Аԥсны жәлар рышәҟәыҩҩы Алықьса Гогәуа иажәабжь «Асыс» ала иҭыху зметр кьаҿу афильм аԥсуа ахәаԥшцәа рзы раԥхьаӡатәи арбара еиҿнакааит АААК.
Адунеизегьтәи аԥсуа-абаза конгресс зметр кьаҿу афильм ҿыц «Асыс» Аԥсны раԥхьаӡатәи арбареи апресс-конференциеи еиҿнакааит, афильм арежиссиори уи аҭыхра иалахәызи русура иалацәажәеит. Аусмҩаԥгатәқәа мҩаԥысит АААК аҟәатәи аофис аҟны.
«Асыс» – Алықьса Гогәуа иара ус зыхьӡу иажәабжь ала иҭыхуп. ВГИК арежиссиортә факультет иалгаз Амина Кәарҷиаԥҳа лдипломтә усумҭоуп. Дзылгаз аҵараиурҭа аԥышәаратә комиссиа алахәцәа арежиссиор қәыԥш лусуҭа ахә ҳаракны иршьеит, «ибзиаӡоуп» ҳәа ақәырҵеит.
Афильм Аҟәа зегь раԥхьаӡа иахәаԥшыз АААК апресс-центр аҭааҩцәа ракәхеит, урҭ рхыԥхьаӡараҿы иҟан акультура аминистр Даур Ақаҩба, арежиссиор Виачеслав Аблоҭиа, Алықьса Гогәуа иԥҳа Амина Гогәуаԥҳаи, имоҭа Лана Базԥҳаи, Амина Кәарҷиа лыуацәеи лҭынхацәеи, иара убас афильм аҟны ихәмарыз актиорцәа.
Афильм анынҵәа уи зегь раԥхьа иахцәажәаз дреиуан еицырдыруа аԥсуа режиссиор, акиностудиа «Аԥсуафильм» адиректор Виачеслав Аблоҭиа.
«Сгәанала, Амина даара абаҩхатәра лылоуп. Абас иуадаҩу афилософиатә ҵакы змоу аматериал ахьалылхыз мацарагьы иуанаҳәоит лаԥхьаҟа ишьахәу кинорежиссиорс дҟалар шлылшо. Сеигәырӷьоит акино абзиабаҩцәа ҳхыԥхаӡара даҽаӡә дахьацлаз. Илыдысныҳәалоит, лҟыбаҩ еиҳа-еиҳа еизҳалартә еиԥш алшара лымазарц лзеиӷьасшьоит. Аҿар аҳәынҭқарраҟынтә адгылара рымазароуп, ирылоу аадырԥшырц, аусуразы иманшәалоу аҭагылазаашьақәа рымазарц азы», – иҳәеит Аблоҭиа.
Алықьса Гогәуа иԥҳа Амина Гогәуа арежиссиор иҭабуп ҳәа лалҳәеит лаб ихьӡала.
«Автор ари афильм игәаԥхеит. Иара игәы иақәшәеит арежиссиор аметр кьаҿ аҳәатәы рацәа ахьҭалыгӡаз. Алықьса Ноча-иԥа акинематограф еснагь бзиа ибон, иахьагьы афильмқәа дрыхәаԥшуеит. Иҩымҭа аекранизациа ахьазыруз гәахәарыла идикылеит, – ҳәа еиҭалҳәеит ашәҟәыҩҩы иԥҳа. – Иҭабуп ҳәа расҳәоит Адунеизегьтәи аԥсуа-абаза конгрессгьы, афильм арбара ахьеиҿыркааз азы».
Афильм «Асыс» Аԥсныҟа иааргаанӡа егьырҭ атәылақәа жәпакы рҟны иахәаԥшхьан, иара 12 фестиваль ирылахәын: Франциа, Италиа, Урыстәыла, Кореиа, ЕАА, Иапониа. Иҟоуп аиааирақәа ахьагазгьы еиуеиԥшым аноминациақәа рыла: «иреиӷьу астуденттә фильм», «иреиӷьу арежиссиор-астудент», «иреиӷьу зметр кьаҿу афильм», «иреиӷьу аоператор иус».
Абри аганахьала акультура аминистр Даур Ақаҩба иазгәеиҭеит арежиссиор Амина Кәарҷиаԥҳа лгәымшәара, избан акәзар лара аԥсуа шәҟәыҩҩы иҩымҭа аекран ахь ииалгеит, ус анакәха «ҳмилаҭтә философиа атәым ахәаԥшҩы идгалара дацәымшәеит».
«Афильм анаҳба ашьҭахь иаҳҳәар ҳалшоит, Иапониа инхогьы аԥсуа философиа еиликаар илшоит ҳәа. Сара схаҭагьы стәымуаҩушәа, Алықьса Гогәуа иажәабжь иамыԥхьац иеиԥш, сгәы рҿыцны сахәаԥшит. Ара иаҳбо аԥсабара ԥшӡеи, аҩнреи, асыси мацара ракәӡам, ажәлар рдунеихәаԥшышьа аарԥшра аҽазышәароуп. Уи былшеит ҳәа сгәы иаанагоит, – иҳәеит иара Амина лахь ихы нарханы. – Баԥхьаҟа иҵегь аус дуқәа бзыԥшуп. Ақәҿиарақәа бзеиӷьасшьоит! Агәра згоит аԥышәа змоу арежиссиорцәеи ақәыԥшқәеи зегьы рымч еилаҵаны Аԥсны акинематограф наунагӡа аԥсы ҭазарц ишаҳзыҟаҵо».
Афильм иахәаԥшыз рыбжьара дыҟан аполитик, ауаажәларратә усзуҩ, ԥыхьа Гагра араион ахадас иҟаз Асҭамыр Қьецба. Иара иаб игәараҭаҟноуп Очамчыра араион Џьгьарда ақыҭан афильм аҭыхрақәа ахьымҩаԥысуаз: ари аҩны алылхит арежиссиор лхаҭа акыр аԥсуа қыҭақәа данрылс ашьҭахь.
«Афильм ахьҭыху аҩнаҭаҟны еснагь апату рықәын иналукааша акультура аусзуҩцәа, аҟазацәа, ашәҟәыҩҩцәа. Алықьса Ноча-иԥа Гогәуа сани саби бзиа ирбоз шәҟәыҩҩын. Агәра ганы сыҟоуп, сара схылҵ-ԥылҵ иалаҽхәаны ишырҳәало арежиссиор ду Амина Кәарҷиаԥҳа лзанааҭ аҟны раԥхьатәи лшьаҿақәа ахьыҟалҵаз ҳгәараҭаҿоуп ҳәа», – иҳәеит иара, анаҩс ВГИК аушьҭымҭа лус азнеишьа лымаирҽхәеит, лаԥхьаҟа иҵегь ақәҿиарақәагьы лзеиӷьеишьеит.
Амина Кәарҷиа лхаҭа лакәзар, еиҭалҳәеит актиорцәа ралԥшаара шымҩаԥысуаз, аҭыхрақәа ахьымҩаԥылгашаз аҭыԥ шалылхуаз, избан аҭыхразы аԥсуа литература зыԥсы ҭоу аклассик абри иажәабжь залылхызгьы.
«Афильм – азҳара атема иазкуп, аҷкәын хәыҷы идунеихәаԥшышьа ҽнакала аҽеиҭанакуеит, иара убас ари аҭоурых уаҵәтәи амш иаҳзаанаго шаҳзымдыруа аанарԥшуеит, адунеи аибаркышьа шуашәшәыроу уеилнаркаауеит. Иахьазы арҭ атемақәа зегь актуалра рыҵоуп. Убри аҟнытә сара сзы аинтерес аҵан абри аҩыза афильм аҭыхра. Игәаӷьыуацәан ҳәарада, абас еиԥш иҟоу аҩымҭа ганы аметр кьаҿ аҭагӡара. Аха сшәара аасҭа сгәаҳәара аиааит. Заанаҵ автор азин имсхит иажәабжь аекранизациа азуразы», – лҳәеит Амина Кәарҷиаԥҳа.
Афильм ф-бызшәак рыла еиҭагоуп, атитрқәа аҵаҩны иҟаҵоуп АААК аинфопортал амчала. Уажәшьҭа «Асыс» иахәаԥшыр зылшо аудиториа акырынтә еизҳаит. Афильм Аконгресс асаит аҟны иҭагалоуп, изҭаху зегьы шәахәаԥшыр шәылшоит.
шәҭалароуп, ма шәыҽҭажәыҩроуп.