АшIыцраква 31.12.2021 18:30 7751

Асквш шIыц агвыргъьахъв гIаргванхауата АААК акъала хъада акIьадыгвкI апны саби хъвмарырта ауыхвара алнаргатI.

Кирвал Камила

Ахьта Дада, АсырчIвачIва, амультфильмква рфырква, ауысаква, асогIаква – арат зымгIва аъан СогIвым Адыгьа урам апны асабихъвмарырта ангIахъыртIуаз.

АкIьадыгв абзазагIв, АААК ашIыпIа хъвшараква рынхара агвынзыргIвуа Жьыба Дмитрий йхъатала ахъвмарырта аргылра унашва ахъицIун.

«Агвлачва гIасыдгылын Адуней апсуа-абаза конгресс асаби хъвмарырта ауыхвара йгIалалырныс йгIасыхIватI. АААК ЙхIаракIу асовет аунашвачпагIв Эгьзакь Мусса йгIахIыхъвдаквицIан – хIара ахъвмарырта хIхвгIан йъадыргылуашыз йгIагIгтI», – йхIватI ахъвмарырта ангIахъыртIуаз Жьыба Дмитрий.

Ауыхвара апны а-Конгресс джьгарта йгIацхърагIун йаргвану атыдзква йырту ауагIа.

Саби щардагIв зму Харазиа Флора ллахIвараква хIыцагIвылшатI. Ауи йшылхIвазла, араъа йту зымгIва апхъахьылагьи апшцIа шандыргIалуаш йадынхалуаштI.

«ХIара ари ауыс хIсабиква ъахъвмаруа, рзаман ъаргауа хIыкIьадыгв аныргIалра йаджвыквцIагата йхIпхьадзитI. ХIа араъа хIбзазитI, йаргьи йшхIылшауа апш хIыпшцIа хIрыпшдзуштI, хIсабиква рыхъазла йагвынхIыргIвуаштI», – йгIацылцIахтI Харазиа.

Адыгьа урам апны йгылу атыдзаквгылаква рпны саби щардагIв зму атгIачваква гьмачIым. Ауат йрыуапI Мадинян Саида лтгIачва. Саида нцIрата йлыму атыдзаквгылаква рыуа закI апны дбзазитI йгьи йгIалылкIгIитI «ари апш хъвмарырта йапхъахауата йшрауыз».

«Швабыж хIайгвыргъьитI, Анчва дшвзыразхатI! Ауи апш уыс ужвыгьи йгIаларгузтын хIгвыргъьачIвауа хIалалуаштI, архъйара хIацхърагIуштI», – йгIацылцIахтI Мадинян.

Асаби хъвмарырта шIыц аурам апны йбзазауа дугьи хвыцгьи аднакIылтI. Агвыргъьахъв аналгуз ацIайква «асогIа хъагIаква» рыларшатI. Хъвмарыртагьи хъагIарагьи зауыз асабиква ргвыргъьара гIвына гьамамызтI, ауат азаджв азаджв дапикъьауа рлахIвараква рхIвун.

Адуней апсуа-абаза конгресс анхара апны агвчIагIвчпара йанакIвызлакIгьи гватра ду азалхпI. Асквш 2021 агIан АААК анхагIвчва Гагра арайон чымазагIвтара аковид хъвшара, Гвдауыта аковид чымазагIвтара фачIвы рзыргатI. Асквшква 1992-1993 рагIан йакIвшаз Апсны ауагIа р-Абашта айсра агIан Гагра ангIадырхвитх амш йадахIвуата а-Конгресс Гагра къала апны йгIаныршу айсра аныкъвадыкъваква рреспублика адкIылара ахъвшара аветеранква цхърагIара днарадзатI.