Адуней апсуа-абаза конгресс (АААК) аунашвачпагIв шIыц Эгьзакь Мусси адкIылара архъйагIв секретар Гицба Инари йапхъахауа гIвыма къральта йъацаз Трыквшта акIвпI. Ауат ауаъа май а 5 йгIашIарышвта а 8-дза йаъан, апсуа культура квтаква р-Федерация (Апсуафед) аунашвачпагIвчва рынйара йахъазымкIва акъраль апны йынхауа апсуа культура квтаква йадыргалыз айззараквагьи йрылан.

Ардзынба Астанда

Абадырра йгьи ацынхара анархараква лыхра

Адуней апсуа-абаза конгресси апсуа-абаза диаспори тшабадырдырта апхъахьыла рацынхара анархара хъадаква лырхра – ари акIвын АААК ЙхIаракIу асовет аунашвачпагIв Эгьзакь Мусса Трыквшта дыззцаз.

АААК ахъада йшипхьадзауала, уахьчIва адиаспора йауакву рыжвла ъану рпсадгьыл тшадыркIылырныс йаздзышитI, ауаса ауи чпа йшауаш здыруа заджв-маджвпI. Ауи акIвпI Апсуафед аунашвачпагIвчва данрынйа Эгьзакь Мусса ауат адуней шабгу йрылапсу апсуа-абаза диаспора аконгресс апынгьи Апсны апынгьи йыншауа ажвлара йгьи акультура уысква йшгIарыланадыркIуаш йзазйыргвыгъаз. ШIыцта йгIандыршаз АААК ахабарргага портал ауи ауыс щардала йахъвушта йаъапI: адуней шабгу апны апсуакви абазакви дасу йгIайгвынгIвуа абызшвала ркультури ртурыхи ддырдырныс лшара рауаштI.

Апсуафед ахъада Акусба Атанур Трыквшта йаъу адиспора АААК анхара йацыркIуата йрылшауа закIгьи гIанырымжьныс йшхIазыру йгвы ахъыта дгIачважватI. Ауи йаццауата Акусба йгIаликIгIатI Трыквшта йту апсуаква Апсны апаспортква гIарытри Апсни Трыквшти тенгьызла йырбжьаныкъвауа агъбаква аущтри йырпщылу ауысква аныргIалра ахъазла зымгIвагьи ркъаруква адыркIылра шатахъу.

АААК аунашвачпагIвчви адиаспора йауаквуи агвынгIвытI агIвыма къраль апны укультури уыбызшви ухчара ахIатырла апсуа-абаза уагIахъа рпахь йгIагылуа абаргвыраква ушрайгIайуаш амальква удыруата чIвырхъа-чIвырхъамцара пахьла унаскIьара шатахъу. Ауи ангIауыдахIвуаш, рхIвитI АААК апны, тшанадукIылра, угвы змыртынчуа ауысквагьи йхътIыта урыквчважвата йчпачIву лухуа уанцара агIан акIвпI.

ЙхIнапIыцIшвтыз анапIылачпараква гIащтIыххра, апсуара ацIасквагьи нкъвгара

АнапIылачпараква йрызъазу апсуа пхIвысква йадыргалта Сакария шта ауысхарта квта – Адапазар къала апны май а 6 атшын йакIвшаз агIарбарта АААК ауыснкъвгагIвчва ррысасра акультура программа магIын ду зму хъвыкIта йалан. АпшыгIвчва йрымаджьащахъвата йырпшуан апхIвысква апхъанчIви апсуа алапаща гIадрысабапуата арызна йгьи ахьапщ рахъваква йгIарылырхыз анапIылачпараква. Апсны апны ауи апш угьанйахуам, ауаса Трыквшта апсуа кытква рпны йгIащаквхатI.

Трыквшта йбзазауа Шамба Зеррин йшылхIвауала, апхъала апсуа пхIвысква шалапуз, йшхаруаз, йштадзахуаз, нхагати пкъыгIвасти йгIадрысабапуаз ауысла ахабарква гIауауырныс швабыж йбаргвын. Трыквшта апсуа кытква дгIархъыкIвшауа апхIвысква дырцIгIауамца, апхьахьа-этнографква драйкьангьашуамца акIвпI ауи арат анапIылачпараква разыбжьара апрограмма шлылхыз.

ЦхърагIага бзита йылзалтI ауи Трыквшта йту апсуа йгьи абаза тгIачваква рпны амхIаджьырра йгIацхаз рахIбачва йгIартынхата йырзыгIанхаз апкъыгIва чвахъабагаква – сквшы 150 айхIа зхъыцIуа абашлыкъква, йтыдзахгIу ашIарыцкьагаква, йалапу арыпшдзагаква.

Ари агIаншара асуратлента апшра>>

Йара ауи атшын АААК агIащтийыгIвчва Сакария йаланакIуа Балбалы кыт апны йакIвшуз агвыргъьахъв йалан. 14 сквша рапхъала ахIбачва унашва гIаргтI апсуа тацанадылраква рпны ахысраква ашIадрысырныс. АхIбачва ражва йахъымсуа чкIвыныргIа йшырзыразу йахьызхIвагапI ансисквша йадыргаллауа ари айззара. «Апсуа чкIвынчва ахIбачва йшрыздзыргIвуа ухъа аладухушта йаъапI. Ауи абзирала аполиция йрылымшуз ажвлара йрылшатI. Ауи ахъазла са арат асквшква руацIа знымзара-зны йымхысыз, пхастакIгьи знапIыцIымшаз чкIвыныргIа сшырзыразу расхIвитI», – йхIватI агвыргъьахъв йалаз Трыквшта ауацIа уысквала аминистр Сойлу Сулейман.

Агвыргъьахъв Трыквшта йапшым аштаква йгIартыцIыз уагIата хвынызкьгIвыкI раъара алан. Адиаспора йауакву рыхъазла ауи рхаквлагIвчва йызларынйуш швхIаусыгIва пшдзата йалитI. Ауат ртшпсщара мшы рцри бызшвала йчважвауа ауагIа йрылата йыргитI, апсуа гIахIвыщала йгIахIвитI, руагIа ррызкъква ршIадыршвитI.

Агвыргъьара йгIазнаддаз тшырзынайырхауата Эгьзакь Мусса ауат апсуа-абаза конгресси Трыквшта йаъу адиаспори апхъахьыла разазаъащаква рыцIагьи штшауацIырхуаш лшарагьи шалазлуш йазйыргвыгъатI.

«ХIара заджвгьи хъатакIла дгылата дгьгIаныгIжьуашым. ХIа йхIтахъыпI адуней йыкву дзачIвапсыуазлакIгьи хIуысква дгIарылагIжьырныс, хIынхара дгIаланахIыркIырныс. ХIара апрограммаква ймачIымкIва йлыхIхын йхIымапI, ауат нхауа йалагахьатI, рсабапрагьи гIбахьатI. ХIапхъахьыла ауи анархара рыцIагьи тшауацIнахуаштI, йгIаланакIуа ауагIа рыцIа-рыцIа йщардагIвхалуштI, хIыгIвычIвгIвыскIгьи – дъабзазалакIгьи – хIгьйыгIвсуашым», – йхIватI Эгьзакь Мусса.

АААК ахъада уацIыхъван йшихIвахызла, Трыквшта адиаспора рабадырра дшазпшуаз ацкIыс рыцIагьи йгвы гIащтIнахтI: «Са йыздыруан араъа хIычкIвынчва йанакIвызлакIгьи йшджьгарыз. Ауаса араъа сангIай йымцым айщчвара, зкьыгIвпхьадзара йнадзауа хIайщчви хIахщчви рацзакIыра збатI. Сара йсыласхIватI ауат рпхари рымчи – ауат хIызлу ауыс апны швабыж йгIахIыхъвуштI, ауи назрыскIьуш къару дутагьи йалуаштI. Сара хIуачIвымш ауыс дуквала йшырчвызлуш сыла йыцIапI».