СогIвым апны Адуней апсуа-абаза конгресс ашIыпIа хъвшараква зымгIва рунашвачпагIвчва райззара акIвшатI.
СогIвым йаъу АААК ауысхарта апны Адуней апсуа-абаза конгресс ашIыпIа хъвшараква зымгIва рунашвачпагIвчва йшалакIу йапхъахуз райззара акIвшатI.
УахьчIвала ахъвшараква рпхьадзара 42 йнадзитI. Ауат хачIв хъадата рпахь йгылу акытква рбзазагIвчва разыгIальаматра гIащтIырхта дара-дара рбзазара шагъьырчIвуаш йаквдыргвышхвара акIвпI. Абарауаса АААК Апсны апны йджьгару акъральгIв жвлара тшауацIнарыхра йацхърагIитI.
АшIыпIа хъвшаракви чкIвыныргIа рджьгарри агвынзыргIвуа Жьыба Дмитрий йшихIвауала, анйара мурадта йамаз ахъвшараква рунашвачпагIвчва абардырра, йыздынхалуа апроектква рыквчважвара, апхъахьыла йыздынхалуаш ахачIвква лыхра ракIвын.
«Ареспублика арайонква зымгIва рпны ашIыпIа хъвшараква щардапI, ауат рынхара агвынзыргIвуа гIвыджь хIакIвпI – Берзениа Валерийи сари. ХIынхауа хIалагищтарагьи дукI гьцIуамта зымгIвагьи хIгьрабамдырстI. Пандемия ауырахан хIгьзабамбузтI, ужвы рыцIа аргваныта хIащтаныкъвауа хIалагата хIынхара рыцIа джьгарта йджвыквхIцIара атахъыпI», – йхIватI Жьыба.
Ахъвшараква рунашвачпагIвчва рыхьызква, йъауу гIархIвунта рпроектква йрыквчважвун – АААК ацхърагIарала йдырхъйахьазгьи ужвы йыздынхалуагьи.
Йъадзанхаз швапхата йдырхIаз йшгIарднарбауала зымгIвадзугьи йацшIакIта йырхIвитI уацIагылырквын уыс щарда «ахча ду уымамкIвагьи» йшузычпуш – йатахъу ашIыпIаква рпны ауагIа сабапракI рчпарныс йазыхIазырызлара акIвпI.
«Кытипхьадза апны йджьгару абзазагIвчва ргвыпкI аъазара атахъыпI, ауагIа дара закI рчпара атахъыпI. АААК ргвышхвагIвта йалитI. ЙаъапI акытква рбзазагIвчва закIы йазпшуа йанчIву, ауаса «йара-йара» закIгьи тшгьапсахуам, къарукI адуцIара атахъыпI», – йылпхьадзитI Тамыщ кыт ашIыпIа хъвшара аунашвахъцIагIв Ануа Джьамила.
Ауи апш ргвышхвагата йгIауырба йауаштI, ажва ахъазла, ашIыпIа хъвшаракI апны йгIаларгаз ауагIа дырра рылагарала апроект. Гвдауыта район йаланакIуа Уатхара кыт ашIыпIа хъвшара унашва ахъызцIауа Бжаниа Амиран акыт апны абзазагIвчва рыхъазла кыт млыкврхIащала абжьараква шадыргалыз гIайхIватI.
«Атренинг амщтахь акыт абзазагIвкI уатрарпхарта йыргылын – ужвы хъахIара йызгIанагитI. АгIаджвыквцIараква щтадъа йгьагIвсуам», – йажва найырдзатI Бжаниа Амиран.
АААК сквшщарда цIуата йрыцынхауа Ткъварчал ашIыпIа хъвшара аунашвачпагIв Аршба Белла йцIыхъвахауа ахвысквша руацIа а-Конгресс анхара рыцIа абзазара йшаквыргIапсу гIалылкIгIатI.
«А-Конгресс акытква рпны уыла йабауа ауысква архъйауата йанызба псы гIасхъалхтI. ЗджьакIы бзиракI хIзырчпара шыртахъу аныгIбара рыдзхъа хIымгылныс хIгьахвитым. УагIата йатахъу зымгIва гIаланасыркIта хIынхуштI», – йылрыбагъьатI Аршба.
Ауи йшылпхьадзауала, ареспублика апны аъащаква шщаквгылызла, район щарда рпны асоциал йгьи ажвлара проектква хъгалра рытра атахъыпI.
Анйара апны ашIыпIа хъвшаракви чкIвыныргIа рджьгарри агвынзыргIвуа Жьыба Дмитрийи Берзениа Валерийи уыжвласыла йджвыквырцIуш гIвпроект шIыцкI ауатыкв йгIатаргатI.
Ауи апшта, ашIыпIа хъвшараква йалакIу ргвыпква рквтабжьарала ауагIахъа хъвмарщаквала анкъвакъвра адыргалра ргвыгъапI.
«Анйара апны ауагIахъа хъвмарщаквала апроект хIрыбагъьатI. АшIыпIа хъвшараква агвыпква азыркIкIуаштI, кыт-кыт йанкъваквъуаштI. УацIыхъван ауи ареспублика арайонква рквтала анкъвакъвра духуштI», – йхIватI ашIыпIа хъвшаракви чкIвыныргIа рджьгарри агвынзыргIвуа Берзениа Валерий.
ЙгIвбахауа апроект авидеороликква ррыхIазырра йапщылапI: ауагIа зкыт рыцIа бзита йгIазырбауа-хIва йанкъвакъвуаштI. Ароликква гIвдакъикъакI ахIа йнамдзауа йапшым форматта йхъых йауаштI. АъачIвагIагIвчва злазлуш ажюри йагъьу анхара гIалнахуаштIта йайгIайыз согIа хъадата видеокамера рыртуаштI.
Адуней апсуа-абаза конгресс ашIыпIа хъвшараква Апсны арайонква зымгIва – Гагра уалагата Галдза – йгIахъыртIхьатI. Ауат асквш 2019 агIан йгIандыршауа йалаган уахьчIвала Апсны акыт 42 рпны ауагIа джьгарква адыркIылхьатI.
швталра йа тшаншвцIара атахъыпI.