СогIвым арайон ШIыц апны йгIаныршу АААК ашIыпIа хъвшара агIаджвыквцIарала ауаъа йауата Апсны ауагIа р-Абашта айсра йаладзыз йырчвахъабагата аллея ларцIатI.
Барганджиа Саид
ЧамхIа 45 Апсны ауагIа р-Абашта айсра йаладзыз йырчвахъабагата йларцIатI ахваша, апрель а 2 атшын, СогIвым арайон ШIыц апны араъа йгIаныршу АААК ашIыпIа хъвшара агIаджвыквцIарала.
Ари ауыс йгIалалыз ауагIа, йгIагъырдзуаз аквагьи йампшуата, щымта щажьыта арайон ШIыц апарк апны тшазыркIкIуа йалагатI. Арайон абзазагIвчва ацIлаква ъаларцIушыз амашаква гIадрыхIазыртI, хъвлапны йнайгвгъауата ачамхIаква ларцIауа йалагатI.
АААК апхIвыс советква рунашвачпагIв Ардзынба Гета йшылхIвазла, арайон ШIыц йауата Апсны ауагIа р-Абашта айсра йаладзыз йырчвахъабагата аллея ларцIарныс а-Конгресс ауысхагIвчва ргвы йгIанагищтара тшытракI цIитI. Ауаса арайон ШIыц апны шIыпIа хъвшара уыжвгIандзара йгьаъамызтI, щарда мцIуата ауи гIахъыртIын «ари ауыс зрыцIсуашыз къару гIаншатI».
«Ари амыз акIвпI арайон ШIыц апны Адлейба Илона унашва зхъылцIауа шIыпIа хъвшара ангIанша. Абарауи агIвычIвгIвыс джьгарква ргвып рбзирала амш аъащагьи хIампшуата ласыта сатыр райшагъвычвта йалагылу чамхIа 45 лахIцIатI. Ауат уахьчIва араъа асабиква тынчта йхъвмарра ахъазла зхъа щтIазцIаз хIычкIвынчва хIшырзыразу, квырмышгьи шырзыхIчпауа йагIарбагазлуштI», – лхIватI Ардзынба Гета.
АпхIвыс советква рунашвачпагIв араъа йбзазауа ауагIа ацIла шIаква айгвыгIврадъа йгIанырмыжьуашта, йырхьпшлушта дгвыгъитI.
«Швабыж йхIыцыркIтI арайон ШIыц аунашвахъцIартагьи, акъала администрациягьи, Джьынджьолиа Гоча дызхъаду амлыкврхIарта йачIва ауанашвахъцIартагьи. ХIара йхIтахъын араъа йбзазаквауа гIайлауамцара асабша нхараква адыргалларныс, йхъдымрыпауата ацIлаква дзы рыцIарчваларныс», – лхIватI Ардзынба.
Ауи йгIалылкIгIатI ари йапшу уыс адзынгьи йакIвдыршарныс йшаквдырпшуа: АААК йалакву арайон апарк апны ужвыгьи цIла ларцIуштI (ари асахIат цIла ъалу апарк адзакIьакIла акIвпI – аредакция ррытаразга).
Арайон ШIыц апны йгIаныршу АААК ашIыпIа хъвшара аунашвачпагIв Адлейба Илона ари ауыс нхара мшыта йъакIвдыршушыз йгIалцIла уагIата йызгIалалуаш гьщардагIвхушым-хIва дахъгвыргIвун, ауаса йара амш ангIатал лгвы ахъазгIваца йшакъвпуаз даквшахIатхатI: абзазагIвчва АААК агIаджвыквцIара джьгарта йацыркIтI.
«Апарк апны Апсны ауагIа р-Абашта айсра йаладзыз рчвахъабага син гылапI, ари аллеягьи ауи йгIацылуаштI. Ари йтамаму, йатахъдзу уыспI, йалкIгIата чкIвыныргIа рыхъазла. Ауат з-Псадгьыл ахъахвитра ахъазла зхъа щтIазцIаз афырква рхъмаштылуата йырдырра рборчпI», – лхIватI Адлейба.
ЙгIаныршашIыцу АААК ашIыпIа хъвшара йалу арайон ШIыц абзазагIв Пипиа Алан йгватра ззынайырхаз ацIлаква рлацIара айсра йаладзыз айсчва ртгIачваквагьи ъалаз акIвпI. Ауи дшапшуала, ари йапшу ауысква ауат рыхъазла йалкIгIата магIны рымапI.
«ХIара багъьата йхъахIцIитI араъа йбзазауа ауагIа ари ауыс апхъахьылагьи йшацыркIуаш, ацIлаква йшырхьпшуаш. ХIаргьи (арайон ШIыц апны йгIаныршу АААК ашIыпIа хъвшара – аредакция ррытаразга) араъа хIгIайлуштI, аллея хIахъпшылуаштI, ахъмаштылра йазынарху ауысква адыгIгаллуштI», – йхIватI ачкIвын.
Жваниа Юлия Апсны ауагIа р-Абашта айсра йаладзыз Реквава Вадим дипхIвысын. Ауи ари ауыс адызгалыз лразыра ажваква рзыналырхатI.
«Анчва дшвзыразхатI. ХIара йхIгвапапI ауагIа йаъахым афырква ъархъмаштылуа. Анчва дшвзыразхатI ауат швгвы йъату. Ари апш уыс йанакIвызлакIгьи йацхIкIырныс хIхIазырпI», – лхIватI Жваниа Юлия.
СогIвым арайон ШIыц апны АААК ашIыпIа хъвшара мартI а 25 атшын АААК ЙхIаракIу асовет аунашвачпагIв Эгьзакь Мусса нхара уысла Апсны данаъаз йгIахъыртIытI. Ауи даунашвачпагIвхатI арайон йауу Адлейба Илона, ахъвшара йалалтI Пипиа Алани Джениа Эльвири.
швталра йа тшаншвцIара атахъыпI.