Санкт-Петербург апны агIвгIвы ду Аскьындар Фазиль йюбилей йадахIвуата йадыргалыз алитература хъвлапны акIвшатI.
Барганджиа Саид
ЙагIвсыз атшпсщара мшква рагIан Санкт-Петербург апны йакIвшатI агIвгIвы ду Аскьындар Фазиль йысквш 90 йазынархаз ачвахъабага литература хъвлапны. Ахъвлапын адыргалтI АААК Санкт-Петербург ашIыпIа хъвшара апны джьгарта йынхауа чкIвынргIа.
А-Конгресс ашIыпIа хъвшара аунашвачпагIв Реквава Темур АААК ахабарргарта портал йшгIарайхIвызла, Санкт-Петербург апны ауи апш литература хъвлапны йапхъахауата йакIвдыршатI.
«ЙалкIгIата йхIгвапахатI хIабашталагIв, зымгIвагьи бзи йыгIбуз Аскьындар Фазиль йчвахъабага хъвлапны акIвыршара чкIвынргIа йъагIаджвыквырцIаз. Ари ахъвлапын йадыгIгалыз айззараква рквтала йхпахитI, швабыж сгвы йалахIитI ауат радгалра уысква чкIвынргIа джьгарта йъагIарылалуа ахъазла», – йгIаликIгIатI ауи.
Реквава датшагьи йшгIаликIгIазла, ахъвлапын йахъвхъадаз Аскьындар Фазиль йыршIыйара акIвын.
«ХIара Фазиль Абдул йпа йгIвыраква хIъадзарыпхьауа, йъадзахIхIвахуа ауи йыршIыйара йанакIвызлакIгьи абзазара йалазлуштI. Ауи асхъан йгIайуа абанпараквагьи йажва йшIымчIвауата йхIызрытуаштI», – йхIватI ауи.
Алитература хъвлапны АААК ЙхIаракIу асовет аунашвачпагIв Эгьзакь Мусса йтшазынархарала йгIахъыртIытI.
«Аскьындар Фазиль Апсны ашва азызхIвауа гIвгIвыта йхъа йпхьадзун, йалкIгIата араъа акIвпI (Апсны апны – аредакция ррытаразга) ауи йфырква ъауу, йбергьыльхаз Сандро йакIвызтынгьи йа ачкIвын Чыкь йакIвызтынгьи. Араъа акIвпI рыцIа йбергьльу Фазиль Абдул йпа йгIвыраква гIазквчважвауа ъагIаншауа», – араса йхIвитI ауи йтшазынархара апны.
Эгьзакь Мусса йшгIаликIгIазла, акультури шIырпшыра змам ацIас пшдзакви ргIахчара акIвын Аскьындар Фазиль йгIвыраква рпны йазалхта гватра ззйымаз. Датшагьи ауи йшихIвазла, абари йапшу ахъвлапынква ракIвыршара магIны ду амапI.
«ЙбзипI Санкт-Петербург апны йатаркIвах апсыуа-абаза диаспора абараса йъайззауа. Щардала йхIхIвалун арат йрапшу анйараква ракIвыршара цIас пшдзата йшщаквгылуаш. Багъьата хIгвы йтазара атахъыпI абазакви апсыуакви шуагIахъакIу йгьи хIазакIыта апсыуа-абаза этнос ауачIв бзазара шгIанхIыршауа», – йхIватI ауи.
АААК ЙхIаракIу асовет ауысхарта аунашвачпагIв Таниа Кан йшгIаликIгIазла, а-Конгрес ахачIв хъадаква йрыуазакIыпI апсыуакви абазакви рэтнокультура ацзакIыра.
«ЙахьчIва ахъвлапын нахвата йгIанарбатI хIанйалара, хIабабара магIны ду шрыму. Ахъвлапын апны Аскьындар Фазиль йгIвыраква йгьырхъазым йгIазпхьаз, Абазашта ауагIа уысагIвчва ЧквтIу Микаэльи Мыхц Кьарими руысаквагьи йгIарыпхьатI. Апсыуаква рызджьакI йапхъахауата йыргIатI ауат. Ауи акIвпI чкIвынргIа рыхъазла арат айззараква магIны ду зрыму, йалкIгIата, йабадырныс, йабабарныс ахъазла», – йхIватI ауи.
Алитература хъвлапны далан ажурналист, азъазарадырыгIв, агIвгIвы Аджинджал Боча. Ауи йшипхьадзауала, ахъвлапын дахIвра дула йакIвшатI.
«ХIара уахьчIва йхIыртлапIатI Аскьындар Фазиль йысквш 90 аюбилей. Ахъвлапын дахIврала йакIвшатI. АуагIа йыргвапхатI. Ауи акIвпIта, арат йрапшу анйараква запыт йадгаллара атахъыпI», – йхIватI Боча.
Ахъвлапын апрограмма йаланакIуата АААК ашIыпIа хъвшара концерт адыргалтI: чкIвынргIа йгIарыпхьатI Аскьындар Фазиль йуысаква йгьи йгIахIвахраква ршIчIвараква, апсыуа йгьи абаза ашваква рхIватI, ауагIахъа гIахIвраква гIадырбатI.
Аскьындар Фазиль сквшы 88 йныбыжьта асквш 2016 июль а 31 атшын абзазара далцIтI. Ртшхъвага щарда йрынкъвгагIвыз агIвгIвы ду йпсра йузыгIащаквмыргылхуаш лдзгIара дута йырзалтI адуней литература жвлара шабгу. Ауи йгIвыраква бызшва щардала йатаркIхьатI йгьи адуней литература тынха азкIкIра хьапщ йалалтI.
швталра йа тшаншвцIара атахъыпI.