Ауааԥсыра акоронавирустә ҿкы рацәыхьчаразы аоперативтә штаб адырра ҟанаҵеит, Аԥсны COVID-19 ахҭыс ҿыцқәа жәиԥшь шьақәыргылоуп ҳәа.
Нанҳәа 1 азтәи аоперативтә дыррақәа рыла, Аԥсны иахьаҵанакуа даҽа жәиԥшьҩык ауаа COVID-19 рыдбалоуп, иахьазы атәылаҿы ачымазара зцәа иалоу рхыԥхьаӡара 42-ҩык ыҟоуп. Абри атәы аанацҳауеит Ауааԥсыра акоронавирустә ҿкы рацәыхьчаразы аоперативтә штаб.
Аоперштаб адыррақәа рыла, аҵыхәтәантәи уахыки-ҽнаки ирылагӡаны акоронавирустә ҿкы амазааразы агәаҭара иахысит 222-ҩык ауааԥсыра. Ачымазцәа ирныруаз ауааԥсыра зегьы ргәаҭарақәа макьанагьы ирыцырҵоит.
«Абри аамҭазы Гәдоуҭатәи араионтә хәышәтәырҭа хадаҿы ишьҭоуп акоронавирус зцәа иалоу 26-ҩык апациентцәа», – аҳәоит аоперативтә штаб аацҳамҭа.
Аԥсны ауааԥсыра COVID-19 рацәыхьчаразы акоординациатә штаб нанҳәа 1 азы имҩаԥысыз аилатәараҟны аштаб алахәцәа зегьы еицҿакны ирҳәеит Аԥсны ачымазара ҿкы аламырҵәаразы иалагалаз аԥкрақәа зегьы шаԥыхтәу. Абри атәы аанацҳауеит Аԥсны Аминистрцәа Реилазаара апресс-маҵзура.
Аилатәара амшхәаԥштә азҵаарақәас иқәгылан иахьатәи аепидемиологиатә ҭагылазаашьа аҿиашьа, аԥсуа-аурыс ҳәаа аусура арежим, атуристтә сезон аартра азҵаара уҳәа.
Аԥсны аԥыза-министр Александр Анқәаб Акоординациатә штаб аилатәараҿы адырра ҟаиҵеит нанҳәа 1 инаркны Урыстәыла атәылауаа ԥықәсыларада Аԥсны иҭалар рылшоит, ҳтәылауаа ракәзаргьы убасҵәҟьа аҳәаа иахысны Урыстәылаҟа ацара рылшоит ҳәа.
«Роспотребнадзори Урыстәыла Агәабзиарахьчара аминистрреи Аԥсны асанитартә-епидемиологиатә ҭагылазаашьа иарҭаз ахәшьареи ҳтуристтә инфраструктура аԥсшьаҩцәа рыдкылара иазыхиоуп ҳәа иахьыршьази азгәаҳҭеит. Убри аҟнытә Аԥсны аганахьалагьы аҳәынҭқарратә ҳәаа ааҳартуеит, ԥынгыла ҳәа акагь ҟамҵакәа. Ари акыраамҭа ҳазлацәажәоз зҵаароуп, абас еиԥш иӡбатәуп ҳәагьы ҳазааит», – иҳәеит аԥыза-министр.
Иара иазгәеиҭеит убасгьы атәыла иҭало ауаа аҳәаа рахысраан акоронавирус рцәа ишалам зҳәо ашәҟәқәа рҭаххаӡом ҳәа.
Аԥсны Аминистрцәа Реилазаара апресс-маҵзура ишаҳәо ала, абри азы Ақәҵара апроект Акоординациатә штаб иазырхианы Аԥсны ахада идыргалоит.
Уаанӡа, ԥхынгәы 31 рзы Урыстәылатәи Афедерациа Акоронавирус азы аоперативтә штаб адырра ҟанаҵеит аурыс-аԥсуа ҳәынҭқарратә ҳәаа нанҳәа 1 нахыс иаартхоит ҳәа.
Апандемиа ҟалеижьҭеи Аԥсны иахьаҵанакуа зынӡа иазгәаҭоуп акоронавирустә хҭысқәа 98. Ичмазаҩхаз рахьтә 37-ҩык ргәы бзиахахьеит, хҩык рыԥсҭазаара иалҵит.
шәҭалароуп, ма шәыҽҭажәыҩроуп.