатәы бызшәа аҵара адагьы, уи аларҵәареи апопулиаризациеи аамҭа шырзоужьтәу.
«Ҳара ҳзы акраҵанкуеит ҳхатәы бызшәа баша бызшәак аҳасабала акәымкәан, акультуреи, аҭоурых беиеи згәылоу, уи ныҟәызго акакәны арҵара. Сара Европа аҵара шсоузгьы, уажәазы Урыстәыла ҳшынхогьы, Аԥсны ҳалҵит – ҳаԥсадгьыл ауп. Ҳара, ҳәарада, ҳхатәы бызшәа ҳхашҭуам, иарахь иаҳамоу абзиабареи апатриотизми рыбзоуралоуп ҳашкол аҳәаақәа ирҭагӡаны ишааҳартызгьы аԥсуа бызшәа хәыда-ԥсада аҵаразы акурсқәа», - лҳәеит ашкол аԥҵаҩы.
Ирина илгәалашәоит раԥхьатәи ашкол анаартыз, уи ауадақәа адунеи аҳҭнықалақьқәа рстильқәа ирышьашәало ишыҟаҵаз, иҟан «Аҟәа» захьӡыз ауадагьы. Лара еиҭалҳәеит, ари акласс збоз ашкол аҭааҩцәа аӡәырҩы азҿлымҳара шрызцәырҵуаз Аԥсны аганахьалагьы, аԥсуа бызшәа аҵара аганахьалагьы.
Убас иагьазааит аԥсшәа арҵара: абар шьҭа хышықәса ҵуеит Capital School Center аҟны аԥсшьарамшқәа рзы амалаҳәа аԥсуа бызшәа аурокқәа мҩаԥысуеижьҭеи. Уи аамҭа иақәымшәо, иҷыдоу арҵаратә аамҭеихша зҭаху рзы ашкол аҿы иҟоуп зыхә шәатәу абызшәатә курсқәагьы. Ашықәс аҩныҵҟала имҩаԥысуеит имаҷымкәа аԥсуа бызшәеи, Аԥсны аҵасқәеи, ақьабзқәеи ирызку аусмҩаԥгатәқәа. Иахьазы ашкол анапхгара рнапы алакуп ахәыҷтәы хырхарҭа аус адулара – аԥсуа бызшәа аҵаразы ахәыҷқәа иманшәалоу аҭагылазаашьақәа рзаԥҵаразы. Насгьы, Ирина Цәышԥҳа излалҳәо ала, «аԥсуа бызшәа аҵара иазҿлымҳау милаҭла иԥсыуоу рымацара ракәӡам, аурысцәагьы маҷҩым».
Capital School Center аицаԥҵаҩы Ролан Агрба еиҭеиҳәеит, ашкол аҿы абызшәақәа зегьы, аԥсшәагьы убрахь иналаҵаны, рырҵаразы ахархәара шамоу иуникалтәу автортә методика, ацифратә технологиа smart ала иаарԥшны.
«Аԥсуа бызшәа ҳара аҵаҩцәа идҳарҵоит иҿыцу, иахьатәи аамҭа иақәшо, атехнологиатә ҟазшьа змоу азнеишьақәа рыла. Ҳхы иаҳархәоит иҿыцӡоу аинтерактивтә панельқәа.
Иарбанзаалак абызшәа, еиҳаркгьы аԥсуа бызшәа еиԥш иуадаҩу абызшәа, згәынкылара уадаҩым, имодоу, иахьатәи аамҭа иақәшәо акакәны «иҟаҵатәуп», - иҳәеит иара.
Ролан Агрба иазгәеиҭеит, аԥсуа бызшәа аларҵәара аганахьала ашкол иамоу азҿлымҳара ҷыда шакәу онлаин-проект «Аԥсышәала ҳцәажәоит/Абазала ҳцәажәоит» ала Аконгресси дареи русеицура ахацыркра ихадоу ҵаҵӷәны иазыҟалаз.
«Ҳара ҳазыхиоуп аԥсуа бызшәа иазку апроектқәеи аԥшьгамҭақәеи адгылара рыҭара, убасгьы ҳазыхиоуп Адунеизегьтәи аԥсуа-абаза конгресс имҩаԥнаго абызшәатә проектқәа рзы иҳамоу адаҟьақәа рзоужьра», - иҳәеит Агрба.
Уи адагьы абызшәатә школ аԥҵаҩцәа иазгәарҭеит, АААК агәыԥи дареи авидеонҵамҭақәа рхархәарала аԥсуа бызшәа арҵара зырманшәало, иуникалтәу ҳаамҭазтәи аметодика аԥҵара аус адулара ишазыхиоу.
Ашкол Capital School Center аԥҵан 2017 шықәсазы. Иахьазы иара Москва ақалақь аҿы х-филиалк амоуп, иара убасгьы ашкол аус ауеит Калинингради Новосибирски ақалақьқәа рҿы. 2020 шықәса цәыббрамза инаркны Урыстәыла аҩныҵҟа иаатраны иҟоуп аҿгақәа (афилиалқәа) даҽа 20.
Capital School Center аҟны иддырҵоит аԥсуа бызшәа назлоу абызшәақәа ҩажәа. Иахьазы ашкол аҟны аҵара рҵоит 1500-ҩык ауааԥсыра, есымза ашкол аҭаларазы зқьы инареиҳаны арзаҳалқәа роуеит. 120-ҩык астудентцәа аҳәаанырцәтәи абызшәатә практика иахысхьеит. Ихырҳагоу аинновациатә технологиақәа рхархәаразы Capital School Center ианаршьеит апремиа «Аинновациақәа раамҭа – 2018».
АААК Аинфопортал иатәу онлаин-проект «Аԥсышәала ҳцәажәоит/Абазала ҳцәажәоит» аусура иалагеит ҳазҭоу ашықәс рашәарамзазы, аамҭала ҩышықәса азыԥҵәоуп. Апроект ҿыц ихадоу ахықәкқәа ируакуп – зымҽхак ҭбаау аудиториа разхьарԥшра, аԥсуа-абаза диаспора ахаҭарнакцәа, ҭыпс иахьынхозаалакгьы, рхатәы бызшәа аҵаразы иманшәалоу аҭагылазаашьақәа рзаԥҵара.
шәҭалароуп, ма шәыҽҭажәыҩроуп.