Хвитра абакIра аклуб «Абаза» аунашвачпагIв Боджгуа Леонид АААК ахабарргарта портал интервью гIаритуата «Абаза» клуб адахIвраква, йагъьу аспортсмен шIаква йгьи акъраль апны йхъаду анкъвакъвраква дрыквчважватI.
Айчважвара Барганджия Саид йакIвйыршатI
- Клуб гIануыршарныс угвы йшпагIанаг? ЙанбакIву аклуб анхара анджвыквыл? Ауи анхара шпаджвыквуцIа?
- Сара Санкт-Петербург стабзазун, ауаъа «Олимпиони» ахьызта спорт клуб сыман. Ауи атлахан Эгьзакь Мусси сари хIабадыруищтара сквшы 30 райхIа цIуан. ЙызнымкIва хIалачважвун Апсны апны хвитра абакIра аклуб агIахътIра. Йара Мусса ХIабальа йпа хвитра абакIра бзибара ду азйымапI, хвитра абакIрала СССР аспорт дамастерпI йгьи апхъала йызнымкIва Ленинград дачемпионхатI. Апсны апны сбзазарныс сангIайх аклуб ауысла апхъала хIызлачважвуз абзазара йалагIжьырныс хIылшатI.
Абараса цысквша рапхъала хвитра абакIра аклуб «Абаза» гIахъхIтIытI. Эгьзакь Мусса дгIахIцхърагIан сом 15 мильуанкI рыквшвауата йатахъыз аъамапсымаква зымгIва хIхвгIатI. Ауи уыжвгьи дгIахIцхърагIитI. Ауи йакIвымзарквын закIгьи гьхIзымчпушызтI. МзигIадзапхьадза абжьагIвчва рынхаша сом зыкь 500 йнадзауата йгIахIититI. ХIспортсменква адуней анкъвакъвраква рпны йанхIщтиуагьи дгIахIцхърагIитI, хIыззыбжу аъамапсымаквала хIадигалитI.
- Аклуб гIахъшвтIищтара хвитра абакIра тшазызбжьуз асабиква зъарагIвы йнадзушйа? УахьчIвала араъа йгIайуа асабиква зъарагIвы йнадзауайа? Йырныбыжьйа?
- «Абаза» гIаншищтара цысквша руацIа йгIайуаз асабиква рпхьадзара ухIварныс швабыж йбаргвыпI. ГIвба-хпа мзы ахIа йгIамиуата йкIазрышвхыз асабиква швабыж йщардагIвыпI, йаъапI абакIра збзазара йахъв хъадахаз ачкIвынчвагьи. «Абаза» клуб апны тшызбжьауа асабиква ареспублика арайонква зымгIва йгIартыцIитIта йгIайитI. УахьчIвала ауат саби 840-гIв йнадзитI, рныбыжьла 5 сквша йгIашIарышвта 16 сквшадза йыртапI. ХIара йыцIхIщтхкваз рыуа щардагIвы Россия апны хвитра абакIра ауысла йагъьу апхьартаква йрыцIата йапхьитI.
- АбжьагIвчва йырмагIныйа? Ауат Апсны афутбол афедерация апны йгIадзынгылма момкIва аклуб апны йгIадзынгылкваз йрыуума?
- «Абаза» клуб апны уахьчIвала бжьагIвыта 36-гIв нхитI. Ауат рызджьакI хIспорт клуб апны йгIадзынгылтI, йрылапI аспорт апны гIатгара зму анхагIвчвагьи – Апсны Республикала йахъазымкIва Россия Федерациялагьи. Ауат руыс йазгIашыкъпI, ргвы азыцхIитI, баргвырата йзынйалакIгьи амальта йрыму зымгIва гIадрысабапитIта асабиква адуней анкъвакъвраква йрылалырныс йгьи йазалху аспорт тшыбжьараква рзадыргалырныс ахъазла ахча гIарауитI.
- «Абаза» клуб анкъвакъврата йакIвдыршауайа? Апсны апны, агIвымакъральква рпны ауат рунашва бергьльума? ЙгIарылалырныс зквнагауа дзачIвыйа?
- «Абаза» клуби Апсны ахвитра абакIра афедерации хIаларпата хIацынхитI. Ажва ахъазла, сара Апсны ахвитра абакIра афедерация апны свице-президентпI. «Абаза» клуб хIара хIкъарула ансисквша анкъвакъвракI акIвхIыршитI - Эгьзакь Мусса йыхьызла. ЙагIвсыз асквшква рурала ауи агIвымакъраль спортсменквагьи гIалалуан, сынчIва ауи ареспубликагIваца акIвпI йгIацIанакIуаз. Анкъвакъвра бергьльыпI, анадзара хIагIата йадыгIгаллитI. Апсны апны хвитра абакIра афедерация 16 анкъвакъвракI акIвдыршитI – республика анкъвакъвразтынгьи дуней анкъвакъвразтынгьи. «Абаза» клуб йанакIвызлакIгьи ауат радгалра йгьи ракIвыршара йацхърагIитI. Арат анкъвакъвраква щардагIв гIарылалитI, ауат рбзирала рыцIа йагъьу аспортсменква, ауат рквтала рыцIа йымчхъакву гIахIрыбергьльитI.
- ДзачIвыйа «Абаза» клуб апны йгIадзынгылуа аспортсменква йрыуата рыцIа йбергьльу, згIатгараква дуу?
- Аклуб апны талант зму асабиква щардагIвыпI, ауаса згIатгараквала йбергьльу срыквчважвапI. Кетия Инал – Россия, Европа йгьи адуней анкъвакъвраква рпны дапхъагылагIвхатI. Ужвы ауи Россия Федерация йадыркIылыз агвып дрылапI. Ампар Рустам – адуней чемпионат апны рызна ртшхъвага гIатигатI, дуней класс нкъвызгауа дспорт мастерпI. Джугелия Осман талант ду зму дабакIгIвыпI, уахьчIвала ауи Россия ргвып дрылата дабакIитI. Датшагьи рыхьызква гIалкIгIа йауаштI Бения Астамур, Гумба Астамур йгьи Гварамия Асланбек. Зынла йсхIвапI Асланбек щарда мцIуата Россия апны чкIвынргIа рквтала йакIвшуз анкъвакъвра дшачемпионхаз. ЙатасхIвахитI, швабыж талант ду зму, йбагъьу, змурад йазынарху абакIыгIвчва хIщардапI. Апсны ргвып адуней чемпионат йа Олимпия хъвмарраква йхIызрылажьзарквын кьангьаш аламкIва адунейла ймчхъадзу абакIыгIвчва рквтала апхъа йгылу ахвыгIв хIрыуазлушын.
- АбжьагIвчва щардагIвы йшырпхьадзауала, аспортсмен йылшараква тшауацIырхра ахъазла йапымшвтуата адуней анкъвакъвраква дрылалра атахъыпI. Аклуб аспортсменква агIвымакъраль анкъвакъвраква щардала йрылалырныс рылшума? ДзачIвыйа ауи ауысла йырцхърагIауа?
- Ауи ауысла хIара баргвыра щарда хIрынйитI. ХIара-хIара анкъвакъвра 30-40 акIвхIыршарыгьи хIызщту агIарбараква гьгIахIдахIвуашым. ДзачIв спортсменызлакIгьи, спорт квпшырата дыздкIылазлакIгьи, адуней анкъвакъвраква дрылалра, йацкIыз зъазара хIагIу, йымчхъу аспортсменква дранкъвакъвра атахъыпI. ХIспортсменква агIвымакъраль анкъвакъвраква рпны йгалара атахъыпI. Анкъвакъвра айрышта йанакIвшауа асхъан акIвпI агIарбараква анагъьхауа. ЙгIаншитI ахча хIджьып йгIатыхIхта аспортсменква анхIщтиуа – анкъвакъвраква рпынгьи йазалху аспорт тшыбжьараква рпынгьи. Ари ауыс апынгьи Эгьзакь Мусса йцхърагIара шIырпшыра амамкIва амагIны дупI. АбжьагIвчвагьи дара-дара цхърагIара йазыпшгIалитI – арайон уысхартаква, атачIв хIаракьатчпагIвчва тшырзынадырхумцара. СынчIва Апсны апны йадыгIгалырныс хIгвыгъьапI йазалху аспорт тшыбжьараква. Ауаъа йгIадгылуаштI ареспублика арайонква зымгIва йрыуу аспортсмен дуква.
- Апсны апны хвитра абакIра атшауацIнарыхра ауысла аклуб баргвырата йзынйауа ачIвыйа?
- ЗымгIва рацкIыс йхъаду абаргвыра гIанзыршауа спорт апхьарта ду ъахIымам акIвпI. Ауи ашвхIаусыгIвала знадзара хIаракIу анкъвакъвраква гьхIзадгалуам. Швабыж хIазыбжапI уагIа гIвынзыкьыгIвкI раъара зыгIвнашвауа спорт комплекс зунашва схIваз анкъвакъвра дуква акIвхIыршарныс амаль шхIымазлуш апшта. Датшагьи сара хIправительства йрасхIвтI Ауадхар апны (Апсны ащхъа курорт, аъазагIва дзыхьква ъагIацIцIуа – аредакция ррытаразга) спорт тшыбжьарта квта гIахътIы йшауаш. Ауи зымгIва затахъу хIспорт ахIагIара шIыцква йрызцауата тшщтIнахырныс ахъазла акIвпI. Абаргвыраква шмачIымгьи Апсны апны талант зму асабиква щардагIвыпI, хвитра абакIра йадкIылу йырхъазымкIва анахьанат аспорт квпшыраква йрыдкIылугьи. Ауи ахIатырла йхъаду борчта хIыхъвда йыквпI хIамайчуата, хIкъару шабгу ауат рталант атшауацIнарыхра йалахIцIарныс.
швталра йа тшаншвцIара атахъыпI.