Барганджиа Саид

Апсны апны коронавирус згIва зхьуа шIыцта жвагIвы гIараутI, уахьчIвала ареспублика апны COVID-19 зхьуа 42-гIв йнадзатI. Ауи апш хабар аргатI июль а 30 ахъвлапын ауагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, йагIвсыз ацIхи амши руацIа коронавирус рыхьуи йрымхьуи ауысла 93-гIв дырхъвыхтI. АзгIва зхьуа ауагIа йрыднагалкваз ужвыгьи йдырхъвыхыркIвитI.

"Ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 14-гIв щтIапI, 30-гIв тшдыркIьыдан рпынква йаъапI", – гIанахIвитI ахабар зну агIвыра.

Ауи апхъала июль а 30 атшын Апсны Республика згIвадарахчарала а-Министерства апресс-къвырльыкъвхарта хабар аргатI згвы зхьуата ласыта цхърагIара йазыбжу ачымазагIвква а-Республика чымазагIвтара йшнарахвлуш.

"Согъвым акъала чымазагIвтара акардиология хъвшара мызкIыла карантин йъадыркIыз йгIалцIла згвы зхьуата ласыта цхърагIара йазыбжу ачымазагIвква а-Республика чымазагIвтара апны йрайъазуштI", – гIанахIвитI ауи ахабар зну агIвыра.

Апсны Республика абзазагIвчва COVID-19 коронавирус згIва йачвыхчарала а-Координация штаб ащаквыргылра ащатала асквш 2020 июль а 27 атшын Апсны Республика апрезидент Бжаниа Аслан Апсни России ркъральыгIва мажа анахъысра-гIахъысра ауысла йщаквгылу ашIакIраква асквш 2020 август а 4-дза йдрауата Унашва гIайгтI. АгIвыма къральква рбзазагIвчва коронавирус шрымхьуа гIазырбауа швъа рымамкIва Апсны йту ръахIыльчва аргванква зны йрызгIай йауаштI.

Пандемия гIаджвыквлищтара Апсны апны зымгIва шалакIу 81-джвы коронавирус рыхьуата йщаквдыргылтI, ауат йрыуата 37-гIв бзихахтI, гIвыджь псытI.