АААК аунашвачпагIв Эгьзакь Мусса йкубок ахьызла йакIвшуш хвитра абакIрала атурнир йалалырныс ахъазла Апсны йгIайтI Россия йапшым аштаква йгIартыцIыз абакIыгIвчва.
Барганджиа Саид
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йкубок ахьызла йакIвшуш хвитра абакIрала атурнир йалазлуш аспортсменква Апсны йгIайтI. Атурнир акультура-спорт фестиваль «Абаза» апрограмма йалата октябрь а 16 атшын йгIахъыртIуаштI.
Хвитра абакIрала аклуб «Абаза» архъйагIв директор Боджгуа Леонид йшихIвазла, сынчIва атурнир йалазлуштI Москва, Санкт-Петербург, Ростов, Краснодар, Калининград, Сочи, Къарча-Черкес, Къабард-Балкъар, Лагъь Осетия, ГIвадахь Осетия, Йынгвыщшта, Дагъстан йгьи Апсны акъалаква зымгIва йрыуу аспортсменква.
«Атурнир зымгIвалагьи йадгалапI. Аспортсменква зымгIвагьи рхIатлара хIырхъвыхтI. Ныбыжьла гIвгвыпкIта йагIвшапI: 15-16 сквша йгьи 17-18 сквша йырту. ЗымгIва шалу рпхьадзарала уагIа 200-гIв йрайхIахуштI», – йхIватI Боджгуа.
Октябрь а 15 атшын афестиваль апрограмма апны адгалра мшыта йгIарбапI: аспортсменква йырпыралуаштI, йандыргIалуаштI. Йапшым акъалаква йгIартыцIта йгIайыз чкIвынргIагьи ауат рбжьагIвчвагьи апхъапхъа асасырта ахьыла йдырхаутI анкъвакъвра апхъала тшандыргIалта тIакIв тшпсырщарныс ахъазла. Ауат йырпыраркIвапI атшрыхIазырра бжьараквагьи рбжьагIвчва рбжьагажваквагьи. АААК акорреспондент агвыпква «анагIвгIагIвраква йрылата» акIвпI драчважварныс шйылшаз.
Дагъстан йауу абжьагIвы Ахмадудинов Мурад йшихIвазла, анкъвакъвра йалазларныс ахъазла агIгIвы абакIыгIвчва гIайгтI. АщардагIв Апсны йапхъахауата йырбитI.
«Сара схъатала ари атурнир йгIванхауата сгIайитI. Атурнир адгалрагьи, акIвыршарагьи, аспортсменква ръазарагьи йхIаракIу хвы рыквсцIитI. АбакIыгIвчва ауи ъазара бзидздза гIарыланацIитI», – араса йпхьадзитI абжьагIвы.
Дагъстан йауу йара ари агвып дрылата Эгьзакь Мусса йкубок дазабакIуаштI 16 сквша зныбжьу Магомедаминов Магомед. АчкIвын абакIра тшадикIылищтара агIсквша цIитI, ауаса Апсны апны апхъала зынгьи дгьаъамызтI.
«Атурнир ахабар апхъала йызгIахьан. Араъа сыгIвзачва абакIуан, ауат йшырхIвахуазла, абакIра йазъазу щардагIвы йрынйатI», – араса йгвгIанаграква хIыцагIвишитI абакIгIвы.
ЙрыхIазырыз абакIгIвы атурнир дгIайгтI Краснодар йауу абжьагIвы Исмаилов Магомедгьи.
«Апсны апны аспорт анкъвакъвраква йанакIвызлакIгьи хIаракIыта йадгалапI, хIара аспортсменквагьи ауат хIрылалырныс ъахIылшауа чIахIра дута йспхьадзитI», – йхIватI ауи.
Къарча-Черкес йгIатыцIын 13-гIв абакIыгIвчва гIайтI. Ауат рбжьагIвы Чква Расул йшихIвазла, ауи атурнир йхынхауата дгIалалитI.
«Атурнир йалалуа аспортсменква ззычпу гIахIахвырквын йбзипI ухIва ауаштI. Йара атурнир адгалщагьи бзипI. Ауаса йбзипI хIвата ауыла угIашIас йгьауашым, ансисквша рыцIа-рыцIа йшагъьхуш апшта уадынхалра атахъыпI», – араса акIвпI ауи йшипхьадзауа.
Адуней апсуа-абаза конгресс ЙхIаракIу асовет аунашвачпагIв йкубок ахьызла хвитра абакIрала атурнир Апсны апны йагIынхауата йакIвшуштI. СынчIва ауи гIвымшкI руацIа, октябрь а 16 йгьи а 17 рагIан, акультура-спорт фестиваль «Абаза» йаланакIуата Гвыдауыта къала асаби спорт апхьарта апны йакIвшуштI. Атурнир йызтахъу зымгIвагьи апшырныс рылшуштI. Хвыдъа йнаржьылитI.
швталра йа тшаншвцIара атахъыпI.