Адуней апсуа-абаза конгресс апсуа-абаза уагIа радкIылри ансисквша йакIвшалауа «Абаза» культура-спорт фестиваль магIныта йамуи йырзынархаз уатыкв айчважвара аднагалтI.
Бганба Шазина
СогIвым йаъу Адуней апсуа-абаза конгресс ауысхарта апны АААК ЙхIаракIу асовет йалаквугьи алата «Апсуа-абаза уагIа радкIылра йапщылата уахьчIва гватра ззыбачIву ауысква. Ансисквша йакIвшалауа «Абаза» культура-спорт фестиваль апсуа-абаза уагIа ргIащаквхари ртшауацIыхри йызлахъвауа, культури спорти гIаурысабапуамца абаза уагIахъа адкIылра ауыс апны ауи магIныта йаму» темала уатыкв айчважвара акIвшатI. «Айшва гьагьа» акIвйыршун АААК Айкьангьашырта клуб аунашвахъцIагIв Зантариа Рустам.
Айчважвара йалан: Апсны Республика репатриацияла а-КъральыгIва комитет аунашвачпагIв, АААК ЙхIаракIу асовет йалу Харазиа Вадим, АбИГИ адиректор, АААК ЙхIаракIу асовет йалу Ашуба Арда, Черкесск апны йгIаныршу «Алашара» жвлара адкIылара ахъвшара аунашвачпагIв Мыква Мурат, «Алашара» адкIылара ахъвшара аунашвачпагIв йтарагылыгIв Гьадыгв Мурати ахъвшара анхагIвчви, АААК ЙхIаракIу асовет йалу Кобахиа Беслан, СогIвым апны АААК ауысхарта аунашвахъцIагIв Реквава Темур, АААК ашIыпIа хъвшараква рыцынхарала ахъвшара аунашвахъцIагIв Жьыба Дмитрий, чкIвыныргIа ртшауацIыхрали физкультурали АААК ахъвшара аунашвахъцIагIв Берзениа Валерий, Гвдауыта апны йгIаныршу АААК ашIыпIа хъвшара аунашвахъцIагIв, «Абаза» культура-спорт фестиваль йалаз аволейболасчва гвып ркапитан ЛакIойа Амра, чкIвынргIи спорти руысквала а-КъральыгIва комитети чкIвынргIи спорти руысквала СогIвым къала аунашвахъцIарти ргIащтийыгIвчва.
Апсны йауата VII акультура-спорт фестиваль йалаз агвып йрахIбаз Харазиа Вадим йгIаликIгIатI афестиваль культура-спорт нархара ъаму, апсуа-абаза уагIахъара йагIарбагата йъалуа швабыж дшайгвыргъьауа:
«Ажва аламкIва акультура-спорт фестиваль адгалща хIаракIын. Зджьара йгIанымхауата сразыпI ауи чкIвыныргIа ъаднакIылуа, зымгIвагьи хIъабанаркIуа, апсуа-абаза уагIахъара ъагIащтIнахуа. Сара кьангьаш гьазгIазгуам адуней шабгу йбзазауа хIыгIвычIвгIвысква радкIылра апны дахIвра шхIымазлуш. ХIкомитетгьи абаза уагIа рабадырра шарыбагъьуш йащтата лшарата йаму зымгIва гIанарысабапуаштI. Ари йапшу афестивальква хIызламгIвайсра атахъу амгIва бзидздзата йгIахIдырбитI. Апсны апны уагIахъара нархара зму уыс адыгIгалуашызтын – хIызшIпшуаш хIымапI», – йгIаликIгIатI ауи.
Айчважвара анакIвшуз Черкесск апны йынхауа Мыква Мурат унашва зхъицIауа «Алашара» жвлара адкIылара агвыпгьи видеосвязьла ауи йгIалалтI.
«ХIара ащхъакви мгIва ауыри хIбжьапI, ауаса ауи ауы-айшысызтынгьи хIара хIайщчвапI, хIауагIахъакIпI! Афестиваль згIалагIгазгьи рыцIа щарда хIабабаларныс, хIчкIвыныргIа абадырырныс акIвпI. ХIара йыгIдыритI абазаква апсуаква шхIыму, апсуаквагьи абазаква шрыму, ауаса хIацзакIыра хIара йхIхъазымкIва адуней шабгугьи йырбара атахъыпI. Ауи йгIалцIла культури спорти знархару ауысква Къарча-Черкес апны йахъазымкIва Апсны апынгьи, Трыквшта апынгьи йадгаллара атахъыпI», – дацIачIвагIватI Мыква Мурат.
Апсуа-абаза уагIа радкIылра ауыс апны Мыква Мурат магIны амата йбитI Къарча-Черкес йауу ачкIвынчви ахIвсси Апсны акъральыгIва университет йыцIажьлара, апсуа абитуриентквагьи Къарча-Черкес апны йарыпхьара. Ауи ауыс йацикIтI АбИГИ адиректор Ашуба Ардагьи:
«Ауи магIны амагIвацата акIвымкIва хIуагIа рыхъаз йатахъдзапI. Йапхьарныс зтахъкву Апсны йхIаракIу апхьартаква рпны тып рзалхра, йъабзазуш рытра – хIцIасква, хIыбызшва, хIгвбайара гIазхчуш уыспI. Са кьангьаш гьазгIазгуам ауи акъральыгIва йацнакIра йахъазымкIва ауагIагьи йшрымагIальаматызлуш», – йпхьадзитI Ашуба Арда.
Айчважвара анакIвшуз ауи йалакваз йгIалыркIгIатI афестиваль культури спорти нарыскIьарала йгIанымхауата абаза уагIахъа датшагьи разъазараква шгIанарбауа. Ажва ахъазла, афестиваль йалан ауагIахъа фашаква, анапIылачпараква, асуратква, атадзахра ргIарбартаква.
«Айшва гьагьа» йадзхъачIваз йрылаз репатриацияла а-КъральыгIва комитет аунашвачпагIв йтарагылыгIв Агрба Бастакуа йшгIаликIгIазла, афестиваль апны йуылаухIвуз айщчвари ацзакIыри йхIайщчву ауагIа йырхъазымкIва йара хIадкIылра къару ду алазцIауа «Алашара» жвлара адкIылара рапхъагылагIв, АААК ЙхIаракIу асовет аунашвачпагIв Эгьзакь Мусса йхъаталагьи йбзирапI.
«Апсны ахъахвитра йаназабакIуаз хIара апхъагылагIв дхIыман – Ардзынба Владислав, ауи йбзирала хIуагIахъа гIащаквхатI. Ардзынба Анчва дшгIахIитыз апшта уахьчIва хIайщчва абазаквагьи апсуа-абаза конгресс шабгугьи хIапхъа дгылапI Эгьзакь Мусса. Сара заджвыла ауи хI-Владислав сшипшуаз апшта сипшитI», – йхIватI Агрба.
Анкъвакъвраква йрылу акомандаква йгIарызбжьалыз айгвара сквшигIадза йымчхитI, йауа ухIварыквын ауат рабадырра афестиваль апны йгьгIашIасуам. Апандемия афестиваль акIвыршара заманкIла йапнакъьазтIхIва йщаквгылхьаз азазаъащаква гьазышIнамчIватI. Гвдауыта апны йгIаныршу АААК ашIыпIа хъвшара аунашвахъцIагIв, аволейболасчва гвып ркапитан ЛакIойа Амра дацIачIвагъватI волейбол йасуа агвып асквшква 1992-1993 рагIан Апсны ауагIа р-Абашта айсра анакIвшуз «амгIващквала ащхъаква йгIархъыста хIыдзхъа йгылныс йгIайыз» хIайщчва-абазаква рахьыла йцауа амгIва йанакIвызлакIгьи йшгIарауаш.
«ХIара сасра хIцауата гьсзыхIвум – ауаъа йхIызпшуа хIайщчви хIахщчви хIрызцитI. ХIгвып хысквшахауата анкъвакъвраква йрылан. Ахъвмарра йащату закIыпI: ауаъа йайгIайуа айгвара акIвпI. ХIа ауаъа хIгьхъвмаргIвацум – хIыззычпу, йхIылахIхIвауа, къарута йгIахIылалуа амыгIдитI. Ауи агвыргъьахъв апны йтагIгауа ацзакIыра апсып гIамта ауыра хIгвква йыртазлитI», – лхIватI ЛакIойа.
«Айшва гьагьа» йадзхъачIвакваз чкIвыныргIи спорти руысквала акомитет анхагIвчви дари афестиваль йгIахъкIгIата Апсны апны абзазара йалажь йауаш анархараква йрыквчважватI.
Абаза уагIа рхъвмарраква сынчIва бжьынхауата йакIвшатI. Сквшипхьадза афестиваль тшауацIнахуамца апсуа-абаза уагIахъа радкIылра рыцIа-рыцIа йылшарахауа йачпитI.
швталра йа тшаншвцIара атахъыпI.