Апсны акъала хъада апны Согъвым апщмузейкI злаз акция «Амузей ауахъ» акIвшатI.

Барганджиа Саид

Амузейква рдуней мшы май а 18 атшын Согъвым апны акция «Амузей ауахъ» акIвшатI. СынчIва апшыгIвчва рыхъазла пщмузейкI рышвква гIартIытI – Апсны акъральыгIва музей, Гулиа Дмитрий йыхьыз зхъу алитература-мемориал музей, Апсны Йапхъахауа а-Президент Ардзынба Владислав йыхьыз зхъу Айсра ЧIахIра амузей йгьи Бейгуаа Омар йыхьыз зхъу АгIвымакъраль апсуаква ртурых амузей.

«Амузей ауахъ» - ауагIа уахъынла амузей экспонатква йырпшырныс амаль гIарызтуа дуней акцияпI. Ари ауахъ адуней амузейква хвыдъа ауагIа рнашылитI амара анташвара йгIашIарышвта йшандзыкIьара. Апсны апны акция йалаз амузейква цIыхквтадза йынхатI.

Апсны акультура йгьи атурых-культура тынха агIахчара рминистр Арсалиа Эльвира йшгIалылкIгIазла, акция мурадта йаман ауагIа ргватра рзалырхырныс амузейква рынхара, атурых хъмаштылра йгьи чкIвынргIа анцIрала хвы зму акультура байара тшахадыргIвазарныс.

«Амузей ауахъ» анакIвшауа уагIа щарда айззитI. Апсны амузейква ари ауахъ датша зны йубарныс ймайрам аэкспонат джьащахъваква аздрыхIазыртI. «Швабыж хIайгвыргъьатI ари ауахъ амузейква рпны ауагIа щардагIвыта йъагIайыз, йалкIгIата, асабиква», – лхIвитI Арсалиа Эльвира.

Акция ахъа джвыквызцIаз Ардзынба Владислав йыхьыз зхъу Айсра ЧIахIра амузей акIвпI. Ауаъа Апсны Абджьар къаруква ркъвырльыкъвхартаква: атыл, абджьари атехники, апшыхвра – йырзынархаз аэкспозиция шIыцква адыргалтI. Апсны атурых адыррала, гIахIврала, апсуа бызшвала уыса апхьарала анкъвакъвраква акIвшатI. Анкъвакъвраква рпны бзидздзата тшгIазырбакваз Апсны атурых йгIаквчважвауа акнигакви ачвахъабага согIакви рырттI.

«Швабыж йджьащахъван, ухъызхуа щардан. ХIара асабиква хIыцын. ЙгIахIвытI, ашва рхIватI. Йхъаду ари акIвпI – хIсабиква экспонат джьащахъва щарда рбатI», – лхIватI Согъвым абзазагIв Авидзба Мадина.

Акция «Амузей ауахъ» асасчва йрылшатI Гулиа Дмитрий йыхьыз зхъу алитература-мемориал музейгьи йапшырныс. Ари апсуа литература апатриарх йтдзы-музей йалкIгIата гIальаматра азырбитI апхьагIвчва.

«Апхьарта апны хIара Гулиа Дмитрий йгIвыраква хIрыпхьитI, йынхара-бзазара хIхIырдыритI. Швабыж йхIымагIальаматта йтдзы хIапшытI. Акция «Амузей ауахъ» швабыж бзита йгIархъвыцтI, апхъала ауи аунашва ателебара гIатрагIвацаква ракIвын йызлаздыруаз», – йхIватI Согъвым абзазагIв, апхьагIв Барцыц Алан.

Ари амузей апшыгIвчва рыхъазлагьи программа джьащахъва адгалан: йбергьльу апсуа уысагIв Чаниа Терентий йгьи апсуа уысагIв шIаква злаз анйара, Апсны къральыгIва университет ажурналистика афакультет астудентква ргIахъвмарра, аъамапсыма ансамбль «Гвында» агIахъвмарра.

Йдучвамыз аконцерт программа далан Дранда аквтанай апхьарта апхьагIв, амузей йапхъахауата йызбаз Чамлар Алан.

«Сара араъа йапхъахауата сгIайтI. Швабыж йсгвапхатI. Апсны йгьи айгIайра рыхъазла ашва схIватI. Ужвыгьи сатагIайхырныс стахъыпI», – йхIватI Алан.

«Амузей ауахъ» акция хъатакIла йгьачвымгылтI Апсны акъральыгIва музейгьи. Ауи анхагIвчва атема «Рица гвал» знархараз агIарбарта адыргалтI, Джьантыхв нышвынтара (Аалдзга дзыгIв апсыхIва Ткъварчал къала йаланакIуа Акармара кыт ашIыпIаква Джьантыхв ахва апны йаъу анышвынтара, ауи йкIьасу аджьаз гIамта йгьи йпасу айха сквшышв ртлахан йгIаншатI – аредакция ррытаразга) апны йгIарауыз апкъыгIваква гIадырбатI, ХIХ асквшышв йгьи ХХ асквшышв агIаталымта йгIарыцIанакIуа Апсны атурых атемала экспозиция адыргалтI.

Апсны апны акция «Амузей ауахъ» асквш 2015 йгIашIарышвта йакIвдыршитI, ансисквша ауи ауагIа рпны рыцIа-рыцIа йбергьыльхитI. Йапхъахауата акция «Амузей ауахъ» асквш 1999 агIан Франция апны йакIвшатI. Ауищтара ауи акция ансисквша акъраль шIыцква алалуамцара тшауацIнахитI.