АдзыгIвбжьа кыт аджьгарыгIвчва Адуней апсуа-абаза конгресс гIарцхърагIумцара акыт апарк гIащаквдыргылхитI.
Барганджиа Саид
АдзыгIвбжьа кыт апны абзазагIвчва Адуней апсуа-абаза конгресс гIарцхърагIумцара Гвлиа ДырмытI йыхьыз зхъхIвалгIу апарк гIащаквдыргылхуаштI. Ари апарк акыт апны асквш 1974 агIан йдыргылтI. СквшкъомкI руацIа апарк заджвгьи дахьымпшуата йгылан. Щарда мцIуата йадынхалуа йалагахтI.
Акыт аджьгарыгIв, АдзыгIвбжьа апны АААК ашIыпIа хъвшара аунашвачпагIв Кациа Алхас йшихIвазла, асквш 2014 агIан йгIандыршаз «АдзыгIвбжьа» фонд акъарула йцIыхъвахауа асквшква руацIа апарк гIащаквдыргылхуа йгIамгIвайситI. Афонд йалалтI акыт аджьгарыгIвчва, арыпхьагIвчва, акыт йауу ахIаракьатчпагIвчва. «АдзыгIвбжьа» анхара нархара хъадата йамапI акыт абзазара агъьчIвра, аспорт ауагIа йрылагара, чкIвынргIа ауи йгIадкIылра, акыт апны аспорт атшауацIнарыхра. Кациа йширытамамызла, афонд анхара зладгалу ауи йалу ауагIа ансисквша йаларцIауа ахча акIвпI.
«Афонд абзирала, акыт ачкIвынчва гIахIцхърагIумцара апарк апны амзаква кIылыгIгатI, волейболасырта хIчпатI. Асквш 2017 ацIыхъва хIхачIв хъада хIырхъйауа хIалагатI – мини-футболасырта ауыхвара. Асквш 2019 ацIыхъва ауи ахъвмарырта хIазырхатI, ужвы ауи акыт йауата СССР аспорт амастер хьзы гIазквнадыргаз Марганиа Владимир йыхьыз нкъвнагитI», - йхIватI ауи.
АджьгарыгIв йатайхIвахтI асквш 2019 агIан акыт апны Адуней апсуа-абаза конгресс ашIыпIа хъвшара шгIахъыртIыз. А-Конгресс ауысхагIвчва «АдзыгIвбжьа» фонд апхъахьылагьи апарк агIащаквыргылхра йшадынхалуаш анырдыр акыт абзазагIвчва йырцхърагIарныс йшхIазыру рхIватI.
«АААК анхагIвчва проект хIыздрыхIазыртI – апарк агъьчIвра знархару аконцепция. ХIгвыгъитI апхъахьылагьи хIгIаджвыквцIараква рырхъйара апны а-Конгресс шгIахIцхърагIалушла. Асквш 2020 апны араъа уыжвгIанчIви саби хъвмарырта хIыргылырныс хIгвыгъапI. Апарк уызгIвымсхыз тшпсщартата, аспорт ауысла йшатахъу апш йадгалата, уыжвгIанчIви дизайн амата йхIчпахырныс хIтахъыпI», - йхIватI ацIыхъва Кациа Алхас.
Апарк апроект зчпаз Москва апны йбзазауа, йынхауа хIабашталагIв Ломиа Наала лакIвпI (ауи йбергьльу апсуа уысагIв, ажвлара-политика уысхагIв, 15 сквша райхIа МАААН (ужвы АААК) йасекретарь хъадаз Аламиа Геннадий дипхIапI – аредакция ррытаразга).
«АдзыгIвбжьа кыт абзазагIвчва тшпсщара парк гIандыршарныс шыртахъу гIасазхIвыз Ардзынба Гета лакIвпI (АААК апхIвысква рсоветква рунашвачпагIв – аредакция ррытаразга). Ауи дгIасыхIватI апарк аквпшыра ауысла схъвыцраква гIасырбарныс. Сара ари ауыс хвыдъа садынхалитI, йшпакIву ухIварыквын, йапхъахауата, скъраль агъьчIвра скъару аласцIарныс швабыж йсгвапапI (йсылшауа ага ймачIызтынгьи), йгIвбахауата, аштаква ртшауацIыхра йазынарху аконцепцияква рыдынхалра швабыж йтлапIапI, ауи ахIатырла Апсны абзазагIвчва рщарда ауи апш уыс ахча ду азыртйырныс йгьхIазырым. Ауи ахIатырла ари апроект апны ахча ауыс сгвы адзакIьагьи йгьтам», - лхIватI адизайнер.
Апроект автор, лара йшылхIвазла, ауыс данадынхалуаз ауагIа зщцаз налрыскIьата шIыцракI шгIалхъвыцуашыз, йшалалцIушыз дащтан.
«Сыззхъвыцыз йрейшам адгьыл агIвынакви аплитаква рбжьара йгIайуа ахIври ракIвпI. Аплитаква ахIвра йачIва «йалагIващауазшва» йаъазлуштI. Датшагьи магIны зму закIы – йгIахIрысабапуа апсабара апкъыгIвакви ауи йгIаннаршаз ашвыгакви ракIвпI», - лхIватI Ломиа.
Апроект йшгIанарбауала, асаби хъвмарырта уыла йгIацIахуа ачваквпшыраква гьалам. Автор йгIахIгвынлыргIвытI ауаса йзаъу.
«Ага щардагIвы асабиква уыла йгIацIахуа ачвапшыраква бзи йырбауата рхIвазтIхIва ауи гьтамамым. Ахъвмарырта ахъазлагьи асабиква рыхъазлагьи апсабара пкъыгIваква рыцIа сабап рылапI. Ауи ахIатырла апроект закIгьи гьаласымцIатI апластик йгIалхта йгьи ачвапшырала уыла йгIацIахуатагьи», - йгIацылцIахтI адизайнер.
Ауи датшагьи йшгIалылкIгIазла, апарк апны зквпшырала йчкIвыну апкъыгIваква – аквчIвартаква агьиква – «араъа йбзазауа аъачIвагIагIвчва ъазаква майрата йшырзычпуш апшта» йаъазлуштI.
Адуней апсуа-абаза конгресс ашIыпIа хъвшара АдзыгIвбжьа кыт апны асквш 2019 агъны йгIахъыртIытI. Ауищтара а-Конгресси акыт абзазагIвчва джьгарта йацынхитI.
швталра йа тшаншвцIара атахъыпI.