Гагра ангIадырхвитхыз амш АААК айсра ныкъвадыкъвата йачпаз айсчва ареспубликала радкIылара «Апсны» йалакву согIала рыхьыз ахIватI, Гагра ачымазагIвтара апны ковид зхьуа йъарайъазауа ахъвшарагьи йацхърагIатI.
Асквшква 1992-1993 рагIан Апсны ауагIа р-Абашта айсра акIвшауата Гагра аквырджьква йанырчвгIадырхвитхыз амш – октябрь а 6 йадахIвуата Адуней апсуа-абаза конгресс айсра ныкъвадыкъвата йачпаз айсчва ареспубликала радкIылара «Апсны» (РАИВ) Гагра йауата йалу аветеранква асогIаквала йаргвыргъьатI. АААК анхагIвчва адкIылара ателевизорква, арпхагаква, ахъыза пхаква азыргатI.
Адуней апсуа-абаза конгресс анхагIвы Хагба Изольда йшылхIвазла, ари ауыс а-Конгресс ЙхIаракIу асовет аунашвачпагIв Эгьзакь Мусса йгIарыхъвдаквицIатI.
«ХIара ари агвыргъьахъв ахьызла хIветеранква хIрайхIвахIвырныс, згIвадара шырзыхIтахъу рахIхIвырныс, ужвыгьи зны рылаква хIыртапшыта квырмыш рзыхIчпарныс, акъраль шабгу ахъазлагьи ауи абзазагIвипхьадза йыхъазлагьи ауат йырчпаз ахъазла «Анчва дшвзыразхатI» – раххIвырныс хIрызгIайтI», – лхIватI Хагба.
Йырхъмаштылуата гватра ъарзырбаз йгьи йъагIарцхърагIаз ахъазла АААК агвыпгьи ауат йрапхъагылагIву Эгьзакь Муссагьи дшырзыразу йхIватI РАИВ аунашвачпагIв йтарагылыгIв, Абашта айсра аветеран Ванача Гела. Ауи аветеранква араса йангIаргвалашвауа пхата ргвы йшгIатахауа гIаликIгIатI.
«ЗымгIвагьи агвыргъьахъвла срайхIвахIвитI. ХIыжвгIванд йанакIвызлакIгьи ймамырызтI! КIьыдата а-Конгресс агвып сшырзыразу схIвара стахъыпI – Анчва дшвзыразхатI, швабыж йхIгвапапI гватрата йхIзалшвхыз», – йхIватI ауи.
Айсра йалаз Акаба Нанагьи Адуней апсуа-абаза конгресс дшазыразу гIалырбауата аветеранква зымгIва рыхьызла арат йрапшу ауысква рбзирала ауат акъральгьи ауагIагьи йшыртахъу шрылархIвауа гIалылкIгIатI.
«Анчва дшвзыразхатI хIъашвхъмаштылуа, хIа хIыхъаз ауи магIын ду амапI. Агвыргъьара мшыла!» – лхIватI Акаба.
Гагра къала йамштагьи йырпхьадзауа ари агвыргъьахъв атшын Адуней апсуа-абаза конгресс ауысхагIвчва Гагра арайон чымазагIвтара йапшым амедицина ргIапсгаква – арециркуляторква, псып таузыргауа амаскаква, атонометрква, ачымазагIвква йрыларжьуа ахъвшвква зхъарцIауа ащъаква, атермометрква азыргатI.
«ХIара ачымазагIвтара апны ковид зхьуа йъарайъазауа ахъвшара йатахъхуш аргIапсгаква азыгIгатI. ЗымгIвагьи згIвадара рзыхIтахъпI, пандемия апшIагылра ауыс апны ари хIалацIарагьи айъазагIвчва мачIкIлазтынгьи рпсы гIатанакIуашта хIгвыгъитI», – лхIватI Хагба Изольда.
Гагра район ачымазагIвтара айъазагIв хъада йтарагылыгIв Харабуа Заири аковид хъвшара аунашвачпагIв Барцыц Ирми агвып шабгу рыхьызла а-Конгресс агвып йрызхIвахIвтI.
«Швхъа хIъагIаташваз, араса хIъажвбаз ахъазла швабыж хIшвзыразпI. ХIара йамгIанцхърагIаразлакIгьи хIайгвыргъьитI. Ковид апшIагылра апны цхърагIаракIгьи гьчIыдахум», – лхIватI Харабуа.
Адуней апсуа-абаза конгресс анхара апны агвчIагIвра уысква гватра ду рзалнахитI. АААК Апсны ауагIа р-Абашта айсра аветеранква йырзынархата йзакIымкIва-йгIвбамкIва
акцияква акIвнаршахьатI. Йара ауи апшта пандемия ангIаджвыквылбырг йгIашIарышвта а-Конгресс йшалшауа апшта Covid-19 абакIра апны ачымазагIвтараквагьи азгIва йгIахъшахъыцIыз аэкономика баргвыраква гIаздысылызгьи йырцхърагIитI.
швталра йа тшаншвцIара атахъыпI.