Агастрольқәа зманы Аԥсны иаҭааз Академиатә амилаҭтә кәашаратә ансамбль «Нальмес» ақәгыларақәа хыркәшахоит мшаԥымза 12 рзы Гәдоуҭа ақалақь имҩаԥысуа аконцерт ду ала.
Аԥсны ауааԥсыра бзи ирбо Адыгатәылатәи аҳәынҭкарратә милаҭтә кәашаратә ансамбль «Нальмес» агастрольқәа рҳәаақәа ирҭагӡаны иқәгылеит Аҟәеи Ҭҟәарчали. Иара убасгьы, артистцәа ықәгылап ҳәа ргәы иҭоуп Очамчыреи Гәдоуҭеи – мшаԥмза 11, 12 рзы.
Аконцерттә программа шьақәгылоуп акәашаратә номерқәа 16 рыла, иааидкыланы урҭ ирылахәуп 80-ҩык акәашацәа.
«Аамҭакала асцена аҟны иқәгылоит 50-ҩык, ма 30-ҩык акәашацәа. Ари даара аџьабаа зцу усуп, аха уи алҵшәа уаршанхоит. Апрограмма ҳаԥсахит, иааҳгеит Аԥсны ирымбац аномерқәа. Иара убасгьы ахәаԥшыҩцәа ирызҳархиеит еиҭашьақәҳаргылаз аномерқәа – 25 шықәса раҟара «Нальмес» иқәнамыргылахьаз», - ҳәа еиҭеиҳәеит ансамбль асахьаркыратә напхгаҩы Аслан Ходжаев.
Адыгатәылатәи аҳәынҭқарратә академиатә амилаҭтә кәашаратә ансамбль «Нальмес» аԥҵан 1936 шықәсазы. Уи аусура аанкылан Аџьынџьтәылатә еибашьра Дуӡӡа ашықәсқәа рзы. Аибашьра анеилга ашьҭахь, жәашықәса ааҵуаны ансамбль аусура еиҭахацнаркит. 1996 шықәсазы ансамбль «Нальмес» I-тәи Адунеизегьтәи адыга культуратә фестиваль (ҞБА, Нальчик) иалауреатхеит, ианашьан Адыгатәылатәи Ареспублика аҳамҭа «Адыгатәыла Ахьӡ-аԥша». Ансамбль «Нальмес» еиуеиԥшым ашықәсқәа рзы Ҭырқәтәылеи, Еидҵоу Арабтә Емиратқәеи, Шьамтәылеи, Бельгиеи рыҟны имҩаԥысуаз жәларбжьаратәи афольклортә кәашаратә конкурсқәа ириааихьеит.
шәҭалароуп, ма шәыҽҭажәыҩроуп.