АААК аинфорпортал Абаза-апсыуа уагIа ртшауацIыхра ацхърагIара знархару Адуней адкIылара «Алашара» авице-президент Мыхц Рамазан йынйан йачважватI. Ауи адкIылара, ауи ансимш нхара, агрантква, агIаджвыквцIараква йгьи апроектква дрыквчважватI.

Абаза-апсыуа уагIа ртшауацIыхра ацхърагIара знархару Адуней адкIылара «Алашара» авице-президент Мыхц Рамазан АААК драчважвауата адкIылара анхара, агрант анкъвакъвраква, Россия апны зпхьадзара мачIу атачIв уагIахъаква йрылапхьадзу абазаква рхвитнагIаква разабакIра йгьи магIны ду зму анахьанат апроектква йшрыдынхалуа гIайхIватI. Ауи дйынйатI Ардзынба Астанда.

Айчважвара акIвлыршатI Ардзынба Астанда

– Абазаква «Россия Федерация апны зпхьадзара мачIу атачIв уагIахъаква рашIыпхьадзара швъа» йалапI. Ашвъа асквш 2000 агIан йадыргалтI. Ауи акъральыгIва ахъатала абазаква ркультури руагIахъа хцIаракви ргIахчара йазынхума? Ауи ахабза абзазара йшпаларыжьуа?

– Ахабза апкъ йтата зпхьадзара мачIу атачIв уагIахъаква рбзазарта шIыпIа апны цIасла йрыму аъачIвагIаква нкъвыргузтын къральыгIва цхърагIара рзыгIаныршахара атахъыпI. Ауи акIвымкIвагьи, рцри бызшва агIахчара ауыслагьи акъральыгIва гIарыцIагылра атахъыпI. Датшагьи рбзазара зрымайрауа амальква гIаныршахарныс ауаштI арра къвырльыкъвхара анархарала. Ауыс зквула зпхьадзара мачIу атачIв уагIахъаква арра къвырльыкъвхара йапщылазара гьатахъым, налог квпшыраквакIгьи рхъырхра атахъыпI.

– Хабзала йрыбагъьума абазаква арра къвырльыкъвхара борч шырхъыху?

– Момо, ахабза щата багъьа амамкIва йлыхпI. Ахабза аннарахвра амщтахь ауи абзазара йшаларыжьуашла амальква нарахвра, йазалху акъральыгIва щаквыргылраквала йрыбагъьазара атахъыпI. Ауат рапш амаль абазаква йырзынархата йгьнармахвтI. Зпхьадзара мачIу атачIв уагIахъаква ъабзазауа Россия Федерация анахьанат асубъектква рпны – Лагъьшта, Сбыр, МарагIайырта Хъара – ауат рапш къральыгIва амаль нарахвтI. Ауаъа зпхьадзара мачIу атачIв уагIахъаква йырзынарху ахабза нхитI, уагIахъипхьдза ртшауацIыхра знархару апрограммаква лыхпI, ауат афедерал бюджет ахчала абзазара йаларжьитI.

– Ари аъаща тшапсахырныс ахъазла амальта йнахвчIвйа?

– «Алашара» адкIылара йангIанша йгIашIарышвта ари ауыс йадынхалитI. Ахабза абазаквагьи йырзынхара ахъазла йчпара атахъу алхIыргарныс хIащтан. ЙшгIацIцIызла, абазаква Россия Федерация аправительства рашIыпхьадзара швъакI апны йгьанымызтI. Ауыс шаъула, ахабза апны тамамта йгIарбазара атахъыпI «апхъанчIви бзазарта тып», «апхъанчIви ъачIвагIа квпшыраква» йырмагIну. ХIара хIахьыла арат ауысква гьалыргам. Ахабза аквымшвараква гIаншатI: ашвъакI апны абаза уагIахъа зпхьадзара мачIу уагIахъата йгIарбапI, анахьани ашвъа апны йгьгIарбам. Ауи йгIахъшахъыцIуата акъральыгIва программаквагьи ахчала ацхърагIарагьи хIрыламкIва йакIвшитI.

Апхъапхъа хIара Къарча-Черкес Республика аунашвахъцIартаква тшырзынахIырхатI ауыс зкву алдыргарныс. УадыргIвана атачIв депутатквагьи аправительства ауысхагIвчвагьи хIрыцта Россия аправительства, ауагIа уысквала а-Федерал агентство рпны йызнымкIва йыгIгIвытI. Ауралагьи ауыс шалдыргушла джьауап хIызгIайитI, ауаса закIгьи тшгьапсахуам. ХIыжвлара апхъагылагIвчва а-Генерал прокуратура рпынгьи швъа ргIвытI Россия Федерация аправительства йрызтхIаусыхауата, ауаса ауаъагьи ауыс гьымпIатIаутI.

Йара ари апш аъаща йтагылапI зпхьадзара мачIта Европа апны йщтIу Россия ахъвы йтабзазауа датшагьи уагIахъаквакI, ажва ахъазла, анагайбакква, аижорква, ащапсыгъвква. Ужвы хIара жвлара кIьыдата тшадхIкIылта хIхвитнагIаква рыхъазла хIацабакIырныс хIмурадпI.

– «Алашара» адкIылара анхара шадгалу гIахIахIвстI. ЗъарагIвы нхауада, анхара нархарата йамаквайа?

– «Алашара» хIкъраль ашIыпIаквакI рпны йынхитI. Йхъаду ауысхарта Санкт-Петербург апны йаныргIалпI. Ари акъала апны дбзазитI, дынхитI «Алашара» апрезидент, ауи агIаныршагIвы, йхъаду абзихагIв Эгьзакь Мусса ХIабальа йпа. Ажвлара адкIылара гIанымшаскIвагьи Мусса ХIабальа йпа сквшкъомкI рурала Къарча-Черкес йгьи Апсны рпны агвчIагIвчпара уысква йырхъйун, абаза культура, анаука, аспорт ахчала дырцхърагIун.

«Алашара» асквш 2011 агIан йгIаншатI, ауи ауысхарта апхъапхъа Санкт-Петербург апны йгIахъыртIытI. Асквш 2013 агIан Къарча-Черкес, Черкесск апны адкIылара ауысхарта кIьыдата йгIахъыртIытI. Апхъапхъа хIара хвгIвы хIнадзун, йапхъахауа амызква руацIа хIызланхуш апрограмма лыхIхуан, ауагIа ззыбжу, ауат рыхъазла йхIзычпуш гIахIрыбергьыльырныс хIащтан. УадыргIвана ахъвшараква гIанхIыршатI: «Айъазара», «Акультура», «Абаза бызшва», «АтгIачви асабикви», «Аспорт». ГвынгIвырапI хIара акъраль лшарата йрыму аъара шхIымам, ауаса арат анархараквала акъральыгIва нхартаква хIырцхърагIарныс хIылшитI.

РыцIа йпхатшу ауысква йрыуапI ансисквша цIаста йакIвшауа «Абаза хъвмарраква» йгьи Абаза уагIа ркультура амш. Ауи амш Апсны акъральыгIва баракъ амш йаквшвауата июль а 23 атшын йхIыртлапIитI. Ари агвыргъьахъв йгIалалуа ауагIа рыцIа-рыцIа йрылахIитI. Ахъвмарраква йгIарылалитI Апсны, Москва, Къабард-Балкъар, Ставропольшта йрыуу агвыпква, хIапхъа Трыквшти Иордании йыртабзазауа хIабашталагIвчва ргвыпквагьи гIайырныс хIгвыгъитI. СынчIва Абаза культура амш уагIата йалан 2000-гIв райхIа. Абараса Черкесск абзазагIвчвагьи асасчвагьи абаза культура тшахадыргIвазитI – ауагIахъа фачIвква, афашаква, амузыка, ацIасква. Абаза культура зымгIвагьи гIальаматра ду азрымапI.

СынчIва «Алашара» адкIылара ауысхарта Согъвым апынгьи йгIахъыртIытI.

– «Алашара» гIаншищтара проект щарда абзазара ралажьра йацхърагIатI. Ансисквша адкIылара абаза культура агIахчари атшауацIнарыхри знархару агрантква ршитI…

– ЙрыхIтуа йахъазымкIва хIаргьи агрантква шгIатыгIгуш хIащтапI. Ажвлара адкIылараква рыхъазла Путин Владимир йгIанйыршаз апрезидент грантква аъапI. Ауи апш грант гIатыгIгахьатI. ЙаъапI ашIыпIа грантквагьи. Ажва аламкIва, ауат ахчаква сабап злу апроектква радгалра акIвпI йзквхIрыдзуа.

– ДзачIвыйа ауат зшвтуа? ДзачIвыйа йакIвшвыршауа анкъвакъвраква йрылалуа? Йызквшвауа шпагIарылшвхуа?

– ХIара агрантква гIвнархартакIла йрыхIтитI. Йапхъахауата, акультура анхагIвчва, йгIвбахауата, жвлара сабапра злу апроектква рнархарала ажвлара адкIылараква йрыквшвауата.

Акультура анархартала дахIврала абзазара йалажьхаз агрантква ашIыспхьадзапI: абаза кIьанджь театр агIаныршара, Абаза район апны амузыка оркестр агIащаквыргылхра, жвакнигакI раъара ргIацIщтра (уысара, саби локI, абаза тшырхIагIвчва йгIарыквчважвауа акнига, датшагьи), Къарча-Черкес абаза кытква зымгIва апссгIачIв хIагIарала фильм рхъыхра (авидеоальманах «Абазашта»). Датшагьи агрантква рахчала Хъвыжвду кыт апны агIахIвра азыбжьара йгьи ЙынджьыгьчкIвын кыт апны напIлачпара азъазара азыбжьара джвыквылтI.

Ажвлара рыхъазла сабап злата абзазара йалалыз апроектква йрыуапI Гвымлокт апны ахшнахвырта агIахътIра. Агрант акыт абзазагIв-хIаракьатчпагIв йыквшватI, уахьчIвала араъа ауи апш нхара акIвшитI. Ари ауыс нхарта тыпгьи гIаннаршатI, ауагIагьи хъахIара тшыткI рызгIанагитI рыхш ртиуамцара. Акыт аъарагIвшара рыхш ахшнахвырта йддрыхвгIитI. Ауыс ахъа анджвыквырцIуз ауи дахIврала йаквшвушта йазхъазымцIуз щардагIвын. ЙшгIацIцIызла, акврыдзраквагьи дахIврала йгIархъахIахитI.

Агрант ауысла йызтахъу дзачIвызлакIгьи ахIвара швъа йгIвы ауитI. Ауи шадгалра атахъу хIсайт апны йауацIыхта йгIарбапI. ХIуысхарта апынгьи ауи ауысла кьангьашра акIвдыршитI. Араъа йхъаду йгIаджвыквырцIауа ауыс ауагIа рыхъазла сабап алазларныс акIвпI. ХIэкспертква рсовети адкIылара апрезидент Эгьзакь Мусси ахIвара швъаква йрылапшитIта щаквыргылра нарахвитI.

– УахьчIвала йзапш проектйа ауатыкв йту йа абзазара йалажьра атахъыта йыздынхалуа?

– Ужвы хIара абаза кытква рхъадакви атачIв жвлара адкIыларакви хIрыцынхитI асквш 2019 агIан кытипхьадза рпны магIны зму ауысква гIахIрыбергьыльырныс хIащтата. Араъа кытипхьадза йазалху анхара кIьыдата йакIвшитI. Ажва ахъазла, АлбыргIан кыт апны хIапхъа йапхъахауата абаза уагIахъа музей зыгIвназлуш атдзы хIыргылырныс хIмурадпI, ауи амщтахь акыт апхьарта атдзы йыгIвну амузей аэкспонатква зымгIва ауыла йатхIрыпахуаштI. Йара амузей Абаза район йырчIвызлуштI. Датша кыткI сом 100000 гьрызхъум Россия акъральыгIва программа йызлалалуаш ашвъаква адыргалырныс ахъазла, ауи нархарата йамапI акыт апны культура тыдз шIыц ауыхвара. ЙыззысхIваз ахчапхьадзара алахIцIарквын абюджет атланыкъвала ауыхвара йазалырхуаштI сом 9 мильуанкI раъара.

– «Алашара» йгьахъазым ареспублика абаза жвлара адкIылрата йгIаныршу. Анахьанат адкIылараква швшпарыцынхауа?

– Къарча-Черкес апны ашвъа йаныпI абаза жвлара адкIыларата гIважва райхIа, ауаса джьгарта йынхауа жвба ракIвпI. Ауат йрыланакIитI абаза уагIа рахIбачва рсовет, чкIвынргIа радкIылра, апхIвысква рсовет, Апсны зтахъырала айсра йпшцIаз радкIылара, датшагьи. Ауат рыхьызквала йгвынгIвырапI йара уыскI кIьыда-кIьыда хIшаднымхалуа, хIацацхърагIауа хIацынхара акIвмызтын.

Асквш 2016 агIан абаза жвлара адкIылараква тшадыркIылын «Апсадгьыл» жвлара гIандыршатI. ХIалата акъральыгIва уысхартаква хIрыцынхитI, хIуагIахъа йырзынарху ауысква ацхIырхъйитI.

– Рамазан, Абаза уагIа фонд анхара угIаквчважвастI: щарда цIума йгIаншищтара, ауи ахча нархарата йамайа?

– Афонд ахьызла йгIаншищтара сквшквакI цIитI, ауаса сынчIва акIвпI ахъата анщаквгыл. Ауи абюджет апны ахча гIаншауа йалагатI. Акытква, акъалаква йыртабзазауа дара абазаква йазыркIкIитI, дара-дара ахча зквдрыдзуаш ауыс гIадрыбергьльитI: аурамква рырчIаджьра акIвызтынгьи, анышвтараква ркIвыршара акIвызтынгьи, датшазтынгьи.

Афонд ахчата йгIаталуа ансимшы интернет амальквала йгIахIырбитI. Ахчаква нархарата йрымула йшгIарысабапхуш йырхъвыхитI Эгьзакь Мусса ХIабальа йпа. УахьчIвала ауи йапшта абазаква йыззхъарцIуш датша гIвычIвгIвыс дгьаъам. СквшбжакIла ахчата афонд йгIаталыз апхьадзара сом 500000 йаъарапI.

Ари апроект амагIны швабыж йдупI. ХIынхара апхъала йназрыскIьаз уыспI. Абаза уагIа ргIахчари ртшауацIыхри знархару анхара гIвычIвгIвыс заджвыкI йкъарула йщаквгылазла гьауашым, абазаква дзачIвызлакIгьи ари ауыс йхатI алайцIара атахъыпI. АуагIахъа фонд ахча алацIара цIаста йщаквгылра атахъыпI. Ауи архъйара майрапI – Сбербанк йгIаннаршауа амальква гIахIрысабапырквын.