Абаза жвлара уысхагIвчва йрыуазаджву Джьандар Мурат АААК йритыз аинтервью апны йгIайхIватI Къарча-Черкес республика апны абаза бызшва агIахчара йшазабакIуа.
Къарча-Черкес апхьартаква рпны абаза бызшва йшадрыпхьауа, Черкесск апны цри бызшвала акурсква йгьи Апсны къральыгIва университет рыцынхара ауысква АААК ахабарргарта портал йритыз аинтервью апны дрылачважватI Абаза-апсыуа уагIа ртшауацIнарыхра ацхърагIара знархару Адуней адкIылара «Алашара» абызшва ахъвшара аъачIвагIагIв Джьандар Мурат. Айчважвара акIвлыршатI Ардзынба Аста.
– СынчIва июль мыз агIан РФ а-КъральыгIва дума «РФ апны арыпхьара ауысла» хабза ауагIахъа бызшваква руысла апсахраква аларцIатI. Ауи ашIыцра абаза бызшва арыпхьара псахра кIара аланацIама?
– Апсахраква нархарата йрыму ари акIвпI: ужвы анчва-абачва ракIвпI апхьагIвчва рцри бызшва гIалызхуаш, ахабза хвитнагIа гIарнаттI рсаби йыхъазла цри бызшвата урышв бызшва щаквдыргылырныс. Апхъала ауи ауыс асабиква гIазлыцIыз ауагIахъа рыбызшвала йщаквдыргылуан. Ари ашIыцра ашвхIаусыгIвала шварагIварара гIаншатI асабиква рыбызшва цри гIалрымхуата урышв бызшва ауи ацынхъвы йгIалырхпIхIва.
Ауи кьангьаш гIауыланацIауата йгьаъам, йшпакIву ухIварыквын саби щардагIв цри бызшвала йзымчважвауата асабигIзартаква йгIарыцIцIхитIта апхьарта йгIацIалитI. Ауат руыс дрымайрарныс анчва-абачва цри бызшвата урышв бызшва рызгIалырхырныс закIы гьазхIвам. АрыпхьагIвчва ауат йырхIвауа йацыркIитI. Апхьарта арыпхьара программа ззлыху цри бызшвала йызчважвауа асабиква ракIвпI, ауи йзымчважвауа апхьагIвчва йгьрыквыргIапсым. Ауи акIвпIта, ауыс зквула абаза сабиква рызбжа апхьарта йызлапхьауа апрограмма абаза бызшва алшвтырныс ауаштI.
Ари амыз аурала абаза жвлараква агIба йнадзауата йызланакIуа «Апсадгьыл» адкIылара ацкIрала жвлара уысхагIвчва гвыпкI абаза кытква зымгIва йгIарыкIвшатI абаза бызшва арыпхьара ауыс зкву тшахадыргIвазарныс ахъазла. ХIара хIыбызшвалагIвчва хIрынйун, хIрачважвун, асабиква рыхъазла абаза бызшва цри бызшвата агIалхра магIныта йаму гIаргвынхIыргIвуан.
– Апхьартаква рпны абаза бызшва арыпхьара сахIатква зъара йнадзауайа?
– Йапхъахауа акласс апны гIвсахIаткI йнадзитI, уадыргIвана классипхьадза хпа-хпа сахIат. Асоветква рзаман асахIатква рыцIа йщардан – цри бызшви литератури рыхъазла хвсахIаткI гIарнатуан. ХIара щарда ацIыхъва хIтагылан ауи асахIатпхьадзара гIацахIырпахырныс, ареспублика ахъадагьи тшизынахIырхатI. Ари ауыс апны йхIыцыркIтI анахьанат ауагIахъа жвлара адкIылараквагьи, йшпакIву ухIварыквын ауыс Къарча-Черкес йтабзазауа зымгIвагьи йырхьыгIапI. Ага йгвасразтынгьи, хIбжьы заджвгьи йгьйымгIатI. Ауаса амаль гIахIаутI: абаза кытква зымгIва хIгIарыкIвшатI, арыпхьагIвчвагьи, анчва-абачвагьи, апхьартаква рунашвачпагIвчвагьи хIрачважватI. Ауи амщтахь йщаквгылу ахсахIаткI нархъага хIисапта йгIарырцIатI бжьара нхара йазалху асахIатква йрыуата гIвсахIаткI. Ужвы абаза кытква зымгIва рпынгьи абаза бызшви литератури рарыпхьара мчбжьыкI апны хвсахIаткI азалхпI.
Ауи дара апхьартаква рыхъазлагьи йгьмайрамызтI, йшпакIву ухIварыквын арыпхьара программагьи ауацIыхра атахъын, анхашагьи йалархIара атахъын. Ага ймайрамызтынгьи хIагвынгIвытI. Ауаса ауи ъаквшваз абазаква адкIылата йъабзазауа акытква рпны акIвпI. Бызшвала ауагIа ъалапсу акъалаква рпны ауыс рыцIа йбаргвыпI.
– Абаза сабиква йрыуата абызшва здыруа, йзымдыруа рпхьадзара бергьльума? Йзымдыруа рпроцент зъара йнадзауайа?
– Росстат рпхьадзараквала, Россия йтабзазауа абазаква рпроцент 96 цри бызшва рдыритI. Ауаса хIара цIыпх Черкесск апхьартаква хIгIарыкIвшан йджьащахъву аъаща гIахIрыбергьыльтI. Черкесск апхьартаква рпны абаза саби зкьгIви бжакIи раъарагIв апхьитI, ауат йрыуата йызчважвауа процент 35 ракIвпI йнадзауа. Акытква рпны ауыс зквула рхъвыхра гьакIвыршам.
Ауыс тIакIв йагъьхIчIвырныс ахъазла «Алашара» адкIылара апны абаза бызшвала акурсква гIанхIыршатI. Арыпхьаща шадгалу абызшва зымдыруа йрыквыргIапста акIвпI. АъачIвагIагIв ауи гIвыма бызшва арыпхьаща дашIпшуамцара йылрыхIазыртI. ХымызкIла агIвычIвгIвыс дызчважвауа тшибжьитI, йащтагIайуа ахмызкI рпны йдырраква рыцIа йцIолахитI. Адуней апны абаза бызшва рыцIа йбаргвыта йырпхьадзазтIхIва ауи узымырдыруашта йгьаъам. ХIара хIкурсква ауи йаквшахIатпI: ауагIа абаза бызшвала йзымчважвауата йгIайитIта, хвитта йызчважвауа йгIалгитI. ЦIабыргыта, хыщмыщра аларкIвата. Ауаса араъа закIгьи гьузычпушым: абыжьква рхIваща ушхвыцыркIву тшаурыщцара атахъыпI, уандухара абыжьква рызбжа гьузыхIвахуам.
Акурсква асквш 2013 йгIашIарышвта йынхитI, апхьагIвчва ансисквша йгIахIахвитI, сквшыкI апны ауат йгIарылгитI уагIа 60-80-гIв. АпхьагIвчва хгвыпкIта йшапI: асабиква, апхьартаква рапхьагIвчва рныбыжь йтагылу, адуква. ХIара хIпны йынхауа зымгIва йрагъьу арыпхьагIвпI, йхIаракIу акатегория нкъвыргитI, рынцIра шабгу абаза бызшва арыпхьара йартатI: Джыр Гваща, Урунова Любовь, Кълыч ГIайщат, КIьыщмахва ФатIима.
– ЙшухIвазла, асабигIзартаква йгIарылгауа асабиква цри бызшва гьырдырам. АсабигIзартаква рпны аъаща зджьакIквата йпсаххушма?
– ГIвысквша рапхъала асабигIзартаква рпны цри бызшва адынхалра мчбжьыкI апны гIвсахIаткI азалхын. Асабиква цри бызшвала ауысачкIвынква, ашваква ддырдыруан. УадыргIвана ауат асахIатква нырххтI. Ауи ауысла хIара ареспублика ахъада тшизынахIырхан, ауи йхIыцикIтI. АрыпхьагIвчва рдырраква йъарыладырхIауа ареспублика институт хIрыцынхарныс асабигIзартаква абаза бызшва арыпхьарала программи арыпхьаща амальи лырхырныс хачIвы ргылхатI.
«Алашара» адкIылара арыпхьара цхърагIагаква рыдынхалра ахча азалырхтI, Абаза район апрограмма хъатаркIытI. «Алашара» адкIылара асабигIзартаква рдырраква йрылархIара знархараз акурсква ахча рзыртйын, ауат гIвымчбжьа йрыдынхалтI. ЦIыпх йгIашIарышвта абаза кытква рпны апрограммала асабигIзартаква нхауа йалагатI. Акъала апны асаби гвыпква цри бызшвала йкIьыдата йгIанхIыршарныс хIтахъын, ауаса ауи ужвыгьи йгьхIзаквыршвум. Ауи ауыс хIгьакъвымцIстI, анахьанат ауагIахъа жвлара адкIылараква хIрынйумцара асабигIзартаква рпны цри бызшва йшадрыпхьуш амальква хIырзыпшгIуштI.
– ЙхIаракIу апхьартаква рпны абаза бызшва йадрыпхьума? Абаза бызшвала афилологква дрыхIазырума ауниверситетква рпны?
– Ауи апш йхIаракIу апхьартата йхIыму Къарча-Черкес къральыгIва университет акIвпI. Ауи йахъазыпI абаза бызшвала аъачIвагIагIвчва гIацIызщтуа.
Черкесск апны йаныргIалпI наука-рхъвыхра институт, КЧРИПКРО апны абаза бызшва акафедра аъапI. КЧГУ апны йхIаракIу адырраква гIарыквшвузтын, араъа ауат анаука нхара алкIгIараква тшрыхадыргIваза йауаштI.
Абызшва йазарархауа баргвырата йаъу ауи акIвпI, аъачIвагIагIвчва нхарта рымамкIва йгIанхитI, ауи йгIахъшахъыцIуата чкIвынргIа абаза бызшвала йфилологта йапхьарныс
гьыртахъым. УахьчIвала йщаквгылапI ахча согIат сом зыкь 200 йнадзауата абаза бызшва знархару кандидат диссертация зхчауа рыхъазла. КЧГУ астудентква дахIврала йапхьузтын хынла йзлархIу астипендия гIаргитI – сом жвынзыкь.
СынчIва йгIашIарышвта «Алашара» Апсны къральыгIва университет йрыцынхауа йалагатI. СынчIва октябрь мыз абаза бызшвала аъачIвагIагIвчва быжьгIвы йнадзауата ауи ауниверситет аспирантура йыцIалитI. Апхъахьыла ауаъа абаза бызшвадырра акафедра гIахъыртIырныс ргвыгъапI. Ауи акIвпIта, хIара хIфилологква Апсны апны нхарта шрауашла бзигвыгъа аъапI.
швталра йа тшаншвцIара атахъыпI.