Декабрь а 22 атшын Согъвым апны йгIахъыртIытI ансисквша агъны йакIвдыршауа Арт-маркет, араъа рынхараква гIадырбитI уагIа 75-гIв.
Барганджиа Саид
Асквш шIыц йадахIвуата йадгалу йхвбахауа Арт-маркет Согъвым апны асабша декабрь а 22 атшын йгIахъыртIытI.
ЦIаста йщаквгылхьу агIарбарта-джьармыкIьа апны аъачIвагIагIвчва дара-дара йдрыхIазыруа йапшым апкъыгIваква ртйитI, ауи асасчва Гудаута апны йырчпауа ачача агьама дырхъвых йауитI, глинтвейн рыжвта йапшырныс йхвитпI, йапшым ахъгIараква щарда рызгIалхитI.
АгIарбарта адгалагIв Ирисова-Багапш Ксения АААК ахабарргарта йшгIаралхIвызла, сынчIва аюбилей Арт-маркет анхара йгIалалтI ъачIвагIагIв 75- гIв раъара. Ауи йгIалгвалашвахтI апхъала ауыс зквыз: йапхъахуз Арт-маркет апны зынхараква гIазырбаз аъачIвагIагIвчва 18-гIв рахIа гьнамдзузтI, ауи асхъан баргвын ауат агIарбарта йшгIалалуаш йаквуыргвышхварныс. Ауи акIвпIта, Арт- маркет анхара уыла йгIацIалуата тшауацIнахтI.
Ирисова Багапш йшгIалылкIгIазла, Согъвым апны уахьчIвала анапIлачпара азъазара йанархарата ансисквша йакIвшауа ари Арт-маркет заджвыкI акIвпI. ЙхIвара атахъыпI
агIарбарта амщтахь ъачIвагIагIвчва щардагIв шхIаракьатчпагIвхауа.
«Ари агIарбарта зынхара гIаджвыквызцIагIвацауа ахIаракьатчпагIвчва йырзалхпI, ауат араъа ртичIв пкъыгIваква шпшцIыцIуа дырхъвыхырныс амаль рзыгIаншитI», – лхIвитI агIарбарта адгалагIв.
Арт-маркет зынхара гIаджвыквызцIагIвацауа ахIаракьатчпагIвчва йшырзалху дадгылитI аджьармыкIьа анхара йалу Адлейба Ирмагьи.
«Арт-маркет анхара хвысквша цIитIта сгIалалитI, ахIвсса рыхъазла арыпшдзагаква счпитI, ауат рщарда хIуагIахъа хцIара рымапI. Арт-маркет апны амаль гIаншитI уагIа щардагIв унапIыла йучпауа апкъыгIваква дуырбарныс», – лхIватI аъачIвагIагIв ъаза.
Ансисквша аджьармыкIьа йгIадгылитI сасчва щардагIв: араъа агвыргъьарамшква йрыквыргIапсу асогIаква хвгIа йауитI, унашхгьи щтIыцIитI. АгIарбарта асас Бебия Анжела ансисквша аджьармыкIьа дызгIайлауа амадзагьи хIзыгIахъылтIтI.
«Арт-маркет ршIыйарали гвышхварали йырчвыпI. Зъазара гIазырбарныс зтахъу аршIыйагIвчва араъа лшара бзидздза рзыгIаншитI. Ауи акIвымкIвагьи, араъа йанакIвызлакIгьи уаргванква рыхъазла согIа уызгIалхитI», – лхIватI ауи.
ЙшцIасхаз апшта, апкъыгIваква рпшцIыщтра хъахIарата йгIанагуа ахча абгата
цхърагIара йазыбжу асабитгIачваква йырзалхпI. СынчIва Асквш шIыц йадахIвуата йадгалу Арт-маркет гIвымшкI йынхуштI – декабрь а 22 йгьи декабрь а 23 руацIа.
швталра йа тшаншвцIара атахъыпI.