Лента событий ВААК
Инар Гыцба Ҭырқәтәыла иҟоу Аԥсны азинмчра нагӡа змоу ахаҭарнак Ибрагим Аҩӡба диԥылеит.
Адунеизегьтәи аԥсуа-абаза конгресс ауснагӡаратә маӡаныҟәгаҩ, Аԥсны Жәлар Реизара адепутат Инар Гыцба Ҭырқәтәыла иҟоу Аԥсны азинмчра нагӡа змоу ахаҭарнак Ибрагим Аҩӡба диԥылеит. Аиԥылараҿы иалацәажәеит аԥсуа-абаза диаспора ахаҭарнакцәеи дара рхеидкылақәеи аус рыцура азҵаарақәа. Хықәкылагьы иахәаԥшит АААК Иреиҳаӡоу ахеилак ахантәаҩы Мусса Егзакь Аԥсуа культуратә хеидкылақәа рфедерациа (Аԥсуафед) ахьӡала инаишьҭыз ажәалагалақәа, дара ҵакыс ирымоуп Аконгресси Аԥсуафеди реимадара арӷәӷәара, адунеи иалаԥсоу аԥсуа-абаза жәлар зегьы ирыхәаша аусқәа рынагӡаразы.
АААК азанааҭалхра иазку атренинг Тҟәарчал имҩаԥнагеит.
АААК Аҵареи, агәабзиарахьчареи, асоциалтә активреи рыҟәша аусзуҩцәа Тҟәарчал ашколқәа зегьы рҟынтә аиҳабыратә классқәа рҵаҩцәа рзы азанааҭалхра иазку атренинг мҩаԥыргеит. Аиԥылара иалахәын Аҟәатәи аҳәынҭқарратә коллеџь аргыларатә маҭәарқәа рырҵаҩы Алиса Барцыцԥҳаи, ААУ астудентцәа Сариа Касланӡиаԥҳаи Нестор Касланӡиеи.
АААК ауаҩы раԥхьатәи ацхыраара иҭашьа иазку атренинг мҩаԥнагеит Арасаӡыхь ақыҭан.
АААК Аҵареи, агәабзиарахьчареи, асоциалтә активреи рыҟәша раԥхьатәи ацхыраара ииашаны аҟаҵара иазку атренинг мҩаԥнагеит Очамчыра араион Арасаӡыхь ақыҭан. Алекциа даԥхьон Аҭагылазаашьа ҷыдақәа рминистрра аусзуҩ Индира Амҷԥҳа. Ашколхәыҷқәа ирзеиҭарҳәеит аԥсмаҷхараан, абылраан, абаҩԥҵәараан, ашьацараан, ма ак ануцҳалак, ауаҩы раԥхьатәи ацхыраара шиҭатәу.
