Адуней
апсуа-абаза
конгресс

АшIыпIа хъвшараква рыцынхарала АААК ахъвшара «Аимадара» проект апкъ йтата Аджьба Т.Ш. йыхьыз зхъу Ачандара аквтанай апхьарта апхьагIвчва рыхъаз амдара мшы адыргалтI. Ари азын апхьагIвчва ахIбачва Уатап йаъу Абраскьыл йхIатшпи Мыкв акьльиси йыргатI.
Амш ацIыхъва ацIайква йпшдзадзу Черниговка быхъвбжьара апны чара рзадыргалтI.

Апсынгьи Россиягьи рпны спорт йамастерыз Бебиа Олег асквш 2023 май а 10 атшын йазалху айсра аоперция (СВО) апны йырхвыз айсчва шгIатыргахуазымца дырщытI. ЙгIайырбаз ахъацIара ахъазла ауи Россия Федерация ахъахчара а-Министерства амедаль, АхъацIара аорден йгьи 1-хауа астепень зму Георгий йджьуар гIайквнадыргатI. «Сокол» зшIытга хьзыта йызмаз айсыгIв дшгIабзазази дшщхази ажурналист, АААК апхIвыс совет аунашвахъцIагIв Бебиа Екатерина лгIвыра апны швапхьа. https://abaza.org/abq/1160

 АшIыпIа хъвшараква рыцынхарала АААК ахъвшара «Аимадара» проект апкъ йтата йызкьазууыз амдара мшы Чочуа А.М. йыхьыз зхъу АдзыгIвбжьа кыт аквтанай апхьарта апхьагIвчва рыхъазла йадыргалтI. АпхьагIвчва ахIбачва 20-гIвы рарыпхьагIвчвагьи рыцта Афон ШIыц ахIатшпы йталтI, уацIыхъван Ивера бхъвы йхъалтI. Арат ашIыпIаква рквпшыра пшдзи ртурых байи заджвгьи гвалымста дгьгIанырымжьтI. Амдара ацIайква лахIвара мчгьи гIахътIра шIыцгьи гIарнаттI. ШIыцра  щардала йырчвыз амш Псырдзха дзыгIв атшпы апны чарала йалгатI.

АААК ЙхIаракIу асовет аунашвачпагIв Эгьзакь Мусса рапхъа дгылата Санкт-Петербург апны йгIаныршу Адуней апсуа-абаза конгресс ашта хъвшари Санкт-Петербург апсуа диаспори Можайский А.Ф. йыхьыз зхъу Айсра-уапчахв академия акурсанткви асквшква 1941-1945 рагIан Абашта айсра Ду йаладзыз айсчва гIаргвалашватI. Ауат Пискарев нышвынтара апны Къарча-Черкеси Апсни йрыуата айсра йаладзыз афырква рчвахъабагаква хIврапшдза рзыщтIарцIатI.
Ашвъаква йшгIархIвауала, айсра агIан Апсны йауата зкьгIвы 55,5 Ар Къапщи Айсра-тенгьыз флоти рпны къвырльыкъв рхарныс йызшIырттI. Ауат йрыуата 17-н зкьыгIв райхIа гьгIацампахтI.

Адуней апсуа-абаза конгресс Очамчыра район йаланакIуа АкIваскьа кыт апны диспансеризация акIвнаршатI. ЙанакIвызлакIгьи апшта, ауи гIвхъвыкIта йалан: йапхъахуз амш апхьагIвчви арыпхьагIвчви рща дырхъвыхныс йарттI, йгIвбахуз амш архъвыхра агIарбараква рымата айъазагIвчва гIарпшытI.
ЗымгIва шалу апхьагIвчвати апхьарта йанхагIвчвати 100-гIвы райхIа архъвыхра йгIакIылстI. ЗызгIвадара йахьпшра атахъыта йырбаз дугьи хвыцгьи кIьыдата йазалху рхъвыхра йгIакIылсырныс йырщтитI.
Апсны акытква рапхьартаква рапхьагIвчва рдиспансеризация – ареспублика згIвадарахчарала а-Министерства ацхърагIарала Адуней апсуа-абаза конгресс йархъйауа проектпI.

А-Конгресс агвып ауагIахъа спорт хъвмарщаквала йызкьазууыз атшыбжьара АгIвдза Б.Д. йыхьыз зхъу Афон ШIыц аквтанай апхьарта апны йакIвдыршатI. АпхьагIвчва «АимцакIьачара» ахабзаква рархIвтI, ауи анахьанат анкъвакъвраква йызларапшым гIалыркIгIатI. Ауатква ангIаргвындыргIвы ачкIвынчва гIвгвыпкIта тшагIвыршан йапхъахауата йхъвмартI.
«АимцакIьачара» уыжвгIанчIви регби йашIырпшу апсуа уагIахъа хъвмарщапI. Ахъвмарра ахабза йшгIанахIвауала, акапитанква йдучвам ауабчватоп лабала йаситIта дара ргвып ахъвмарыгIвчва йырзауырщтитI. Атоп гIазкIуа, ауи йнапIыцIызхныс йащтата йпшIагылакву тшдимыркIуа, ласыта ахъвмарырта ахъа днадзара атахъыпI.
АуагIахъа хъвмарщаквала апроект асквш 2022 йгIашIарышвта йынхитI. СынчIвагьи АААК Апсны акъалакви акыткви йгIархъыкIвшауамца амастер-классква ракIвыршара атаджвыквнацIахтI. Йагъьу агвыпква анкъвакъвра рзадыргалуаштIта айгIайыгIв дгIадрыбергьыльуаштI.

АшIыпIа хъвшараква рыцынхарала АААК ахъвшара «Аимадара» проект апкъ йтата йызкьазууыз амдара мшы аднагалтI. Ари азын ауи йаланакIтI Мгвыдзырхва кыт аквтанай апхьарта апхьагIвчва. Дара ацIайква рахIварала ауи амш Апсны амарагIайыртала йаныргIалу Анчва йпщылу ашIыпIаква йырзалырхтI: Дранда, Мыкв, Елыр рпны йаъу акьльисаква йгIарыкIвшатI. ЧIыдата ауат Уатап апны Абраскьыл йхIатшпгьи ддырбатI. АмгIва аурала асабиква йырбуз йамагIну ралхIвуан Мгвыдзырхва апхьарта турыхдыррала арыпхьагIв Гвынба Саида. АщардагIв арат ашIыпIаква йапхъахауата йцатI, зынгьи йгьрымбасызтI. Даргьи джьащахъвара щарда рдыртI.
Ага амгIва йаквнащызтынгьи, апхьагIвчва амш ашвахIварали гIахIврали йалдыргатI.