Туризмла Апсны а-Министерства ареспублика туризм йапщылу бренд азгIахъвыцрала анкъвакъвра шакIвшауа ахабар аргатI. Йагъьу логотип лыхрала анкъвакъвра йызтахъу далал йауаштI. Ауи АААК ахабарргарта портал йгIарайхIвтI туризмла Апсны а-Министерства хабарргарала ахъвшара аунашвачпагIв Аршба Саид.

Ауи йшихIвазла, алоготип "агвы йацчпу амальла Апсны Республика акультура, атурых байараква йшырпщылу гIанарбара, абренд ззынарху йаквыргIапсзара атахъыпI". Ауи йгIацицIахтI атурист бренд алоготип акъраль туризм нархарала алкIгIараква гIахънатIуата, йапшым ауагIа гвыпква хънакъьалуата йаъазара шатахъу.

"АгIахъвыцраква электрон квпшыра рымата акIвпI йшгIахIнапIыцIадыршвуш. Ауат рмагIны гIазырбауа, ауагIа разпшраква йшрыццауа, йапшым айчважвартаква рпны анахьанат йызларагъьу гIазхIвауа гIвырагьи, агIахъвыцра амагIны уыла йгIацIазыжьуа суратгьи гIарыццIара атахъыпI", – йхIватI Аршба Саид.

Датшагьи ауи йгIацицIатI алоготип майрата йчпата, чва зигIва щардала йаламква, йанубара зынла ухъа йгIатахауата йаъазарквын рыцIа йшагъьу.

Анкъвакъвра пщхъвыкIта йшазлуштI.

"ЙгIалалырныс зтахъу зымгIва рынхараква декабрь а 26-дза йгIарщтий йауаштI. Декабрь а 27-дза аъачIвагIагIвчва рсовет ауат йагъьу 10 гIарылырхуаштI. Декабрь а 28 йгIашIарышвта асквш 2021 январь а 20-дза а-Министерства асайт апны ажвлара рнапIщтIыхрала йагъьу хпа гIалырхуаштI", – йхIватI Аршба Саид.

Туризмла а-Министерства хабарргарала ахъвшара аунашвачпагIв йгIацицIахтI анкъвакъвра апны йайгIайуа ахча согIата сом зыкь 50 шйызпшуа, ауаса рахIа йхъаду – ауи йгIахъвыцра Апсны атуризм атурых йалайцIуштI.

Анкъвакъвра йалалырныс зтахъу зымгIва рынхараква ABKHAZIA-TRAVEL@YANDEX.RU электрон адресла йгIарщтий йауаштI.