Арат амшква нхара уысла Апсны йаъу Эгьзакь Мусса а-Конгресс йаланакIуа апхIвыс советква йрылакву дрынйатI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны нхара уысла даъата а-Конгресс йаланакIуа апхIвыс советква йрылакву дрынйатI. Анйара апщаша, мартI а 25 атшын, а-Конгресс ауысхарта апны йакIвшатI.
Эгьзакь Мусса а-Конгресс ауысхагIвчва йрыуата рахIа йпшдзу агвып сальам райхуата йцIыхъвахауата Апсны данаъазищтара ауат уыста йырхаз ахъазла дшырзыразу райхIвтI.
«Швабыж йсгвапапI уахьчIва зымгIва швызбарныс. ЙыздыритI швара йдучвам агIамта ауацIа а-Конгресс амурадква шшвылашвхIваз, Апсны апны абзазара агъьхауата тшапсахра ахъазла хIызламгIвайсра атахъу амгIва швзыбауа швшцаз. Амшын атшпы учIвата амш анхъдзуш уазпшуашта, уачIвы йангIашара абзазара йара-йара тшапсахуашта угвыгъушта хIуыс гьыквым. Анчва йара уыжвжвы хIпхыцIа гIахIнапIыцIахIкIта хIара-хIара йхIпсахырныс лшара гIахIититI», – йхIватI Эгьзакь Мусса.
АААК ЙхIаракIу асовет аунашвачпагIв йгIаликIгIатI а-Конгресс агвып йацыта йынхауамцара йбаргву мгIва ауыра гIамырдара, ужвыгьи щарда тшазырбжьара шатахъу.
Ауи дшхъвыцуала, хъадата тшыззыбжьара атахъу «гIвычIвгIвысипхьадза йыхъазла рахIа ймайру ауысквала угIалагата рахIа йалачпаквула уалгауата йхIчпара хIтахъу ауагIа йшырзынахIырдзуш, ргвы йштадхIыркIуаш» акIвпI.
АпхIвысква рсовет затахъу даквгIашIасуата Эгьзакь Мусса ажвлара рбзазара апны апхIвыс лмагIны гIаликIгIатI.
«Сара йанакIвызлакIгьи йсхIвитI: апхIвыс йшылчпалакIгьи лсаби закI шйылрыфуаш, лтдзы шлырпхуш, лунагIва фачIвы шыгIвназлуш амаль гIалауаштI. [АхъацIа йуысу] ашварацра гIауыдахIвырнысгьи йгIауыдамхIвырнысгьи ауаштI. Ауи ззысхIвауа, апхIвыс луыс хвду амапI, ауи йылзычпушгьи щардапI. АхъацIа гвы айымтуата щарда агIвищтитI, апхIвыс зымгIва лбитI. Абзазара чва зхъауымбушшва йаъу агIаншара хвыц-хвыцквала йалапI. Швара ауатква зымгIва бзидздзата йшвзалыргитI. АпхIвыс пхIвыскI йлалхIвуаш ахъацIа йынцIра йгьизыхIвушым. АпхIвыс лгвыхь ацIолара ззыдыруаш датша пхIвыскI лакIвпI – ауасазшва йызбитI», – йажва алйыргатI ауи.
АААК апхIвыс советква рунашвачпагIв Ардзынба Гета нхарата йакIвдыршази йырпыру ауыскви дрыквчважватI.
«Апсны акыткви арайонкви рпны йгIахъыртIыз ашIыпIа хъвшараква зымгIва ргIаныршара апхIвыс советква алан – ауат рдырчва йразцIгIауамцара рыцIа йджьгару ауагIа гIарауан, ауат йрабадыруан, акытква йгIархъыкIвшумцара а-Конгресс ауыс йацIагылуашта уызквгвыгъуш ауагIа гIалырхуан. гвыргъьахъвызтI, гвчIагIвчпаразтI – а-Конгресс йгIаджвыквнацIуз уыскIгьи хIыхIвссаква аламкIва йгьакIвымшатI. Сгвы багъьата йсзыхIвуштI: а-Конгресс ахъазла апхIвысква рсовет уызквгвыгъа йауаш пхьынцIыгIвапI», – лхIватI Ардзынба.
Анйара йалаз ахIвссаква АААК аунашвачпагIв йхъатала йъайачважваз ргвква гIащтIнахтI.
Эгьзакь Мусса йынйара лахIварата йгIалыланацIаз хIыцагIвылшатI АААК апхIвыс совет йалу асаби психолог Амичба Илона.
«А-Конгресс апны хысквша цIуата йхIчпауа зымгIва Мусса ХIабальа йпа хIанйынйа амщтахь сыла шIыц-шIыц йгIацIалтI, хIпахь йхIыргылуа амурад дуква йшахъаз нхарам – хIуагIа рылахь зпщылу йшхъвдаквцIару багъьата йазхъасцIатI. ХIгвып ауи шIыц-шIыц йрылархIватI. Датшагьи: ауи (Эгьзакь Мусса – аредакция ррытаразга) уанйыздзыргIвуа хIуысква ащтацауата йубитIта угвы тынчхитI – ауи мгIан ду амапI», – йгIалылкгIатI Амичба.
Ауат ажваква кIара гIарыцылцIахтI апхIвысква рсовет йалу датшагьи заджвы – Гвымба Аза.
«Эгьзакь Мусса ХIабальа йпа йхъата адуней шабгу гIацIанакIуата йаъапI, ауи йапшым нархара щарда рпны дахIвра гIатызгаз дгIвычIвгIвыспI. Ауи абаза уагIа бзи йшибауа, тгIачвакIта дшырпшуа анубара угвы йалахIитI! АбакI йгIариква дшырхъгвыргIвауа апш ауи йкъаругьи йылшараквагьи хIуагIахъа руачIвымш шбзихуш йайтитI. Ари йапшу анйараква швабыж йатахъыпI, хIара рыцIагьи багъьата йхъахIцIатI абаза уагIа гIахIыршIыхата рбзазара гIахIыршIыцхырныс хIащтата хIпахь йхIыргылуа амурадква хIзырхъйушта йшаъу», – лажва аллыргатI Гвымба.
ЙакIвшаз анйара ауысла лцIыхъважва лхIват Ардзынба Гета.
«ЙахьчIва хIыуа дзычIвызлакI лыхъазгьи мгIан ду зму мшын – Мусса ХIабальа йпа ауырата, пкъы ацIата хIйачважватI. ХIайчважвара къарута йацIазли йыззынархазли йгIауахвырквын щарда цIуата йабадыруа, здунейпшыща азакIу гIвзачваквакI ранйара йапшын. Схъатала сыхъазла магIын ду зму закIы сацIачIвагъвара стахъыпI: Мусса ХIабальа йпа йгьагьара шабгу йара йлахIвараквала йырчвитI, а-Конгресс хачIвыта йылнахуа зымгIва амаль амамкIва йшхъйуш йазхъауйырцIитI, укъаруква йрызхъауцIауа уичпитI. Ауи дзачIвызлакIгьи йылайхIвитI. АунашвачпагIв йыхъазла ауи хвду зму хIальпI», – лхIватI апхIвыс советква рунашвачпагIв.
Ардзынба кьангьаш гьазгIалгуам ари анйара йгIарыланацIаз алахIвараква ахIвссаква «ашIыпIа советква рыцынхара, жвлара магIны йа гвчIагIвчпара нархара зму а-Конгресс ауысква рырхъйара рпны къару чIыда шгIарнатуаш».
Эгьзакь Мусса Апсны апны нхара уысла мартI а 27-дза даъазлуштI, а-Конгресс ЙхIаракIу асовет, Апсны арайонкви акыткви рпны йгIаныршу АААК ахъвшараква йрылакву дрынйуштI.
швталра йа тшаншвцIара атахъыпI.