Адунеизегьтәи аԥсуа-абаза конгресс иӡырнагоит аԥсуа ашәа ҿыц «Аԥсны абираҟ».
Адунеизегьтәи аԥсуа-абаза конгресс Аԥсны Аџьынџьтәылатә еибашьраҿы Аиааира агара амш инамаданы иӡырнагоит апатриоттә ашәа ҿыц «Аԥсны абираҟ», абаза жәлар ҳамҭак аҳасабала ирзыҟалап ҳәа иазхәыцны.
АААК Аҳәса рхеилакқәа рнапхгаҩы Гета Арӡынԥҳа еиҭалҳәеит, ашәа ҿыц апремиера Абираҟ амш, ԥхынгәы 23 рзы иазыԥхьагәаҭаны иҟан ҳәа, аха акомпозициа аус адулара акыр еиҳаны аамҭа агеит.
«Ашәазы аҳәаақәа ыҟаӡам. Ҳара ажәлар ҳамҭас ираҳҭар ҳҭахуп абри ашәа, аԥсуа-абаза милаҭ ахаҭарнакцәа ахьынхозаалакгьы ираҳарц. Ашәа зызку ҳажәлар рбираҟ шьҭыхны иргаз аиааироуп, ҳаԥсабара аԥшӡареи, ҳаԥсадгьыл ҳәа ззаҳҳәо зегьы амҽханакуеит иара», – ҳәа ашәа аидеиа дазааҭгылеит Гета Арӡынԥҳа.
АААК Аҳәса рхеилакқәа рнапхгаҩы иацҵаны илҳәеит ашәа апремиера мҩаԥысуеит ҳәа Аиааира амш иазку аныҳәатә концерт аҟны, цәыббра 30 рзы, аха аконцерт ҟало иҟамло макьана еилкаам, «атәылаҿы аепидемиологиатә ҭагылазаашьа уадаҩ ахьышьақәгылаз аҟынтә».
«Аныҳәатә усмҩаԥгтәқәа рзы ирыӡбо ҳәа макьана иҳаздыруам, аха арҿиаратә гәыԥ акомпозициа аус адулара иаҿуп. Астудиаҿы аҭаҩра иалагахьеит», – лҳәеит Арӡынԥҳа.
Ашәа «Аԥсны абираҟ» азы амузыка аԥиҵеит зыхьӡ дыру амузыкант Анри Гәымба, атекст еицырыҩит Анри Гәымбеи ашәаҳәаҩ қәыԥш Нарсоу Абыхәбеи. Инаигӡоит аԥсуа шәаҳәаҩы Анри Ҵулукьиа.
Ашәаԥҵаҩы, амузыкант Анри Гәымба уажәаԥхьагьы АААК апроектқәа дрылахәхахьан. Убас, иара иоуп авокалтә конкурс «Орфеи» аҟны АААК аҳамҭа ҷыда иаԥсахаз Саида Азизова лзы ашәа аԥызҵаз. Иара убас Анри Гәымба далахәын аԥсуа доуҳатә культура иазку АААК апроект ҿыц «Амазара» аҳәаақәа ирҭагӡаны арежиссиор Ҭемыр Кәакәасқьыр иҭихуаз аԥсуа кәашаразы ашәа аԥҵара.
«Сара сызлахәыз апроектқәа аԥсуа жәлар рбызшәеи ркультуреи рыҿиара иацхраауеит. Ари ашәа апатриоттә ҟазшьа амоуп, Аԥсны Аџьынџьтәылатә еибашьраҿы иаҳгаз Аиааира амш иазкуп. Ари ашәа ҭынчуп, агимн аҟазшьақәа змоу балладоуп. Акомпозициа аклассикатә оркестртә арҳәагақәа рыла ирбеиоуп», - иҳәеит акомпозитор.
Ашәаҳәаҩ қәыԥш Анри Ҵулукьиа Аҟәатәи амузыкатә ҵараиурҭа дҭоуп, иара убас Аԥсны аҳәынҭқарратә хортә каппелаҿы ашәа иҳәоит. Иара иазгәеиҭеит гәахәарала ашәа «Аԥсны абираҟ» аҳәара дақәшаҳаҭхеит ҳәа.
«Ари гәырӷьаратә ашәоуп, иашәа дууп. Аха уахцәажәаны иуҳәои? Уазыӡырҩыроуп. Абас еиԥш иҟоу ашәақәа аԥсадгьыл ахь абзиабареи апатриотизмреи рылыжжуеит, урҭқәа усгьы ҳгәаҵа иҭоуп, аха зны-зынла еиҭаҳгәалаҳаршәалароуп», - ҳәа иԥхьаӡоит ашәаҳәаҩ.
Адунеизегьтәи аԥсуа-абаза конгресс аусура ахырхарҭа хадақәа иреиуоуп амилаҭтә культура арҿиареи, ахатәы бызшәа аиқәырхареи арҿиареи. Егьырҭ Аконгресс апроектқәа реиԥш аригьы абарҭ ахықәкқәа рынагӡара иазкуп
шәҭалароуп, ма шәыҽҭажәыҩроуп.