Адуней апсуа-абаза конгресс ауысхагIвчва рынбжьагIв йгьи ръачIвагIалагIв Васильев Костя йыхьызла хъмаштылра уыс адыргалтI.
Барганджиа Саид
Адуней апсуа-абаза конгресс ауысхагIвчва ари асквш ахъа здуней зхIваджьыз рынбжьагIв йгьи ръачIвагIалагIв Васильев Костя дъабзазуз атдзы апахь быжьчамхIакI ларцIатI. Ари ауыс йалан Костя йан, йахщчва, йыгIвзачва.
АААК апхIвыс советква рунашвачпагIв Ардзынба Гета а-Конгресс анхагIвчва гвып рыхъазла асквш 2021 нашхыйарала йшгIалагаз гIалхIватI: «адуней йхIваджьтI а-Конгресс амурадква зымгIва йрыцызкIуаз, ажвлара йырдыруа апроектква зымгIва хIыцзырхъйуз хIынбжьагIв, хIъачIвагIалагIв».
«Арат ажваква йахърыкъьачвата йшвымбан – Костя цIабыргыта зынгьи тшгьхIылйымхуазтI, уыста йгIащтIыхIхлакIгьи йнахIырдзандзкIьа дхIыцын. Апсны апны ашIыпIа хъвшараква ангIанхIыршузгьи дхIыцахъыкIвшун. ЙанакIвызлакIгьи хIыдзхъа дгылан», – йгIацылцIахтI Ардзынба.
Ардзынба Гета рынбжьагIв данрылцI а-Конгресс апны ауи йыхьыз закIыла йшырхIвуш йазхъвыцуа йшалагаз лхIватI.
«ХIара ари ауыс Констаантин йгьагьара йанакIвызлакIгьи йщардагIвыз чкIвыныргIагьи гIаланахIыркIра хIтахъын. Абарауаса йтдзы апахь цIла лахIцIарныс гIахIхъвыцтI. Ауи йангьи йылгвапхатI. ЙыгIвзачвагьи хIаргьи хIацыта ауат ацIлаква хIырхьпшларныс тшхIзазкIкIлушта хIгвыгъитI», – йгIалылкIгIатI АААК апхIвыс советква рунашвачпагIв.
Константин йан, Васильева Елена, ауыс адызгалызгьи йгIалалызгьи лразыра ажваква рзыналырхатI. Ауи лыладзква агIылахIва йылкIуан. Костя йыгIвзачва кьазула апхIвыс йлыдгылуамца тшлыкIвдыршун, лпа дшырхъмаштылуаш даздыргвыгъун.
«Счважварныс счвхIатлапI. Анчва дшвзыразхатI зымгIвагьи», – лхIватI Елена.
Акция далан Константин йапхъахуз йарыпхьагIв Шмакова Лидиягьи. Ауи Костя данхвыцызгьи дтынчта, дщаквкIыта, амаджьанра тшайымтуата дшаъаз гIалгвалашвахуан.
«Асквшква цун, ауи тIакIв дчмазагIвын, акласс зымгIва ауи йызсакъуан. Арат асквшква шабгу ауи сыла дыцIан. Зны йангьи йласхIвтI: «БапшыстI дшчкIвынджьащахъвахаз. Пшдзата дгIвычапI, нхара дъалагаз ауи акIвымкIва йгьамуашзапI» – хIва», – лгIагвалашвахраква хIыцагIвылшатI арыпхьагIв.
Константин йыгIвза Квициниа Саид йшипхьадзауала, йара Костягьи ари йзадыргалыз ауыс йгвапхушын, аргваныта дыздыруаз ауагIа аллеяла йанагIвсуа ргвы дъагIаташвахлуш йара йгвгьи гIанарпхушын.
Ужвыгьи йыгIвза аргваныкI, Хьыбба Дауыр, ари акция Костя йквнагу рахIа йхвыцу уыста йбитI.
«Костя цхърагIара йазыбжу ауагIа зымгIва рапхъа йырзынадзуз дрыуан. Ари йахьчIва йхIчпаз йбазарквын швабыж дгвыргъьушын. АхърыкъьаракIгьи аламкIва, апхъахьыла узайгвыгъушыз дчкIвын бзита Апсны зымгIва дырпхатI», – йхIватI Дауыр.
Лыладзква лчвгIайитI Костя дангIалгвалашвахуа ауи гIвза аргваныта йымаз Капикян Виктория.
«Костя араъа йаъу дзачIвызлакI йбзазара апны щтакI гIанижьтI. Ауи дкIкIауа, абзирала дахъуа даъан. Араъа зымгIва хIъайззаз ауи йгвапхушын, йауа ухIварыквын, ауи йанакIвызлакIгьи ауагIа шадикIылуаш дащтан. Костя йынхара апны агIвычIвгIвыс апхъа дйыргылуан. Ауи йпахь йгылу агIвычIвгIвыс тшгIайырбара шитахъу йахъазымкIва ймагIындзугьи йзыдыруан. Ари акция зымгIва йрапхъата ауи йтгIачва ргвыхь йалнардзгIушта сгвыгъитI. Сара араъа аргваныта сбзазитI, сагIвспхьадзагьи йаъахым агIвычIвгIвыс дшырхъмаштылуа сазхъвыцлуштI. Йара акIвпIта, ахъмаштылра джьащахъвара ангIаннаршауагьи аъапI», – лхIватI Виктория.
Васильев Константин асквш 2021 январь агIан йбзазара далгатI. Костя йгвы йыхьуата дгIадритI. Ауи йан йлархIвлун ачкIвынхвыц щарда дшнамиуаш, ауаса Константин «йара йгвалаква» йыман. ЙызгIва йдыруанта акIвын рахIагьи ажвлара уысква джьгарта дызрылалуаз – бзира рыцIа щардата йчпарныс дахадзара йтахъын. Костя сквш 30 йхъыцIырныс быжьмызкIы атахъыхта йынцIра шIчIватI.
швталра йа тшаншвцIара атахъыпI.