Барганджиа Саид

Адуней апсуа-абаза кконгресс СогIвым арайон ШIыц апны саби гвыргъьахъв аднагалын йакIвнаршатI. Агвыргъьахъв Асабиква рхчара амш йазынархата йдрыхIазыруан, ауаса ква ъагIаквуз йгIалцIла июнь а 1 йахъырган а 12 йазыргатI. Ауи атрыпара ацIайква рнашх закIылагьи йгьамзарархатI.

АААК асоцсетьква рпны агвыргъьахъв асахIат а 18 йшалагушыз хабар аргазтIхIва ауагIа арайон ШIыц апарк апны рыцIа паса тшазыркIкIуа йалагатI.

«ХIара чвыкIьата хIгIайтI – спа щымта далаган: «Йанбалагуш?»-хIва сгьагIаймырбузтI. ЙансзымчхIах тшадыгIгалын хIгIайтI. Асабиква швабыж йазпшуан. ЙыжвбитIи ауат кьахврата йтарцIауа», – дгвыргъьитI Дамир зхьзу ачкIвынхвыц йан Авидзба Марина.

Ауи йлымхIварыгьи асабиква тхаджьуан. Адуней апсуа-абаза конгресс анхагIвчва ауат джьащахъвара щарда рыздрыхIазыртI.

Агвыргъьахъв апрограмма йапшым уыс щарда алан. Апхъапхъа «Ашара» саби гвып гIахIвытI. УацIыхъван апхъанысраква джвыквылтI: ацIайква велосипедла, роликла, самокатла йанкъвакъвуан. ЙайгIайыз зымгIва АААК асогIаква рзалнахтI.

Велосипедла йапхъанысуаз дрылан Цабриа Ясон. Ауи дгьамайгIайтI, ауаса йнашх бзийын.

«СзамайгIайызтIхIва ахъвмарра сгвапхатI. УадыргIвана зны сайгIайхпI», – йгвы гьирыдзуам Ясон.

Агвыргъьахъв ъадзакIвшуз асабиква суратгIвра тшазырбжьарныс лшара рыман. СуратгIврала астудия «Сальвадор» арыпхьагIвчва ауат рыхъаз амастер-классква адыргалтI.

Агвыргъьахъв апрограмма йалан фитнеси гIахIври рстудия «Мансарда» апхьагIвчва ргIахъвмаррагьи. ApsnyCrew гвып йгIайззакваз брейк гIахIвыща ддырбатI.

Асабиква рыуа азджьакI рынасып йгIанакIытI адуква йрыцта апарк ацIлаква АААК пасата йарыхIазырыз ацIисгIвараква ркIнырхIарныс.

«Зынгьи цIисгIвара гькIнысымхIасызтI. ЙсгвапхадзатI», – йхIватI Квтелиа Нестор.

Асасчва гватрадъа йгьызрыгIвымсуазтI «Атрансформерква» мультфильм афырква рапшта йгIвычаз аниматорква. Йара ауаса ацIайква рыла дырпшуан зпынцIа апны чIвгIва гIайуа ашвыри акIьанджь ЛОЛи.

Апарк апны аквагрим ъарчпуз тыпгьи аман. ХвыцкIгьи дгьгIанымхатI йшIахъа хъйымшвгIауата.

Агвыргъьахъв апны асасчва тшырзынайырхатI Адуней апсуа-абаза конгресс архъйагIв секретарь Гьыцба Инар. Ауи йара йхъаталагьи Адуней апсуа-абаза конгресс ЙхIаракIу асовет аунашвачпагIв Эгьзакь Мусса йыхьызлагьи йайззаз зымгIва сальам райхтI, рзгIвадара багъьата, дахIвра рымата, йырхъадзгылу ажвгIванд мамырта адуней йыквызларныс дрызхIвахIвтI.

Йара агIаншара даквчважвауата Гьыцба йгIаликIгIатI ари аъарагIвы хвыцгьи дугьи ъарбауа а-Конгресс ауысхагIвчва зджьара йгIанымхауата йшыргвапу.

«СынчIва Согвым арайон ШIыц гIалхIхтI: араъа уагIа щардагIв бзазитI, ауаса ари йапшу уыс зынгьи йгьадхIымгалсызтI. Адуней апсуа-абаза конгресс чкIвыныргIи асабикви рыдынхалра гватра ду азалнахитI. ХIара йшхIпхьадзауала, асаби уылапш дыцIата йызхIара атахъыпI. УахьчIва йадыгIгалыз ауыс йауацIыхта, кьахвта йакIвшатI», – йажва алйыргатI ауи.

ЙалкIгIу согIата йырзалтI зымгIвагьи ахъвлапын алгауата 5-хауа АтдзыунашвахъцIарти ауи аунашвачпагIв Квициниа Ахри йадыргалыз асалют. ЗигIва-зигIвата йалакIкIуз ауи ачIвецква ахIауа гвыргъьара нашхла йдырчвытI. ЙхIвара атахъыпI ари агвыргъьахъв тшазадыргалуа йаналага йгIашIарышвта атдзыунашвахъцIарта зымгIвалагьи Адуней апсуа-абаза конгресс йшацхърагIуз.

Агвыргъьахъв апны дгIачважвауата Квициниа Ахра ари апш гвыргъьахъв адызгалыз АААК дшырзыразу, асабиква зымгIвагьи мамыр, згIвадара, бзира шырзитахъу йхIватI.

Арайон ШIыц апны йгIаныршу АААК ашIыпIа хъвшара аунашвачпагIв Адлейба Илонагьи асасчва зымгIва, йалкIгIата – асабиква разыта йшгIанхаз гIалылкIгIатI.

«Асабиква агвыргъьахъв ргвы швабыж йгIащтIнахтI. Ауат ауи йазпшуан. Даргьи бзидздзата тшгIадырбатI. Ан-абачва ажва пха щарда хIзырхIватI, Анчва дырзыразхатI. УахьчIва хIрайон ШIыц апны зымгIвагьи рнашхква пшдзан», – лхIватI ауи.

Агвыргъьахъв йасасыз Адлейба Мадина лразыра ажваква Адуней апсуа-абаза конгресс йазыналырхатI.

«Асабиква разыпI, апрограмма джьащахъвапI, спортгьи, культурагьи, ларпшрагьи алапI. Анчва дшвзыразхатI», – дхIвахIвтI асас.

Асабиква зымгIва согIата ахъагIараквагьи рыларшатI. Агвыргъьахъв швъабыгъь шоула йалгатI.