Апсны апхьартаква рпны «Апсуара» йарыпхьара магIныта йаму йаквчважватI Очамчыра къала йаъу ПIапIаскьыр И. йыхьыз зхъу АуагIахъа библиотека апны.
«Апсуара» ъадаб-намыс хабзаква гIащаквыжьра йгьи ауагIа йрылагара – апхьартаква рпны ауи йарыпхьарагьи алата – йырзынарху айкьангьашра-айчважвараква рабаркIыра джвыквылцIатI АААК йаланакIуа апхIвысква р-Координация совет аунашвахъцIагIв Бебиа Екатерина. Йапхъахуз анйара йалан Очамчыра къали Очамчыра райони рапхьартаква рарыпхьагIвчви рунашвачпагIвчви. Анйарипхьадза йалазлуштI ахIбачва, апхьахьаква, аршIыйагIвчва, ауаъа архивква йгIарылху авидеоква гIадырбалуштI. Апроект йапхъахауа ахъвы апкъ йтата айчважвараква Очамчыра, Гвдауыта, Ткъварчал районква рпны йадыргалуаштI.
Анйара йалан Апсны АхIбачва рсовет аунашвахъцIагIв Думаа Аполлон, Очамчыра район АхIбачва рсовет аунашвахъцIагIв Лагвилава Юрий йгьи ажвлара уыснкъвгагIв КIакIалиа Иван. Анйара йалаз зымгIва рапшта ауатгьи «Апсуара» арыпхьара апхьартаква рпрограмма йаларцIарныс шгIалырхуа рхIватI.
Айчважвара йалакваз архив йгIалху авидеоква ддырбатI. Ауаъа асасчва «Апсуара» йапшым ахъатаква гIащтIырхуата йаквчважвитI. Ауат йрылан КвтIол апхьарта йадиректорыз Табагуа Пантик «Апсуара» арыпхьара апрограмма йалацIара ауыс дъаквчважвауа, агIвгIвы Гвыргвылиа Борис апсуаква рацзакIыра хчара шатахъу ъайхIвауа, апхьахьа-археолог Цвинариа Игорь ауагIахъа фаша тамамта йшынкъвугуш ъаргвынйыргIвуа акадрквагьи.
Апрезентация гIахъылтIуата апроект гIалазгаз Бебиа Екатерина Адуней апсуа-абаза конгресс анхара апны йащтагIайуа ахвысквша «Апсуара» йшасквшызлуш гIалылкIгIатI. Ауи АААК ЙхIаракIу асовет аунашвачпагIв Эгьзакь Мусса апроект агIаныршари тшауацIнарыхри къару ду ъалайцIауа ахъаз дшизыразугьи лхIватI.
«Эгьзакь Мусса йакIвпI апсуакви абазакви рцIасква, рхабзаква, ръадаби рнамыси хIуыжвгIанчIви жвлара йырзыхчара ауысла хачIвы лыхра шатахъу гIалызкIгIаз. АААК апроектква зымгIва рырхъйара збзиру Эгьзакь Мусса зджьара йгIанымхауата сшизыразу схIвара стахъыпI. Ауи ансимшгьи апсуа-абаза культура агIащаквыжьри тшауацIнарыхри щарда алайцIитI. Ауи уыста йхауа хвы аквцIауачвапI», – йгIацылцIахтI ауи.
Апсны АхIбачва рсовет аунашвахъцIагIв Думаа Аполлон Бебиа Екатеринагьи АААКгьи ари ауыс ъагIащтIырхыз ахъаз йразыра ажваква рзынайырхатI, арат айкьангьашраква магIын ду шрымугьи йхIватI.
«УахьчIва хIара хцIасква йгIаранкъвакъвитI Интернетгьи, йапшым агаджетквагьи, ауат йгIадзынгылуа абанпара рхъа йтаржьуи «Апсуара» уыззнабжьауи гьаквшвум. Ауи анкъвакъвра апны хIара хIчIвы хIымхчакIва амаль гьамам», – йхIватI Думаа.
ЧкIвыныргIи физкультури тшауацIдрыхрала ахъвшара аунашвахъцIагIв Берзениа Валерий ауыжвгIанчIви гаджетквагьи «Апсуара» арыпхьара апны йгIаурысабапра шатахъу ауысла йгвгIанаграква гIайхIватI.
«ХIара агIамта хIацчIвырхъара атахъыпI. ХIсабиква информация Интернет йангIатырхуазара – азаман тшацхIчпата хIсабиква агаджетквала майрата ауаъа йрызгIатыхуаш абзира апсышвала йтахIцIара атахъыпI – апсуа бызшвала йырчпаз мультфильмызтI, йатаркIыз фильмызтI, уыскI йазынарху видеоролик айшысызтI. Ауат щардазара йгьи йапшымызлара атахъыпI», – йхIватI Берзениа.
Джьгьарда аквтанай апхьарта арыпхьагIв Агвхава Милана уцри бызшва уымдыруата йхIцIасу агвбайара ащата гIащаквужьныс швабыж йшбаргвхуш гIалылкIгIатI.
«ЗымгIва йрапхъата йгьи хъадата хIыздынхалра атахъу абызшва ардырра акIвпI. Апсышвала йымчважвауа ацIайква хIкультурала йпсыпнкъвгауа йгьызхъвыцуашым», – дацIачIвагъватI Агвхава.
Арыпхьарала, жвлара джьгаррала йгьи згIвадарахчарала АААК ахъвшара аунашвахъцIагIв Хагба Изольда «Апсуара» ащайдзаква ашIара йдырдырра магIныта йаму дацIачIвагъватI.
«ХIъадаб-намыс хабзаква адызкIылуа «Апсуара» хIара йхIцIасу атшычпаща, акъазща, акърар, ахъахвдырра аланакIитI. Апсны апхьартаквакI рпны «Апсуара» факультативта йадрыпхьитI. Ауаса са йшспхьадзауала, «Апсуара» йъакIвызлакIгьи йапхьауата апрограмма йалацIара – хIсабиква апсуа цIасквала йгIадзныргылра апны магIын ду зму уысхуштI», – лхIватI Хагба.
Ауи йшылпхьадзауала, чкIвыныргIа ауагIахъа культура бзи йдырбара атахъыпI.
Айззара аллыргауата Бебиа Екатерина ауи йгIалылкIгIаз гIалхIватI, апхъахьыла йыргвыгъугьи даквчважватI.
«ЙахьчIва хIара магIны зму ауысква хIрыквчважватI, хIгвгIанаграква хIхIватI. Глобализация хIаналанахIвауа уыжвгIанчIви заман агIан цIарата йгIагылитI хIуагIа анцIрала йынкъвыргаз акультура ахчара ауыс. Ауаса кьангьаш гьазгIазгуам хIара тшадхIкIылырквын баргвырата йаъу зымгIва хIшрызхъысуаш», – лхIватI ауи.
«Апсуара» ъадаб-намыс хабзаква йырзынарху айкьангьашра-айчважвараква рабаркIыра Адуней апсуа-абаза конгресси АААК йаланакIуа апхIвысква р-Координация совет аунашвахъцIагIв Бебиа Екатерини йацджвыквырцIатI. Апроект «Апсуара» ащатаква Апсны апны дугьи хвыцгьи йдырдырра, йрылагара йазынархапI.
швталра йа тшаншвцIара атахъыпI.