Барганджиа Саид

АААК йгьи «Алашара» адкIылара йгIаларгаз анкъвакъвра «Этноарт: йазакIу, йузагIвымшуш» май а 15 йджвыквлитI. Ауи Согъвым, Воронов йурам йхвынгылу тдзыкI квадрат метр 270 йнадзауа афасад бльын граффити техникала йанырцIуш асурат ду эскизта йазалуаш йагъьу асурат агIалхра знархару анкъвакъврапI. Асурат темата йамапI – ЙазакIу йгьи йузагIвымшуш апсуа-абаза уагIахъа.

Апроект йахъпшылуа Санкт-Петербург апны йгIаныршу АААК ашIыпIа хъвшара аунашвачпагIв Реквава Темур анкъвакъвра мурад хъадата йаму гIайхIватI: апсуа-абаза уагIахъа рэтнокультура ацзакIыра рыбагъьара йгьи Апсны акъала хъада аквпшыра агъьчIвра ауыс агIвычIвгIвыс гврыхваква ргIадкIылра. Ауи Анкъвакъвра ауысла аъаща йгIанахIвауа алкIгIараквакIгьи хIрыхайыргIвазатI.

«Май а 15 йгIашIарышвта анхараква анкъвакъвра йазыгIащти йауаштI. Ауи дзачIвызлакIгьи – сквшыта дызтазлакIгьи, къральта дъабзазалакIгьи – дгIалалырныс дахвитпI. Асурат-эскизква швыга зигIвата, техниката йызлачпазлакIгьи ауитI. Асуратква зымгIва йызчпаз ртдзахьызква, рыхьызква, рныбыжь, ртелефон, йъабзазауа рыквыгIвзара атахъыпI», – йхIватI Реквава Темур.

Июль а 16 йгIашIарышвта июль а 23-дза адгалра комитет онлайн-напIщтIыхра йалажь йауаш асуратква гIалырхуаштI. Июль а 27 асахIат а 10 йгIашIарышвта август а 5 асахIат а 10-дза Адуней апсуа-абаза конгресс асайт (www.abaza.org) апны онлайн-напIщтIыхра акIвшуштI.

Аконгресс апортал апны апычIв напIщтIыхра шакIвшауа гIарбазлуштI. РыцIа щардагIвы напIы ззыщтIырхуа йакIвпI анкъвакъвра апны йайгIайуаш. Ауи йыхьыз август а 8 атшын йгIархIвуштI. АйгIайыгIв сертификати асогIа хъади йыртуаштI: гвацчпа суратгIврали граффитили Россия апны йагъьу акомпанияква йрыуа закIу «Дари добро» («Бзира ха») аъачIвагIагIвчва ауи йэскиз Согъвым апны зганли зхIагIарали йгIауахвырквым квадрат метр 270 йнадзауа афасад бльын граффити квпшыра амата йакврыгIвуаштI.

ЙхIазыру асуратква Согъвым, Лакоба йурам, 109 атдзы адресла (Апсны Республика аналогквали ашвачIвквали а-Министерства атдзы – аредакция ррытаразга) ансимшы асахIат а 10 йгIашIарышвта а 18-дза а-Конгресс ауысхарта йрыт йауаштI, йа рнадзара бзита ари электрон адресла йгIащти йауаштI: info.abk@abaza.org. Анхараква сынчIва июль а 15 асахIат а 00:00-дза йнарахвитI.

АдгалагIвчва йшырхIвауала, анкъвакъвра дахIвра амата йакIвшузтын ауи «йгIвбахауа псып айауаштI», датшата йухIвушызтын, ауи апш нархарала нхара ужвыгьи йакIвшуштI.

Анкъвакъвра ахабар рыцIа йауацIыхта швапхьарныс йгьи ауи ауысла Аъаща тшахашвыргIвазарныс швылшуштI араъа.