АААК йаланакIуа Апсны апхIвысква рсовет Лагъь КIавкIаз апны йакIвшаз апсуа-абаза форум йалачважватI.
АААК йаланакIуа Апсны апхIвысква р-Координация совет октябрь а 19 йгIашIарышвта а 24-дза Лагъь КIавкIаз акъалаква Ставрополь, Черкесск, Нарцана йгьи Гвым кыт рпны йакIвшаз апсуа-абаза форум йалачважватI.
«Аиуара иашьатоу еибабароуп» (апсуа бызшвала «Айгвара йащату абабарапI» – аредакция ррытаразга) зхьырцIаз айззараква рыквчважвара АААК апресс-квта апны октябрь а 27 атшын пресс-конференцията йадгалан.
Анйара гIахъылтIытI Апсны апхIвысква р-Координация совет аунашвачпагIв Бебиа Екатерина. Ауи а-Конгрессгьи АААК ЙхIаракIу асовет аунашвачпагIв Эгьзакь Муссагьи ацара ъалызхъарцIаз йгьи йъагIалцхърагIаз ахъаз дшырзыразу лхIватI.
«Ауи йапшу агIамдараква апсуа-абаза азазаъащаква рыбагъьара ахъазла мгIан ду рымапI. ХIара ари ауыс апны йгIахIцхърагIаз Адуней апсуа-абаза конгрессгьи Мусса ХIабальа йпагьи хIырзаразпI. ХIара щардагIвы гIбатI, уыс щарда хIрыхадзатI», – лхIватI Бебиа Екатерина.
Асовет аунашвачпагIв Бебиа Екатерина йлыцта Апсны йауаз агвып йрылан апхIвысква р-Координация совет йалакву Апсны арадиуа ажурналист Ачба Алини Апсны акъральыгIва университет йхпахауа акурс апхьагIв Хварцкиа Хьыбли, Григолиа Инесса, Габниа Саида.
Афорум йагIаншара хъадата йалтI АААК йаланакIуа Апсны апхIвысква р-Координация совет аунашвачпагIв Бебиа Екатерини Ставрополь шта йбзазауа абазаква рыжвлара адкIылара «Абаза» аунашвахъцIагIв Чагва Армиди мачвы зцIарцIаз АршIыйара проектква ацырхъйарала ангIалра.
«Анчваква амамыри асоциал захвари йрызгылапI» жвлара мгIвайсра аунашвахъцIагIв, АААК йаланакIуа Апсны апхIвысква р-Координация совет пIатIу зквыта йалу КIьычба Гульи мачвы зцIарцIаз ангIалра магIныта йаму дацIачIвагъватI, йырпыру ауысквагьи дрыквгIашIастI:
«Мачвы зцIарцIаз ангIалра мгIан ду амапI, нархара щарда гIацIанакIитI. АнгIалра апкъ йтата хIара йхIмурадпI апсуакви абазакви йырзынарху ауысква радгалра апны хIацацхърагIаларныс, ахIбачви айцIбачви рабадырра хIрыбагъьарныс, хIацыта Апсны апынгьи, Ставрополь шта апынгьи аджьармыкIьаква, афестивальква акIвхIыршаларныс. Апсуакви абазакви рыхъаз магIны амапI анаука дырраква амдарагьи, йара акIвпIта хIуагIахъаква акультури анауки рпны агIвычIвгIвыс дуква рщардапI. Йара ауи апшта хIара йхIгвыгъапI апсуа йгьи абаза бызшвала абзазара йгIахъыху йгьи агвацчпа фильмква ауагIа йрылагара хIацхърагIарныс», – лхIватI ауи.
Айззараква рыквчважвара видео абадыргала йгIалалтI Ставрополь, Черкесск, Нарцана йрыуата ауат йрылаз Ставрополь шта йбзазауа абазаква рыжвлара адкIылара «Абаза» аунашвахъцIагIв, АААК ЙхIаракIу асовет йалу Чагва Армида, абаза кытква рпхIвыс советква рынхара агвынзыргIвуа Джьмакъвыл Нателла, «Абазашта» газет аредактор хъада Къвыл Фардауыс, Ставрополь къральыгIва кытмлыкврхIара университет адоцент Къвырча Владимир, «Алашара» жвлара адкIылара Черкесск апны йгIаныршу ахъвшара аунашвачпагIв Мыква Мурат.
Чагва Армида йшылпхьадзауала, айззараква мурад хъадата йрыму апсуакви абазакви рахIбачви ашIакви рыцIа аргваныта йабардырра акIвпI.
«Апсуа-абаза азазаъащаква уацыта акIвпI йшуызрыбагъьуш. ЙацлыхIхуа апроектква рырхъйара хIаргьи чкIвыныргIагьи тшабахIыркIныс йгIахIцхърагIуштI. ХъарачIвыла хIабадарра йахъазымкIва абараса азаджв азаджв йпны хIцауамца хIабабарагьи атахъыпI», – йгIалылкIгIатI Чагва Армида.
Афорум апкъ йтата Ставрополь апны «Апсны асквшгIвыра ажурналист йылаквала» Литература хъвлапынгьи акIвшатI. Ауи йайщчву ауагIахъаква – апсуакви абазакви – заджв йчIвгьи йапшым ргвбайара йазынархан. ПIатIу зкву сасыта ауаъа дгIачважватI Апсны апхIвысква р-Координация совет аунашвачпагIв Бебиа Екатерина.
АААК йаланакIуа Апсны апхIвысква р-Координация совет аделегация йалакваз асквшква 1992-1993 рагIан йакIвшаз Апсны ауагIа р-Абашта айсра йаладзыз ачкIвынчва рзаъачва Черкесск, «Абазашта» газет аредакция апны йрынйатI.
Нарцана апны «Абаза» УагIахъа-культура автономии «Абазашта» жвлара адкIылари руысхагIвчва йрынйатI. Афорум апрограмма апны йшлыхыз апшта асасчва Гвым кыт абзазагIвчвагьи йрынйатI, ауаъа йгылу аспорткомплексгьи йнашылтI.
Апсны йтыцIта йцаз агвып йрылаз Апсны акъральыгIва университет журналистикала ахъвшара йапхьауа Григолиа Инесса ари йапшу ауысква магIны шрыму гIалылкIгIатI.
«Ставропольшта ацара, йхIайщчву абазаква рабадырра хIара астудентква хIыхъаз пышва бзипI. Айззараква рпны щардагIвы аргваныта хIрабадырныс, хIагIвзачвахарныс хIахадзатI. ХIара-хIара кIара хъыхIхуан, йыгIдыруа абахIхIвуан. Ужвы хIара хIыгIвзачва Апсны апны хIрызпшитI, хIгвыгъитI уыжвласыла хIабабушта», – ллахIвараква йайззаз йрыцагIвылшатI Григолиа.
Апсуа-абаза форум «Аиуара иашьаҭоу еибабароуп» АААК йаланакIуа Апсны апхIвысква р-Координация совет йархъйаз йгIвбахауа проектпI. АпхIвысква р-Координация совет йара ауи апш айззара щарда йнамихуата Апсны апынгьи йакIвдыршара ргвыгъапI.
швталра йа тшаншвцIара атахъыпI.