Адуней апсуа-абаза конгресс Апсны апхьартаква COVID-19 атшауацIыхра злашIаркIуаш амедицина ъамапсымаква рнаттI.
Барганджиа Саид
Адуней апсуа-абаза конгресс Апсны йауата 10 апхьартакI абактерияква зщуа арециркуляторкви агIвычIвгIвыс йыдуымрысылуа термометр 20-и рнаттI. Апхьартаква йрыуата ацба СогIвым апны, апщба Гагра апны йаныргIалпI.
Санкт-Петербург апны йгIаныршу АААК ашта хъвшара аунашвачпагIв Реквава Темур йшихIвазла, йцIыхъвахауа азаман йчмазагIвхауа щардала йъарылахIауа гIарпхьадзауата АААК агвып апхьартаква рпны аъащаква гIаддырдырын азгIва ашIаркIра ахъазла амальква лырхтI.
«ХIара апхьартаква рунашвачпагIвчва хIрачважватI, йыззыбжу гIахIхIырдыртI. АААК ахъада Эгьзакь Мусса йунашвала арециркуляторкви агIвычIвгIвыс йыдуымрысылуа атермометркви хIхвгIатI», – йхIватI Реквава.
Ауи йгIаликIгIатI ауат аъамапсымаква апхьартаква рпны азгIва злашIаркIуа амальква йшрыладырхIуш.
«ЙрыхIтыз аъамапсымаква ауи апхъала йгIадрысабапуаз амальква йрыладырхIуштI. Кьангьаш гьазгIагIгуам ауатква рбзирала асабиквагьи арыпхьагIвчвагьи азгIва рыцIа йшачвыхчахуш, апхьараквагьи йапымкъьауата йшадгалазлуш», – йхIватI Реквава Темур.
Гагра апхьартаква арециркуляторкви агIвычIвгIвыс йыдуымрысылуа атермометркви АААК рыхьызла йырзылгатI а-Конгресс анхагIвы Хагба Изольда. Ауи йгIахIгвалалыршвахтI апхьара сквшы анджвыквыл ауагIа арыпхьагIвчва рквта азгIва рыцIа мчыта йгIацIсныс йахъгвыргIвауа йшалагаз. ЙалкIгIата уырхъгвыргIвушта йаъан арыпхьагIвчва наскIьахьаква.
«ШварагIварата йаъу гIахIчакьын Гагра къала апщапхьартакI рпны арыпхьагIвчва йырзалху апещква рыхъаз ахIауа зрыцкьауа рециркулятор хIхвгIарныс йаквхIкIтI. Ауат апещ йыгIвну абактерияква, азарарч цIакIьаква рщитI – ауи коронавирус агIамта йахъазымкIва азгIваква ангIацIсуа гIамтипхьадза агIангьи йатахъхитI», – лхIватI Хагба Изольда.
АААК ашIыпIа хъвшараква рынхара адгалагIв Жьыба Дмитрий йгIаликIгIатI апхьартаква йазалху аргIапсгаквала йадгалра ауыс АААК агвып заман айшысла йшагвындыргIвыз. Ауи йхIватI апхьартаква рынхагIвчва асогIаква ъарадзаз швабыж йшыргвапахаз: зымгIвагьи йгIаргвынгIвитI апхьартаква коронавирус атшауацIыхра йачвыхчара шатахъу.
«АрыпхьагIвчва апхьарта апны азгIва рыцIа йачвыхчахушта арыпхьарагьи апымкъьушта хIгвыгъитI. ХIара хIарыпхьагIвчва йырхауа ауыс хвду азыгIбитI, ауи магIныта йаму гIахIгвынгIвитI, йаргьи йшхIылшауа апшта ауат хIхчарныс, рбзазара рыцIа йхIрымайрарныс хIборчта йхIпхьадзитI», – йхIватI акоординатор.
АпхьартаквакI рыхъазла АААКи дари рацынхара апны ари ауыс гьапхъахум. Гагра йапхъахауа аквтанай апхьарта адиректор Гвынба Хана йгIахIалхIвтI апхьагIвчва ауи апхъала Нарт эпос йазынархаз а-Конгресс апроект йшалаз «йгьи йшайгIайыз».
«Схъаталагьи агвып шабгу рыхьызлагьи Адуней апсуа-абаза конгресс гватрата йхIзалнахуа ахъазла хIшазыразу, адахIвраква шазыхIтахъу схIвитI. Анчва дшвзыразхатI! Швабыж йхIгвапапI!» – лхIватI апхьарта адиректор.
АААК архъйагIв секретарь Гьыцба Инар а-Конгресси Апсны апхьартакви рацынхара шашIамсуа гIаликIгIатI. Ауи йхIватI ари йцIыхъвахуз акция анакIвдыршуз асабиква йызпхьауа рыцIа бзита йшрыларкIуаш апшта апхьартаква рпны уыла йабауа асимволква шгIадрысабапуа дырхъвыхырныс рхъа йшгIанагыз. Ауи йгIацIанайыркIуа асаби дызпхьауа рыцIа багъьата йгвникIылырныс йгIайцхърагIауа асуратква, ачIвагъараква агьиква ракIвпI.
«Апхьадзараква рарысра гIазырбауа атаблица зчваквршыраквала йапшым суратта йхIчпата апхьарта ауацIа ахъалыртаква йрыквцIлахIыркIырныс щаквхIыргылтI. Ауи агIан асаби ансимшы ауыла дхъал-дгIабгъалпхьадзагьи ауат апхьадзараква йыла йгIацIашвалауамцара йхъа йтайкIуаштI. Атаблица асуратква йрыцта агъыцIараква рградусква шыршвауа гIазырбауа асуратквагьи дхIрычпуштI. Ауи асурат ашв ацIахь йаквцIладыркIитIта ашв ангIаутIуа зъара градусла йгIаутIыз гIаунарбитI», – йгIахIгвынйыргIвытI Гьыцба.
Ауи йшихIвазла, АААК ари апроект СогIвым 5-хауи 15-хауи апхьартаква рпны йшдырхъйуш йадынхалуа йалагахьатI.
«Ауи йгIахIхъвыцыз арыпхьагIвчвагьи апхьагIвчвагьи швабыж йыргвапхатI. 15-хауа апхьарта арыпхьагIвчва апсуа алфавитгьи рныта ауи апш сурат хIчпарныс йгIахIыхIван – ауыгьи хIадынхалитI», – йхIватI АААК архъйагIв секретарь.
Коронавирус згIва апандемия шгIаджвыквылбыргуаз йгIашIарышвта Адуней апсуа-абаза конгресс агвып ЙхIаракIу асовет аунашвачпагIв Эгьзакь Мусса рапхъа дгылата COVID-19 аташауацIыхра ашIакIра йацхърагIитI. Ауи анархарала йзакIымкIва-йгIвбамкIва апроектква дырхъйахьатI. АААК апхъахьылагьи ауи анхара гьашIанарысуашым.
швталра йа тшаншвцIара атахъыпI.