Адуней апсуа-абаза конгресс асайт йынхауищтара йцIуа асквш йадахIвуата агIарып версия анхара джвыквнацIатI. Ужвы АААК апортал зланхауа абызшваква цба йнадзитI.
АААК апресс-къвырльыкъвхарта
ГIарып бызшвала йчважвауа абашталагIвчва рыхъазла АААК ахабарргарта портал ужвыгьи бызшвакIла анхара ахаша сентябрь а 18 атшын йджвыквылтI – асайт гIаншищтара сквшыкI анцIы амщтахь. УыжвгIандзара ахабарргарта портал хвбызшвакIла йынхун: апсыуала, абазала, урышвла, ангьльызла, трыквла. Ауи акIвпIта, гIарып бызшва бызшва щардала йынхауа апортал йцбахауа бызшвата йгIанарысабапуа йалагатI.
«Ужвы Адуней апсуа-абаза конгресс ахабарргарта портал цбызшвакIла йнардзата йынхитI, – лхIватI апортал аунашвачпагIв Лазба Амина. – Арат абызшваква ракIвпI йызлачважвауа зпхьадзарала йщарду, адунейла йхъылапсата йбзазауа апсуа-абаза диаспора. Ужвы Египет, Иордания, Сирия йгьи МарагIайырта Аргваны анахьанат акъральква йыртабзазауа хIабашталагIвчва йраргвану гIарып бызшвала тшрыхадыргIвазарныс рылшуштI а-Конгресс анхара, хIуагIахъа турыхи акультури йгьи хIпсадгьыл агIаншара дуква рхабарква. РыцIа йауацIыхта йгIахIахвырквын, Апсны рейша йапщыламызтынгьи гIарып бызшвала йбзазауа адуней зымгIва амаль рымазлуштI ахабарква апычIв гIалцIыртала йырдырныс, хIаргьи йхIылшуштI хIхабарква рахIагьи уагIа щардагIв йырзынахIырдзарныс».
Ахабарргарта портал аунашвачпагIв йшылхIвазла, асайт аъачIвагIагIвчва сквшбжакI ауацIа йадынхалтI агIарып версия. Ауи йгIалылкIгIатI, гIарып бызшва анахьанат абызшваква йызларапшым йара ахцIараква шаму - ауи агIарысабапра «къарута, заманта йаквыдзуа рыцIа йайхIапI» апхьала асайт зланхауа йалагаз абызшваква рацкIыс.
Лазба Амина йшылрытамамызла, агIарып версия джвыквырцIара апхъала асквш ауацIа асайт йгIаквшваз аматериалква шабгу атаркIын йдрыхIазыртI. «Йара акIвпIта ауат текст гIвырата 350 раъара, медиафайлта хынзыкь раъара йнадзитI. Ауи анхара амагIны швабыж йдупI», – йгIацIылцIахтI ауи.
Асайт зланхауа абызшва шIыц МарагIайырта Аргваны акъральква йыртабзазауа апсуа-абаза этнос йауу амаль рзыгIаннаршитI а-Конгресс йызлалалуа анкета гIарып бызшвала йтагIвыта рпхьадзарала АААК асатырква йрыладырхIарныс. А-Конгресс мурадта йамапI адунейла апсуа-абаза диаспора йгIацIанакIуа ауагIа рабардырра.
Датшагьи Лазба Амина йшылхIвазла, а-Конгресс ахабарргарта портал анхагIвчва гвып асайт амаль шIыцква йрыдынхалитI, ауат мачI-мачIымцара йгIарысабап йауата йырчпуштI. Асквш 2020 агIан хабарргарта проект джьащахъва щарда гIадырбарныс шыргвыгъу лхIватI апортал аунашвачпагIв.
Ауи йгIацылцIахтI ари апроект гвыгъара щарда шазрыму йгьи ауи ауысла агIахъвыцра шIыцква псейспамцара абзазара йшаларыжь
خطوة جبارة والف مبروك لاهلنا في الوطن و في الشتات. تمنياتنا للجميع التقدم و التضامن والازدهار
швталра йа тшаншвцIара атахъыпI.