АААК ащтийыгIвчва гвып Москва апны йакIвшаз апсуа культура йгIвбахауа афестиваль «Апсны» йалан.
Барганджиа Саид
Адуней апсуа-абаза конгресс Москва апны йгIванхауата йалан амтшаша, июнь а 30 атшын йакIвшаз йхътIу апсуа культура афестиваль «Апсны».
Акъала хъада апарк «Пресня Къапщы» апны йакIвшуз афестиваль асасчва рыхъазла а-Конгресс апавильон нхун. Араъа йызтахъу дзачIвызлакIгьи АААК далалырныс амаль йыман. Ари атшын АААК йалакву 50-гIвы райхIа гIарылахIатI.
АААК ЙхIаракIу асовет аунашвачпагIв йуысхарта унашва ахъызцIауа Таниа Кан йшипхьадзауала, афестиваль «апсуа-абаза диаспора рквтала йхъаду акультура-арыпхьара гIаншараква йрыуазакIыпI». А-Конгресс аунашвачпагIвчва ари йапшу агIаншараква магIны ду рзырбитI.
«Афестиваль йапшу агIаджвыквцIараква рпны асасчва апсуа-абаза уагIахъа рапхъанчIви турых, ркультура абайара йгьи рцIас пшдзаква тшрыхадыргIвазитI, ауи ахIатырла а-Конгресс афестиваль джьгарта йалалтI», - йхIватI Таниа.
Ауи швабыж дшырзыразу йхIватI афестиваль адгалагIвчва – зымгIва драпхъата Москва йту апсуа диаспора аунашвачпагIв, АААК ЙхIаракIу асовет йалу Агрба Беслан. Апавильон анхара адгалагIв, АААК апхIвысква рсоветква рунашвачпагIв Ардзынба Гета йшгIалылкIгIазла, цIыпх йгIаквухырквын сынчIва афестиваль асасчва рыцIа йщардагIвын (апычIв гIарбараквала йгIауахвырквын афестиваль уагIата жванзыкьыгIв райхIа гIадгылтI, цIыпх ауат рпхьадзара агIынзыкьыгIв акIвын йнадзуз – аредакция ррытаразга).
«ХIара хIыхъазла (АААК ащтийыгIвчва гвып – аредакция ррытаразга) магIны ду амата йхIпхьадзитI хIстенд адзхъа «Абаза пшцIа» астендгьи ъадгалаз. ХIара хIадкIылата тшгIахIырбатI, апсуакви абазакви йшуагIахъакIу хIрыбагъьатI. ЙалкIгIата йахьчIва ауи нахвата йубун. ЦIыпх йгIаквхта сынчIва рыцIа йщардагIвын а-Конгресс йалалыз абазаква рпхьадзарагьи», - лхIватI Ардзынба.
А-Конгресс апхIвысква рсоветква рунашвачпагIв йшылпхьадзауала, АААК астенд «йалшатI апсуаква джькIахбастала асасчва шнардасуа афестиваль асасчва йднарбарныс».
«ЙхIылшатI араъа шIырпшыра змам азазаъаща щаквхIыргылырныс. Апавильон асасчва зымгIвагьи йгIаргвынхIыргIвуан АААК амурадкви ахачIвкви, апсуаква ртурыхи рбзазащи рдыррала анкъвакъвра джьащахъва акIвхIыршатI. ЩардагIвы йхIыцыркIуата апсуа ашваквагьи ацыхIхIвун», - лхIватI Ардзынба Гета.
АААК аэкспозиция аквта йтан а-Конгресс шгIаншаз, ауи сквшы 25 руацIа нхарата йакIвнаршаз йгIарыквчважвауа акнига апрезентация. А-Конгресс астенд апны йапхъахауата йгIарбан апшыгIвчва гIальаматра ду ззырбаз апсуа-абаза уагIахъа ъабзазауа ашIыпIаква ркарта. Датшагьи АААК апавильон афестиваль асасчва аргвыргъьатI Апсны йгIатыргата йгIаргыз арызкъ зигIваквала.
«Апавильон аквта айшва ду йхвынгылан апсуа йгьи абаза рызкъква. Айшва ауагIахъа цIасква гIанарбауата йадгалан. Афестиваль асасчва айшва йыквыз афачIвква хвыдъа йыршIадыршватI», - йгIацылцIахтI АААК апхIвысква рсоветква рунашвачпагIв.
Апавильон анхара йаланакIуата анкъвакъвра акIвшатI, ауи агIарбараквала йазалхта Апсуа йгIатыргата йгIаргыз апсуа фачIвква зтаз акIлатква согIата йырквнадыргатI апхъагылагIвчва Шитина Ирини Кротова Екатерини.
Ардзынба Гета йгIалылкIгIатI агвыргъьахъв пхарала, гвапарала йшырчвыз.
«Йабамдыруаз ауагIа сальам абархуан, тшакIвдыршун. ЙгIаншун хIара зымгIвагьи хIатгIачвакIта тшаныгIбузгьи», - лхIватI апхIвысква рсоветква рунашвачпагIв.
АААК ахьызла ауи кIьыдата швабыж дшырзыразу лхIватI зтахъырала астенд арыхIазырра йацхърагIаз, «ахъвлапын ацIыхъвадза ауи йадзхъагылаз чкIвынргIа».
Апсуа культура афестиваль ду Москва апны йгIванхауата йакIвшатI. Асквш 2018 агIан ауи Апсны айгIайри ахъахвитри рысквш 25 йазынархата сентябрь а 30 атшын йакIвшатI. Ауи агIан АААК афестиваль йъалаз йагIарбагата а-Конгресс йалалтI уагIа 20-гIвы райхIа.
швталра йа тшаншвцIара атахъыпI.