Хвынцариа Отар йыхьыз зхъу ауагIахъа ъамапсымаква йрысуа акъральыгIва оркестр сентябрь а 23 йакIвнаршаз аконцерт апшыгIвчва ргвы йтымцIуаш лахIварала йарчвытI.
Барганджиа Саид
Ргвыргъьара цIарымкIуата йапылуан Апсны акъральыгIва филармония апны йайззаз апшыгIвчва Хвынцариа Отар йыхьыз зхъу ауагIахъа ъамапсымаква йрысуа акъральыгIва оркестр сентябрь а 23 Согъвым апны йакIвнаршаз аконцерт аномерипхьадза.
Ари ахъвлапын апшыгIвчва ззымпшуаз согIа щарда йрынйатI: аконцерт далан Апсны ауагIа рартист Маан Виолетта, Апсны йазынарху ашва шIыц лхIватI «Чичерина» гвып рашвахIвагIв Чичерина Юлия. Ауарад ажваква йгIвытI «Абаза-ТВ» апсуа телеканал апны йынхуз аурышв журналист Пегов Сергей. Амакъым лара Чичерина йалалцIатI.
«Сара Согъвым щарда мцIуата саъан, ауи агIан аоркестр (Хвынцариа Отар йыхьыз зхъу ауагIахъа ъамапсымаква роркестр – аредакция ррытаразга) срабадыртI. ХIара шIыцракI гIалагIгарныс хIтахъхатI – йаргьи ауи абари апш эксперимент гIалцIтI. Сара аоркестр рконцерт швабыж йсгвапхатI. Апрограмма шабгаз сапшытI. Саъара гIасылахIахтI. Кьангьаш гьазгIазгуам ари хIацынхара йшаджвыквцIарагIвацу, ажва аламкIва ауи ужвыгьи кIара ащтагIайуаштI», – лхIватI ашвахIвагIв.
Ауат ракIвымкIвагьи аконцер йалан апсуа артист МикIаа Эрик, ашIаква рфольклор ансамбль «Ахьышьҭра» (апсуа бызшвала «ахъа ъагIаджвыквылуа» гIаныцIитI – аредакция ррытаразга), ауагIа бзи йырбауа амакъымршIыйагIвчва Самарин Алексейи Давидянц Антони. Ауат зымгIва ашва анырхIвуз амакъым йрызгIасуаз ауагIахъа ъамапсымаква роркестр акIвпI.
«Анчва дырзыразхатI аконцерт йгIалалыз артистква зымгIва. Анчва дырзыразхатI аоркестр йалу спсы йапшу сыгIвзачва. Анчва дырзыразхатI заман азалызхта йахьчIва йхIызгIайыз апшыгIвчва. Квырмыш рзысчпитI зымгIва», – йразыра гьцIайымкIуазтI аоркестр ршIыйарала аунашвачпагIв Арухава Денис.
Ага акъраль апны аэпидемия аъаща бзидздзамызтынгьи ауагIа Апсны акъральыгIва филармония апещ дырчвытI. Хвынцариа Отар йыхьыз зхъу аоркестр ауагIа ргвы ахвгIищтара щарда цIитI.
«ХIара арат ачкIвынчва рконцертква йанакIвызлакIгьи хIгIайлитI, амаль хIымата йгьагIвхIщтуам. Ауат руыс зджьара йгIанымхауата йазычпапI. Ауи гвлахIарапI. Аконцерт алгарныс гьстахъымызтI. Анчва дырзыразхатI аоркестргьи артистква зымгIвагьи ари алокI йагIвызу ахъвлапын ахъаз», – ллахIвараква хIыцагIвылшатI аконцерт йапшыз Рабая Миранда.
Аоркестр йаздзыргIвырныс Россия йауу турист щардагIвгьи гIайтI.
«ЙачIвбзи араъа хIанаъаз йаквшвайа ари аконцерт джьащахъва! Ауи йгIахIыланацIаз алахIвараква щарда йхIылазлуштI. Ауи насыпрапI! Ауи анасып хIара Воронеж йхIыцыгIгахуаштI», – хIгIалыргвыгъатI атурист Белоусова Татьяна.
Хвынцариа Отар йыхьыз зхъу ауагIахъа ъамапсымаква йрысуа акъральыгIва оркестр асквш 2016 агIан йгIаншатI. Агвып ауагIа рашваква йгIарыситI, ауат уыжвгIанчIви заман йанаквдыргIапсуагьи гьмачIым. Аоркестр Апсны апны щардагIвы бзи йырбитI, ауи адуней фестиваль дуква йрылазлитI.
швталра йа тшаншвцIара атахъыпI.