Барганджиа Саид

ЙагIвсыз амчыбыжь ауацIа Апсны апны коронавирус рыхьуата ужвыгьи 643-гIвы гIараутI, азгIва рыхьуи йрымхьуи гIаддырдыруата архъвыхра 2726-гIв гIакIылстI. Ауи апш хабар аргатI АуагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, ужвы ари асахIат Гвдауыта Аквта район чымазагIвтара апны 102-джь щтIапI, ауат йрыуата 92-гIв коронавирус рыхьуата йщаквдыргылхьатI. 
42-джь хIатлапI, 32-гIв ауи апшта йгьхIатладзам. Согъвым йтагылу ашIашIкIгIара згIваква зхьуа йъарайъазауа ачымазагIвтара апны COVID-19 шрыхьуа щаквдыргылхьата 35-гIв щтIапI.

Аоперштаб хабар шаргауала, Согъвым йтагылу "Айтар" пансионат ахакв апны йандыргIалыз нархара щардала йынхауа йатдрыпауа агоспиталь апны коронавирус згIва рыхьуата йщаквдыргылхьата 61-джвы щтIапI. АхвыгIв хIатлапI, 56-гIв ауи апшта йгьхIатлам.

"Пандемия гIаджвыквлищтара Апсны апны коронавирус зхьуата йщаквдыргылыз зымгIва шалу 7779-гIв йнадзитI. Ауат йрыуата 5832-гIв бзихахтI, 101-джвы псытI", – хабар аргитI аоперштаб.

АуагIа коронавирус згIва йачвыхчарала аоперштаб ауысхагIвчва ауагIа азгIва тшачвыхчарала амальта йаъу шнарахвуаш йаквгIазшIыртитI.

Апсны апны COVID-19 ауыс уазцгIата аъачIвагIагIвчва рбжьагажва уаздзыргIвы йызлауаш йанакIвызлакIгьи йынхауа ателефон номерква аъапI.

Согъвым абзазагIвчви асасчви 995–02–07 йгьи 935–30–71 номерквала телефон йас йауаштI, Очамчыра – 925–10–09, Ткъварчал – 925–10–03, Гала – 925–10–07, Гагра – 925–10–05, Гвдауыта – 925–10–02, Агвдзера – 925–10–04 номерквала.