Адуней апсуа-абаза конгресс ЙхIаракIу асовети а-Президиуми йжвабахауа ралачIвара акIвшатI Къарча-Черкес апны.
«Адуней апсуа-абаза конгресс» жвлара адкIылара ЙхIаракIу асовети а-Президиуми йжвабахауа ралачIвара акIвшатI Къарча-Черкес, Архыз апны июль а 25 атшын.
АлачIвара ъакIвшушыз йцара апхъала асовет йалаквугьи, «Абаза» культура-спорт фестиваль йалаз аспортсменквагьи Къарча-Черкес йауата асквшква 1992-1993 рагIан Апсны ауагIа р-Абашта айсра йалата Апсны Республика ахъахвитра ахъаз зхъа щтIазцIаз рчвахъабага син хIврапшдза азыщтIарцIатI.
АлачIвара акIвйыршун а-Конгресс ЙхIаракIу асовет аунашвачпагIв Эгьзакь Мусса.
ЙджвыквцIага ажва апны ауи алачIвара йапхъахауата Къарча-Черкес апны йшакIвшауа гIаликIгIатI, «Абаза» культура-спорт фестиваль шакIвшаз даквчважватI, ауи абаза уагIахъа рацзакIыри райщчвари йыргвыргъьахъвта йъалыз йахъазымкIва ауагIахъа ргIащаквхари ртшауацIыхри йшахъвауагьи йхIватI.
АлачIвара апротокол йырцун АААК архъйагIв секретарь Гьыцба Инар. Ауи ЙхIаракIу асовет йалакву йрыуата алачIвара йалу гIайхIватI. Эгьзакь Мусса, Гьыцба Инар, Таниа Кан, Харазиа Вадим, Ашуба Арда, ХIапатI Ахмат, Чагва Армида, Пшенокъва Владимир, Мыква Мурат йгьи Реквава Темур рхъатала алачIвара йаъан. Видеола алачIвара йгIалалтI: Апсны ахьыла – Кварчиа Нури, Алшундба Инвер, Инджгиа Джьамбул, Чрыгъба Вячеслав, Лазба Амина, Москва ахьыла – Кобахиа Беслани Барганджиа Дауыри, Батум ахьыла – Лазба Наталья, Иордания ахьыла – Чква Анвар, Германия ахьыла – ХIаджьымба Эркан, Трыквштала – Гечба Мурат, Башныхв Эрджан йгьи Дохма МхIаматальы.
Гьыцба алачIвара 22-джь алазтын ауставла кворум шнахъауа зымгIвагьи йгIаргвалайыршвахтI. Йызлапшуашыз ахуыскI напIщтIыхрала йандрыбагъьа амщтахь ауат ауысквала йгIачважвушыз йрыздзыргIвытI.
Апхъапхъа Адуней апсуа-абаза конгресс айззара ду азддари анхара ахчата йаквдрыдзызи руысла дгIачважватI Аппарат аунашвахъцIагIв Таниа Кан. Ауи йгIарылайхIватI [ужвы йаъу агвып ъадзанхауа ахвысквша руацIа] анхара йаквдрыдзыз ахча йауата асом мильуан 70 райхIа ЙхIаракIу асовет аунашвачпагIв йшалайцIаз, сом 10 мильуанкI – ЙхIаракIу асовет йалу, Москва апсуа диаспора рунашвахъцIагIв Агрба Беслан. Сом зкьы 38 асквшква 2018 йгIашIарышвта 2022-дза а-Конгресс алазара ахъазла швачIвыта йгIаталтI, Трыквшта йаъу ашта хъвшара йалакву ршвачIвкви ралацIаракви асквшква 2020-2021 руацIа трыкв лира зыкь 55 (сом зыкь 300 раъара) йнадзатI.
ГIвыджьхауата «А-Конгресс айззара ду аделегатква ралхща ауысла» Аъаща йгьи Адуней апсуа-абаза конгресс ашта хъвшараква рахьыла делегатта зъарагIв алырхуаш шщаквдыргылуаш дгIарыквчважватI архъйагIв секретарь Гьыцба Инар.
ХIызту асквш ажвлара адкIылара сквш 30 ахъыцIитI, асквш 2022 декабрь агIан СогIвым апны а-Конгресс айззара ду акIвдыршарныс йаквдырпшитI, ауаъа къраль щарда йбзазауа аделегатква гIазшIыртырныс ргвыгъапI. Гьыцба Инар йшихIвазла, асквш 2017-дза аустав
адкIылара алазара ауыс йгьи айззара ду аделегатква ралхща гьгIанамхIвузтI. Ауи йгIалцIла а-Конгресс аюристква ари ауыс йадынхалын аделегатква ашта хъвшараква рпны йшалырхуаш щаквдыргылтI. Гьыцба ужвы ажвата йгIаргуа гIайхIватI.
«Делегатта йалх йауаш а-Конгресс йалагIвацакву ракIвпI, шта хъвшарипхьадза ашта йауата а-Конгресс йалу рпхьадзара йгIаквхта 10 проценткI делегатта йалырх йауаштI, ауаса штакI ахьыла делегатта йалырхуа 50-гIвы йрайхIазла йгьауашым», – йхIватI АААК архъйагIв секретарь.
Алхща шIыц ауысла агвгIанаграква ЙхIаракIу асовети а-Президиуми йрылу зымгIва тшрыхадыргIвазарныс пасата йырзырщтийхьан. ЙхIаракIу асоветгьи а-Президиумгьи йрылу йгIарылархIваз аргIапсща йацшIакIта йадгылтI.
Ауи акIвпIта, «Адуней апсуа-абаза конгресс» жвлара адкIылара йызкьазуу VIII айззара ду ашта хъвшараква рахьыла делегатта йалазлуш аргIапсща шIыц апкъ йтата йалырхуаштI.
Ауи андрыбагъьа амщтахь АААК ЙхIаракIу асовет аунашвачпагIв Эгьзакь Мусса ашта хъвшараква анхара джьгарта йшгIаламылуа гIаликIгIатI.
«Хъвшарипхьадза делегатта зъарагIв алырхуаш ашта хъвшараква рджьгарра йаквыргIапсызлуштI. Араъа йгIашвгваласыршвахра стахъыпI ашIыпIаква рпны хIцIаскви хIыбызшви шхчахауа хIыуа дасузлакIгьи йынхаща йшапщылу», – дацIачIвагъватI АААК аунашвачпагIв.
Йхпахауата йапшым ауысква йрылапшуан. Аппарат аунашвахъцIагIв Таниа Кан июль а 20 атшын ЙхIаракIу асовет «Абаза» жвлара адкIылара атшазынархара шгIадзаз гIарылайхIватI.
Ауи йхIватI Къарча-Черкес апны йгIаныршу «Абаза» жвлара адкIылара аунашвачпагIв Къванча Умар а-Конгресс ЙхIаракIу асовет йалакву уысквакI йрылапшырныс дшгIахIваз. Ауат ззынархаз АААК Россия Украина апны йакIвнаршауа йазалху айсра операция йшазаъу, йара Умар йгIайщтийыз авидео Интернет апны а-Конгресс абгъьыцква рпны йгIатацIара ауыс йгьи асквшква 1992-1993 рагIан Апсны апны зтахъырала йайскваз «айсра уысква рветеран» хьзы рыт йшауаш ракIвын.
«Абаза» адкIылара атшазынархара джьауапта йахIтыз йанхIцIатI Эгьзакь Мусса Россия Федерация р-Президент Путин Владимир Владимир йпа Украина апны йазалху айсра операция акIвыршара ауысла йщаквыргылра абгата йшацикIуа ауысла асквш 2022 мартI а 3 агIан швъа шйыгIвхьаз. Авидео ауысла Къванча Умар йгIайгвынхIыргIвытI а-Конгресс апортал хабарргарала аполитика шаъула, ауаъа йгIатахIцIауа агIвыраква зымгIва а-Конгресс зланхауа ацбызшвакIла йатакIзара шатахъу. ХIара ауи хIйыхIватI ароликква ргIатацIара ауыс хIалапшра ахъазла ауат йгIадырбауа зымгIва ауат ацбызшвакIла йатакIта йгIахIыйтырныс. Йхпахауа ауысла – хIа йшыгIдыруала, КъЧР апны йаъу Апсны айсчва радкIылара аунашвачпагIв КъЧР а-Парламент аунашвачпагIв ауи ауыс дацхърагIарныс тшизынайырхахьатI. А-Парламент аспикер ауи йауацIыхта джьауап йыйтхтI», – йгIашIипхьадзатI Таниа Кан.
АлачIвара аналга амщтахь ЙхIаракIу асовет аунашвачпагIв Эгьзакь Мусса ауи акIвшаща гIаликIгIатI.
«Са йшызбазла, асовет псыптагаракIла йакIвшатI. ЗымгIва рнашхква бзийын. ЙахьчIва хIара йащтагIайуа айззара ду тшазхIрыхIазыруата арегламент шщаквхIыргылуаш, декабрь Апсны, СогIвым апны йакIвшуш ауи ауыс аделегатква шалырхуаш агьиква хIрыквчважватI. ЙахьчIва хIара къральипхьадза ахьыла делегатта зъарагIв гIайуаш тамамта йщаквхIыргылтI – ауи къральипхьадза апны а-Конгресс зъарагIв алу йгIаквхызлуштI. Джьгарта хIынхузтын – ауагIа рыцIа щардагIвыта йгIахIылалуаштI. Ауи хIаквчважвалуштI, тшагъьхIчIвуаштI, йатахъхузтын – хIынхара асабап щтIыцIра ахъазла аустав псахра алахIцIалуштI», – йцIхъважа йхIватI Эгьзакь Мусса.
Адуней апсуа-абаза конгресс ЙхIаракIу асовети а-Президиуми ралачIвараква йапымшвтуата сквшбжакI апны зны йакIвшалитI.
швталра йа тшаншвцIара атахъыпI.