УахьчIвала Апсны апны COVID-19 зхьуаз зымгIва бзихахтI. Ауи ахабар июль а 14 АААК ахабарргарта портал йгIадлырдыртI Апсны азгIвадарахчара а-Министерства апны йгIаныршу ауагIа коронавирус згIва йачвыхчарала аштаб йалу, иммунологии вирусологии рлаборатория аунашвачпагIв, АНА йаланакIуа НИИЭПиТ адиректор наука нхарала йтарагылыгIв МатIуа Алиса.

Ауи йгIацылцIахтI коронавирус зхьуаз йшрайъазуш йаквыргIапста йырчпахыз Гвдауыта ачымазагIвтара йчмазагIвыта йщтIахыз агIвыджь, Россия айсра апхьартаква рстудентква, шгIацIрыгIвгIахыз.

"Ажва гьалам, ауи хабар бзипI, ауаса ужвыгьи убальарыгъуашта йгьаъам. ХIара коронавирус гIаздысылта угвы ззгIвушта йаъу ауагIа хIырхъвыхыркIвитI. Анхара ансимшы йакIвшитI", – лхIватI аштаб йалу.

МатIуа Алиса йгIахIгвалалыршвахтI Апсны апны йгIарауыз ачымазагIвраква зымгIва "йгIатаргата" йшаъаз.

"АкъральгIвынаква хъгIвата йгIанхузтын акъраль ауацIа аэпидемия аъаща уахъгвыргIвушта йгьаъам", – лхIвитI аъачIвагIагIв.

ЗымгIва шалу июль а 14 йадахIвуата Апсны апны коронавирус зхьуата йгIарауыз 38-гIв ракIвпI. Азаджв дпсытI, анахьанат бзихахын ачымазагIвтара йгIацIцIхтI.

КIавкIаз апны COVID-19 тшшауацIнахуа гIазырбауа астатистика тшахаргIваза йауаштI абари азцагала>>