Трыквшта апны Апсны акъральыгIва банк ахчакви абанкноткви йырзалхыз агIарбарта акIвшатI.
Барганджиа Саид
Апсны Республика АкъральыгIва банк ахчакви абанкноткви ргIарбарта гIвтрыкв къалакI – Астомбыль йгьи Адапазары – рпны йадыргалтI. Апсны АкъральыгIва банк аунашвачпагIв Барателиа Беслан йшихIвазла, аэкспозиция адгалра йацхърагIатI Трыквшта апны Апсны ащтийыгIвчва руысхарта йгьи Апсыуа культура квтаква рфедерация.
Ауи йшихIвазла, йцIыхъвахауа агIвысквша руацIа ачвахъабага ахчаква йазалху аъачIвагIагIвчва йырзынархаз йапшым адуней уатыквква рпны йгIадырбатI.
«Ари азын хIара ауат Трыквшта щардагIвыта йтабзазауа хIдиаспора йдхIырбарныс хIмурадын. Апсны абанк йгIацIырщтыз ахчаква зымгIва гIагIгтI. АуагIа щардагIвын, йалкIгIата йуылаухIвун ауат агIарбарта гIальаматра ду шазрымаз – ауи йашвхIаусыгIвазарын ахчаква хIпсадгьыл апны йъагIацIырщтыз», – йхIватI агIарбарта апшыгIвчва ргвапара гIаликIгIауата АкъральыгIва банк аунашвачпагIв.
Трыквшта апны Апсны йазалху хъвдаквцIарала йгIаныршу ауысхарта аэкономика йгьи аполитика уысквала акьангьашагIв Багателиа Астамургьи йацикIтI агIарбарта апсыуа-абаза диаспорагьи атрыкв дырранкъвгагIвчвагьи йалкIгIата гIальаматра ду шазрымаз.
«Астомбыль апны ауи уагIа 200-гIв раъара апшытI, Адапазары къала, Сакарья университет акультури аконгресси рквта апны – уагIа 600-гIв. Ауат йрылан Трыквшта апны йгIаныршу Лагъь КIавкIаз ажвлараква руысхагIвчва, Трыквшта акъральыгIва айззара Ду адепутат Енгин Папба, Трыквшта адырранкъвгагIвчва», – йхIватI Багателиа.
Ауи йхъатала агIарбарта адгалра йацхърагIаз зымгIвагьи швабыж дшырзыразу йхIватI: Астомбыль Апсыуа культура квта аунашвачпагIв Эшба Шамиль, Апсыуа культура квтаква рфедерация аунашвачпагIв Аквсба Атанур йгьи Сакарйа Апсыуа культура квта аунашвахъцIарта йалу Башныхв Эрджан.
Трыквшта апны Апсны Республика АкъральыгIва банк ачвахъабага ахчаква ргIарбарта май а 4 атшын йхъыргIвахтI.
швталра йа тшаншвцIара атахъыпI.