Апсни России ркъральыгIва мажа август а 1 йгIашIарышвта анылагьи арылагьи ухъыс йауаштI. Ауи коронавирус згIва атшауацIыхра йапшIагылуа Россия аштаб ауысхагIвчва йырхIвата ахваша, июль а 31 агIан, Россия ахабарргагаква йамцIыргатI.

Йара ауи атшын рыцIа пасата Россия Федерация авице-премьер Голикова Татьяна аоперштаб йызкьазууыз алачIвара акIвлыршатI.

«АлачIвара амщтахь асквш 2020 август а 1 йгIашIарышвта Россия Федерации Апсны Республики ркъральыгIва мажа хъыртIырныс щаквыргылра гIаргтI. Ауи ащаквыргылра йащатахатI Апсны апны асанитар-эпидемиология аъащи Апсны атшпсщартаква атуристква нарахвныс йшазыхIазыруи руысла Роспотребнадзори Россия згIвадарахчарала а-Министерстви рырхъвыхра агIарбараква», – рхIватI Россия аоперштаб апны.

Апсны р-Президент Бжаниа Аслангьи йара ауи атшын агIвкъралькI рмажа хъитIуаштI. Ауи йара Бжаниа Россия ахабарргарта агентства "Интерфакс" йрайхIвтI.

«ХIара ауи ащаквыргылра хIайгвыргъьитI, Россия Федерациягьи хIырзыразпI. Россия Апсны йадсылуа рмажа шхъыртIбыргуа асахIат ауи амажа Апсны ахьылагьи йхътIызлуштI. ХIара хIахьыла ауи ауысла пыраскIгьи гьаъазлушым», – йхIватI Бжаниа ахваша ахъвлапын "Интерфакс" драчважвауата.

Ауи апхъала Роспотребнадзор анхагIвчва Апсны йаъан. Апсуа ъачIвагIагIвчва йрыцта ауат атуристква йырзалху атшпсщартакви агIамдартакви раъаща дырхъвыхтI. ХымшкI йакIвшаз архъвыхраква рымщтахь Роспотребнадзор анхагIвы Минин Евгений Апсны апны аэпидемия аъаща тынчта йупхьадза йауашта йхIватI.

Апсны Республика аталра адуней апны коронавирус згIва мчыта йъагIацIсыз йгIалцIла сынчIва мартI агIан йашIаркIытI. УахьчIвала агIарбараква йшгIархIвауала, пандемия гIаджвыквлищтара Апсны апны 84-гIвы чмазагIвхатI, COVID-19 гIазкIыз йрыуата хгIвы псытI.