Москва апсуа диаспори «ХIара хIадгылтI» мгIвайсри акоронавирус абакIра йазалху айъазара гуманитар цхърагIара адыргалын Апсны йгIаргтI.
Москва апсуа диаспора (МАД) йгьи «ХIара хIадгылтI» мгIвайсра ркъарула COVID-19 абакIра йазалхта Апсны йгIаргтI айъазара гуманитар хIатлара. Агуманитар цхърагIара йаланакIитI ИВЛ аппаратта 21, ауат ангIадрысабапуа йгIартахъхауа апкъыгIваква, апульсоксиметрква, контакт змам атермометрква, айъазагIвчва рхъа злархчуш апкъыгIваква – йазалху ахъыхчара чгIвычаква, аларбгIвыгаква, ареспиратор медицина маскаква, зынгIарысабапрата йгIартахъхауа амедицина пкъыгIваква.
Москва апсуа диаспора апны акоронавирус COVID-19 апшIагылра, абакIра ауысла Апсны ацхърагIара знархару а-Штаб аунашвачпагIв Шакая Беслан йшгIаликIгIазла, апандемия ага баргвыра аъаща гIахъшахъыцIызтынгьи Апсны ахъазла йауацIыху ацхърагIара адыркIылырныс рылшатI. Ари агуманитар цхърагIара адыргалырныс ахъазла ахчала ркъару аларцIатI абашталагIвчва йгьи «ХIара хIадгылтI» мгIвайсра.
«ЙгIалкIгIара атахъыпI джьгарта йацIагыла йшацынхауа Москва апны йаъу хI-Штаб ауысхагIвчви, «ХIара хIадгылтI» мгIвайсри, Москва апны йгIаныршу Апсны айъазагIвчва рассоциации. Ауат Апсны азгIвадарахчара аминистерства йрайкьангьашын швабыж йкъытта Апсны ззыбжадзу аъамапсымаква Россия ауацIала йгьи агIвыма къральква рпны уахъгьи тшынгьи йамайчуата йпшгIумцара йгIараутI. Сара гвыхътыла зымгIвагьи сырзыразпI гвчIагIвра ду гIадырбауата араса бзита йъацынхаз ахъазла», – йхIватI Шакая.
Ауи йшгIацицIахызла, йырхвгIаз аъамапсымаквагьи апкъыгIваквагьи Апсны азгIвадарахчара аминистерства йдрыхIазырыз, йдрыбагъьаз ашIыпхьадзара швъа апкъ йтата ауи адресла йырщтитI. Агуманитар цхърагIара ареспублика аминистерства йаннадзара амщтахь ауи Апсны айъазара нхартаква йырзыршахуаштI. Агуманитар цхърагIара анагвындыргIвра амщтахь ауи йгIаквчважвауа ахабар а-Министерства асайтгьи МАД асайтгьи йгIаквырцIахуаштI.
Алогистика акврыдзраквагьи атаможня уысквагьи COVID-19 атшауацIнамрыхри абакIри руысла Апсны ацхърагIара знархару МАД а-Штаб йахъвдаквнащттI.
«Швабыж йгIахIцхърагIатI атранспорт компания «Абаза Транс» – дара рахчала агуманитар хIатлара азбжа Апсны йыргатI. «Абаза Транс» гвыхътIыла йъагIахIцхърагIаз, азгIва абакIра ркъару ъаларцIаз ахъазла йалкIгIата хIырзыразпI», – йхIватI а-Штаб аунашвачпагIв.
Ауи йшгIаликIгIазла, Москва апсуа диаспори «ХIара хIадгылтI» мгIвайсри йазыркIкIыз ахчала йырхвгIаз аъамапсымаква, апкъыгIваква, ахъвшвква зымгIва шалу уахьчIвала йрыквшватI сом 39 751 276, ауат йрыуата МАД йаларцIатI сом 6 658 349,96.
Апсны апны акоронавирус абакIра ахъазла Москва апсуа диаспора йазыркIкIыз ахча абгата йгIауахвырквын сом 8 036 500 йнадзитI, йрытамамтI Шакая.
«АцхърагIара адкIылра ауысла хIынхара гьашIахIрысуам. Апхъахьыла йхIчпауа ауысква рхабаргьи йтахIымщахIауата йшвхIырдыруаштI, ахабар шIыцква МАД асайтгьи асоцсетквагьи йыртахIцIалуштI», – йхIватI МАД аштаб ахъада.
Апсны апны COVID-19 ауысла аоперштаб аунашвачпагIв йтарагылыгIв Конджариа Алхас йара йхъатала Москва апсуа диаспорагьи «ХIара хIадгылтI» мгIвайсрагьи дшырзыразу йхIватI.
«ХIара хIхIаракьатчпагIвчви Москва йауу хIабашталагIвчви агвжважвагIва ангIанша йгIашIарышвта зынла йгIахIыдзхъагылтI. ЙахьчIва хIара йгIахIадзатI швабыж магIны ду зму ацхърагIара. Абгата йгIахIгвынгIвитI уахьчIвала ари ахIатлара агIаграгьи баргвыра ду шапщылаз. ХIхIаракьатчпагIвчви Москва апсуа диаспори уыста йгIаншаз зымгIва ахъвдаквырщтын агуманитар цхърагIара Апсны йгIадырдзатI. Анчва дырзыразхатI!», – йхIватI Конджариа Алхас.
Ауи йшгIацицIахызла, азгIвадарахчара аминистерства акъраль айъазара нхартаква рбжараква гIарпхьадзумцара ацхърагIара агIвыршуштI. Ауи йшихIвазла, хъгалра зыртуаш коронавирус шIкIгIара гIазахвыз ачымазагIвчва йрайъазауа ачымазагIвтараква ракIвпI.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.