Барганджиа Саид
Адуней апсуа-абаза конгресс Цандрыпщ кыт апны йаъу «ХIара хIацыпI» ГвчIагIвчпара квта медицина ргIапсга азыргатI. Ари аквта апны зызгIвадара аъаща йгIалцIла зылшараква мачIу асабиквагьи адуквагьи рзгIвадара гIащаквдыргылхырныс йырцхърагIитI.
ТЕКСТ: Адуней апсуа-абаза конгресс «ХIара хIацыпI» ГвчIагIвчпара квта зызгIвадара аъаща йгIалцIла зылшараква мачIу ауагIа (айшыста – ЗМА – аредакция ррытаразга) рзгIвадара гIащаквдыргылхырныс йызларцхърагIуш йазалху медицина ргIапсга азыргатI. Ареабилитация квта Гагра район йаланакIуа Цандрыпщ кыт йтагылапI. Ауаъа йщтIу айхIарагIв цIайпI.
А-Конгресс йырнатыз аргIапсгаква йрылапI асабиква рыдынхалра йазалху агвабанква, уымкIахIауата угылуа, учIвырхъауа тшызлаубжьуш аплатформаква, асабиква йызларыдынхалуа йазалху ароликква.
Ауи апш ргIапсга Цандрыпщ йаъу ареабилитация квта йартырныс АААК анхагIвчва ргвы йангIанаг аквта шгIахъыртIыз ахабар асоцсетква рпны йанга амщтахь акIвпI.
«Ауи аквта ангIанша хIара Адуней апсуа-абаза конгресс ЙхIаракIу асовет аунашвачпагIв Эгьзакь Мусса тшизынахIырхан Гагра район апны зылшараква мачIу ауагIа рызгIвадара ъагIащаквдыргылхуа квта нхауа йшалагаз, ауи йазалху медицина ргIапсга йшазыбжу йахIхIвтI. Эгьзакь Мусса дымнакIгIакIуата аквта уацхърагIара шатахъу зынла йацикIтI. ХIара араъа июнь а 1, Асабиква рхчара амш хIгIайта аквта апны йщтIу ацIайква хъагIарагIвацамкIва йыззыбжу аргIапсгаквалагьи йхIыргвыргъьара, аквта атшауацIыхрагьи хIацхърагIара хIтахъын. Ауаса йапшым ашвхIаусыгIваквала ауи агIан хIгьызгIамитI. Абар уахьчIва хIгвы йтахIкIыз хIырхъйатI», – лхIватI АААК ахабарргарта портал агIвыраква ргIатазцIара адызгалуа аредактор Хагба Изольда.
Цандрыпщ апны ареабилитация квта хвымызкI аъара цIуата йынхитI. Ауи унашва ахъызцIауа Аджьба Милана зхъатала зызгIвадара йарыгIапсаз дпхIвыспапI. Луыс ага йбаргвызтынгьи ауи дджьгарпI, дшIаркIвазтIхIва абар – дугьи хвыцгьи аъачIвагIагIвчва ъарцхърагIауа квта лзыгIахътIтI.
«ХIара ауагIа рзгIвадара гIащаквхIыргылхитI, ажвлара йшрылалуаш хIырцхърагIитI. ЙхIызгIайуа ацхърагIагIвчва ЗМА ажвлара йрылагIващауата йаъазларныс ахъазла йшрыцынхуш йазыгIбжьитI. ХIара 40-гIв хIырхьпшитI. АйхIарагIв рмахъа-щахъаква рыхьитI», – лхIватI аквта аунашвачпагIв.
Ареабилитация квта ахча аправительстваква йырпщылам адуней адкIылараква йгIартитI, ауи акIвымкIвагьи ауагIагьи ашIыпIа унашвахъцIартаквагьи гIацхърагIитI.
Аджьба Милана аквта анхара ужвыгьи анархаракI даквгIашIастI: ауи атехника ргIапсгаква йызтахъыхым рпны йгIанауахвитIта йазыбжу йырнатитI.
«АзгIвадара злагIащаквуыргылхуа аргIапсгаква райхIара швабыж йтлапIапI, дзачIвызлакIгьи ауат гьизыхвгIум. ЙыншитI зджьакIы ауат ртахъыхымкIва йа рныбыжь йаквыргIапсхымкIва ахъазгIваца рпынква йанщтIу. Швпны ауи апшта йшвтахъыхым ргIапсга швымазтын хIара йгIахIышвт йауаштI. ХIа ауат йырзыбжу йрыхIтуаштI», – хIапхьагIвчва тшырзыналырхатI аквта аунашвачпагIв.
Лара лхъа йгIаквылххитIта Милана зылшараква мачIу асабиква ранчви рабачви йымшвауата апхьартаква йшрыртуаш, ауагIа йшрылардуш йаквгIазшIылтитI. Милана лхъатала асабиква зымгIва ъацауа апхьарта дгIалгатI, йшылхIвауала, лыквлагIвчвагьи арыпхьагIвчвагьи «дара драпшта йылзаъан, йакIвым закIгьи гьгIарызбжьамшвузтI».
«АцIайква рсабихъа рыквшвымхын, рыквлагIвчва йрабадырргIатI. Швымшван швсаби ажвлара дрыларымжьуашта. ШвгIашIазкIуата швхъа йташвкIыта йшвыму швзахъыпуштI», – йылрыбагъьитI Аджьба Милана.
Йъадзанхауа щардамызтIхIва аквта дахIврагьи амапI.
«ХIпны йаъапI сквш 25 йырту уагIа, апхъала ауат аурам йгьыквмылуазтI. Ужвы дара-дара ажвлара транспортла йхIызгIайитI. ХIзайъазаквауа Гагра район акытква шабгу йрыуапI», – йгIахIгвынлыргIвытI ауи.
УахьчIва аквта апны ачымазагIвква айъазара физкультура, тшарыщцара физкультура ддрычпитI, массаж йырчпитI, апсихолог дрыдынхалитI. Логопеди дефектологи гIарднысгьи ргвыгъапI. Айъазара ахъазла ачымазагIвква ахча гьыртийуам.
Томосян Сергей аквта апны реабилитологта дынхитI. ЙхIаракIу медицина дырра ауи Армения апны йауын нхара йпсадгьыл дгIайхтI – йабашталагIвчва дырцхърагIара ахъазла.
«Са сайгвыргъьитI хIсабиква закIыла срыхъварныс лшара ъасыму. Са скъраль швабыж бзи йызбитI. СырзыразпI хъатакIла тшызымкIуа ауагIа. ЦхърагIара щарда гIахIадзитI. Зджьара йгIанымхауата йхIгвапапI АААК гватрадъа хIшгIанырымжьыз. ГIалцIыртата йхIыму щардахапхьадзагьи хIуыс рыцIа йнардзата йхIзычпалуштI», – йхIватI ауи.
Бениа Камила 16 сквша дыртапI. Ага лзгIвадара аъаща йгIалцIла йылзычпауа мачIызтынгьи Цандрыпщ йгIвбахауа аквтанай апхьарта апны жвкласск дгIарылгатI. Ауи ъагIалдахIвыз ареабилитация квта абзирагьи алапI: лара йшылхIвауала, аквта адиректоргьи апсихологгьи архъвыхраква тшанырзылрыхIазыруаз ддыргвышхвалун.
ЛызгIвадара шгIащаквлыргылхуа данаквчважвауа Камила дашIамсуа дгвыргъьитI. Ауи аквта «гвыргъьахъвыкI дцауазшва» дцалауата лхIвитI.
«Реабилитация бзита йакIвшитI. Аквта саннашылуа снашхква бзипI, йауа ухIварыквын ауаъа гвапара, пхара гIвнапI. Араъа уангIашылуа угвыргъьара, ухъыччара утахъхалитI. Уызлалуа ауагIа къарукI гIауыларцIитI, ареабилитологквагьи, апсихологгьи, лара адиректоргьи йырхьырпшыру ацIайква швабыж йрызбзипI – ауи уаргвыргъьитI», – ллахIвараква хIыцагIвылшатI Камила.
Агвапари апхари йырхъазымкIва апхIвыспа аъачIвагIагIвчва руыс йшазъазугьи гIалылкIгIатI.
«Арат ауагIа сара йгIвбахауа йстгIачвата йсзалтI, швабыж йгIахIайгвгIвитI, заджвгьи дгьгIалыркIгIум – ауи магIын ду амапI. Анчва дырзыразхатI йъахIайгвыгIвуа, ргватра ъахIзалырхуа, хIъагIаргвынгIвуа ахъазла. Анчва дырзыразхатI руыс шгIардахIвуаш йъащту. Са сайгвыргъьитI хIкыт апны ари апш квта ъагIахъыртIыз. ХIпны ЗМА щардагIвыпI, айхIарагIв СогIвым уагIвста зджьарагьи йгьзыцум. СайгвыргъьитI аквта тшъауацIнахуа, араъа уыс щарда ъадыргалуа, ауат джьащахъвата, ухъыркъьалуата йъакIвшалауа», – лажва налырдзатI Бениа Камила.
Цандрыпщ кыт апны йаъу «ХIара хIацыпI» ГвчIагIвчпара квта хвыдъа йынхитI, рцхърагIара йазыбжу зымгIва гIарахвныс йхIазырпI. Аквта Facebook, Instagram рпны урабадыр йъауаш рбгъьыцква рымапI. +7 940 965 10 30 номерла телефон уырзасгьи йауаштI.
швталра йа тшаншвцIара атахъыпI.