Адуней апсуа-абаза конгресс

Адуней апсуа-абаза конгресс атурых ащайдзаква асквш 1992 йгIаджвыквлитI. Ауи агIан, Апсны ауагIа р-Абашта айсра анакIвшуз, апсуа-абаза уагIахъа ргIащтийыгIвчва йапхъахуз райззараду апны Апсуа-абаза уагIахъа рдуней адкIылара (МАААН) гIандыршатI. УацIыхъван ауи аргIапсщагьи ахьызгьи тшырпсахтI.

Хвысквшала утхъахта (асквш 2017 декабрь а 7-9) СогIвым апны апсуа-абаза уагIахъа VII райззараду акIвшатI. Ауи адкIылара атурых ашIчIвара шIыц йагIаджвыквцIагахатI. АдкIылара даунашвачпагIвта далырхтI йбергьльу ажвлара йгьи акъральыгIва уыснкъвгагIв, абзихагIв Эгьзакь Мусса. ЙдрыбагъьатI ахьыз шIыцгьи – Адуней апсуа-абаза конгресс (АААК).

Йара адкIылара аргIапсщагьи щардала тшапсахтI: ауи апшта, апрезидент йгьи асекретарь хъада ръанатIаква нырххтI, орган шIыц – ЙхIаракIу асовет – гIандыршатI. Декабрь агIан зынхара йалагаз айззараду асквш 2018 мартI агIан анхара нанардзахтI: аделегатква адкIылара аустав шIыц лырхра, ЙхIаракIу асовети архъвыхра комиссии йрылазлуш щаквдыргылра, йауырщтуашыз ахабарргарта интернет-портал шаъазлуш йазхъвыцра ахъазла заман атахъын.

ШIыцта йлырхыз а-Устав йшгIанахIвауала, айззарадуква, ауи апхъала йшаъаз апшта, хвысквша рпны зны йакIвшара атахъыпI, анахьани азаман ауацIа уыста йаъу зымгIва ЙхIаракIу асовет йалнаргитI.

АдкIылара апхъагылагIв шIыц Эгьзакь Мусса йгIаджвыквцIарала ауи анхара анархара хъада тшапсахтI: АААК ашта йгьи ашIыпIа хъвшараква гIандыршарныс, адиаспора ъату къральипхьадза ахъазла кIьыдата программа лырхырныс йаквыркIтI.

Ауаъа йнанаркIыта Апсны акъалакви акыткви рпны АААК ашIыпIа хъвшараква гIаншауа йалагатI. Ауат затахъыз шIыпIипхьадза апны ауагIа ззыбжу атамам гIардырра, ажвлара гIаршIыхата ауыс йазгIащтIыхра рыхъазла акIвын. Эгьзакь Мусса йшипхьадзауала, абарауаса акIвпI кытипхьадза атшауацIыхра апрограмма дара абзазагIвчва йлырхра ахъазла щата шгIануыршуш. Ауи акIвымкIвагьи ауи анхара Апсны апны акъральгIв жвлара рыбагъьара йгьи тшауацIнарыхра йахъвитI.

АААК агвып шабгу багъьата йхъарцIитI: а-Конгресс амурад хъада – апсуакви абазакви йъабзазалакIгьи йадкIылта ауагIахъа разыгIальаматра йазынхауа ауыхвара йгIаланаркIра – анузырхъйуш гIвычIвгIвысипхьадза йылшараква шйызгIарысабапуаш апш аъащаква ангIануыршара акIвпI. Ауи амурад бзидздзата йазынхитI АААК йгIаннаршаз ашIыпIа хъвшараква.

УахьчIвала ауат Апсны арайонква зымгIва, ареспублика акыт йгьи акъала 54 рпны йгIахъыртIытI. ХачIвыта йгылапI ауи ауыс акыт 112-гьи гIаланаркIра. Ужвыгьи жвахъвшаракI Трыквшта апны йынхитI. Йшалу йгIауахвырквын, Апсны утыцIта АААК ауысхартаква арат йрапшу акъалаква, аштаква, акъральква рпны йынхитI: Санкт-Петербург, Москва, Къарча-Черкес, Къабард-Балкъар, Ставрополь шта, Иордания, Германия, Нидерланды, Бельгия, Великобритания.

АААК агвып йдырхъйауа апроектква йапшым анархараква гIарыцIаркIитI: ауат йрылапI арыпхьарала апрограммаква, агвчIагIв акцияква, спорт, культура, хъмаштылра йырзынарху ауыс пхатшаква, ауысапхьагIвчва ранкъвакъвраква. Ауи акIвымкIвагьи адкIылара ауысхагIвчва Апсны апны йакIвшауа ажвлара уысква йрылазлитI.

Асквш 2018 май мыз агIан Адуней апсуа-абаза конгресс ахъада шIыц йхъвдаквцIараква йырхъйауата йапхъахауата агIвыма къраль дцатI. Эгьзакь Мусса адкIылара архъйагIв секретарь Гьыцба Инар дйыцта Трыкв Республика дцан Апсуа культура квтаква рфедерация (Апсуафед) аунашвахъцIагIвчва дрынйатI. Ауаъа дъадзаныз ауи Апсуа культура квтаква Астомбыльи Адапазари рпны йадыргалыз, культура нархара змаз алалраква дрылан. Ауи ацара мурад хъадата йамаз абадырран – АААК аунашвачпагIвчва шIыцква рыхъаз магIын ду аман Трыквшта йаъу апсуа-абаза диаспора йрабадырта рацынхара анархараква лырхырныс. Адиаспора рапхъагылагIвчвагьи АААК ауысхагIвчва багъьата йгIадыргвыгъатI агIвыма къральква йыртабзазауа хIабашталагIвчва а-Кронгресс ауацIагьи Апсны апынгьи йыншауа ажвлара йгьи акультура нхара джьгарта йшалазлуш.

Йара ауи асквш октябрь агIан а-Конгресс аделегация – ЙхIаракIу асовет аунашвачпагIв Эгьзакь Мусси архъйагIв секретарь Гьыцба Инари – ужвыгьи зны нхара уысла Трыкв Республика йатацахтI. Ари азын ауат рпахь хачIвыта йдыргылтI АААКи адиаспораква радкIыларакви – Трыквшта йаъу Апсуа культура квтаква рфедерации (Апсуафед), Трыквшта йаъу КIавкIаз уагIахъаква ркультура квтаква рфедерации (КIавкIазфед) ­– шацынхуш рыцIа йалыргата йаквчважвата Трыкв Республика апны а-Конгресс анхара аргIапсща щаквдыргылырныс, Трыквшта апны АААК уыста йархъйуш цкIы-цкIы йлырхырныс.

Анйараква Астомбыль, Анкара къалаква, Сакарйа шта рпны йакIвшатI. АААКи Апсуафеди рунашвачпагIвчва рацынхара ауысла апротокол мачвы ацIарцIатI. Ауаъа йанын зыжвла азакIу, йазаъу ауагIа абараура, Трыквшта йаъу апсуа-абаза диаспори ауат рыжвла ъану рпсадгьыли ращтаныкъвара ауацIыхра йгьи йрыбагъьара шатахъу. КIавкIаз уагIахъаква ркультура квтаква рфедерация аунашвачпагIвчва йанрынйа уыс щардала йагвынгIвытI. Ауи акIвымкIвагьи аделегация Трыквшта апны Йазалху хъвдаквцIара зму Россия рхIвачIвгIвы Ерхов Алексей йынйатI. Ауаъа, Россия агIвымакъраль уысквала а-Министерства аунашвачпагIвчви а-Конгресс йхIаракIу асовет ахъади шангIалыз апшта, Трыквшта апны йдырхъйауа, магIын ду зму акультура-гуманитар проектква а-Конгрессгьи шрылазлуш йаквчважватI.

Адиаспора рабадыррала анхара асквш 2018 агIан Трыквшта царала йгьгIашIамстI. Асквш 2018 ноябрь агIан АААК агIаджвыквцIарала Санкт-Петербург апны апсуа-абаза диаспора ранйара акIвшатI, ауаъа акъала йтабзазауа, Апсни Къарча-Черкеси йгIартыцIта ауаъа йапхьауа абаза швкIыгIвпхьадзара айззатI. Анйара далан Россия апны Йазалху хъвдаквцIара зму Апсны рхIвачIвгIвы Аха Игорь. Ауи йгIаликIгIатI ари йапшу айззараква апсуа-абаза уагIахъа йгIарыцIанакIуа зымгIва радкIылра йшацхърагIауа.

Асквш 2018 адкIылара атурых апны гIаншара дута йалыз датшагьи шIыцракI гIалалтI, йаргьи ауи кIьыдата йгIалукIгIушта йаъапI: Адуней апсуа-абаза конгресс анхара анджвыквнацIа амщтахь дукI йнамихуата хабарргарта портал ауырщттI. Адуней шабгу апны йбзазауа апсуакви абазакви рыжвла ъану рпсадгьыл апны йыншауа дырхъвыхырныс, руагIахъа ртурыхи рцIаскви ддырдырырныс, йайчважварныс, а-Конгресс апроектквагьи йгIарылалырныс лшара раутI. АААК ахабарргарта портал аунашва асквш 2018 сентябрь а 18 агIан Апсны ателебара астудия апны йакIвшаз апресс-конференция апны йапхъахауата ауагIа йрыларгатI.

Хвысквша руацIа абаза уагIа ртурыхи ркультури йгIарыквчважвауа аматериалква ахабарргарта портал цбызшвакIла йгIаталитI; ари ауатыкв апны хабарргарала, ауагIа дырра рылагарала апроектква узырхъйитI, Апсны апны, адиаспора рквта йыншауа узыхIвитI. Ари йапшу анхара, ажва аламкIва, хIуагIа йрыуата йапшым акъральква рпны йбзазауа адукIылырныс лшара ду гIаунатитI. Апортал дырцитI Лазба Амина унашва зхъылцIауа АААК хабарргарала ахъвшара анхагIвчва: Бгъанба Щазина, Базба Селма, Чхеидзе Денис.

АААК агвып рынхара шджвыквырцIабыргуаз асоциал проектква – чкIвыныргIи спорти йырзынархугьи рылата – йшрыцыркIуаш йгьи йшдырхъйуш дырцIабыргтI. Асквш 2018 июль агIан адкIылара ахъпшылра йацIата V Абаза уагIа рхъвмарраква акIвшатI, ауат АААКи абаза-апсуа уагIахъа ртшауацIыхра ацхърагIара знархару «Алашара» Дуней адкIылари йацыта йадыргалтI.

ЙыззабакIуаз асогIакI а-Конгресс гIанзыршаз йрыуазаджву, Апсуа-абаза уагIахъа рдуней адкIылара (МАААН) йапрезидентыз аюрист наукаква рдоктор, апрофессор Шамба Тарас йыхьыз ахъхIвалгIан. Анкъвакъвраква йрылан Апсны йалакIыз ркоманда, Къарча-Черкес, Къабард-Балкъар, Москва, Савропольшта, Иордания, Трыквшта йрыуаз аспортсменква. Ауат футболла, волейболла, апхънысрала, хысрала, махъвшIала абакIрала, парала, хрихыцаущтрала, нахъгIахъла рыцIа йымчу гIадырбун.

Къару ду аланацIитI АААК анаука тшауацIнарыхрагьи. Ауи апшта, асквш 2018 агIан Эгьзакь Мусса Апсны анаукаква р-Академии «Алашара» жвлара адкIылари йацыта йлырхыз «Абазакви апсуакви: абызшвакви атурых-культура тынхи гIащаквыжьра йгьи тшауацIдрыхра» программа йрыбагъьатI.

Апрограмма йалапI архъвыхра нхараква акIвыршара, этнография материал азкIкIра йгьи ашвъа йанцIара, апсуа йгьи абаза апхьахьаква рнаука нхараква гIацIщтрала ахачIвква.

Апрограмма архъйара йгIалалтI рыцIа йымчу апсуа йгьи абаза апхьахьаква – агIвыма къральква рпны йбзазауа, зыжвлала йапсыуу йа йабазу архъвыхыгIвчвагьи, абызшваква ргIахчарала йгьи тшауацIдрыхрала швапха зырхIахьаз агIвымакъраль ъачIвагIагIвчвагьи рылата.

АААК джьгарта йалата асквш 2018 июль а 23 Черкесск апны Абаза уагIа ркультура амши Апсны Республика абаракъ амши йауацIыхта йдыртлапIатI. Апсни Къарча-Черкеси рпны йакIвшуз алалра дуква йгIарылалтI Трыквшта йаъу адиаспорагьи. Эскишехир къала йаргвану Тандыр кыт апны агвыргъьара хъвмарраква акIвшатI, ауат хIабашталагIвчва 1500-гIв раъара рылан.

Йара ауи асквш сентябрь а 30, Апсны АйгIайри Ахъахвитри рымш агIан, Москва, «Пресня Къапщы» парк апны Москва йту апсуа диаспора йадыргалыз Апсуа культура афестиваль «Апсны» акIвшатI. А-Конгресс афестиваль йалан, ауаъа йандыргIалыз АААК атып апны аволонтерква йгIадгылуаз ауагIа адкIылара уыста йахауа, мурадта йаму, адуней шабгу апны хIабашталагIвчва адызкIылуа а-Конгресс анхара апны йгIалнакIгIауа абайараква рархIвуан. Йара ауаъа апсуа цIасква йрыквыргIапста этнография шта ауацIырхын «Апсны атурых йалаз аныпква» гIарбарта адыргалтI. Афестиваль йгIадгылкваз швъа ргIвыта АААК йалалырныс лшара рыман.

Йара ауи атшын, сентябрь а 30, СогIвым апны АААК Адзтшпыурам апны саби гвыргъьахъв аднагалтI. Аниматорква ацIайква рыла ъадзадырпшуаз адуква ауагIахъа гIахIвыщала йанкъвакъвуан йа Адуней апсуа-абаза конгресс атурых йазынархаз азцIгIараква джьауап рыртуан. Ауатква йрылалуаз зымгIва АААК агвып рсогIаква рыквшвун. Сасчва кIьыдата ауи агвыргъьахъв йдрайгватI «Киараз» гвчIагIв адкIылари «Ашана» культура-гвчIагIв фонди рхъпшылра йацIу асабикви асквшква 1992-1993 рагIан йакIвшаз Апсны ауагIа р-Абашта айсра аветеранква ргIарикви.

Агвып шIыц рынхара йапхъахуз асквш агIан йджвыквылтI уацIыхъван йцIасхаз акция «Агвы апхара». Адзын ангIатал, сентябрь агIан, Трыквшта йаъу апсуа-абаза диаспора йрыуу хIыгIвычIвгIвысква АААК ЙхIаракIу асовет йалу, Трыквшта апны АААК ашта хъвшара аунашвачпагIв ХIапIатI АхIмад йгIаджвыквцIарала чгIвыча пха комплект 1200 азыркIкIын Апсны апны атгIачва къвльейсызква йрырттI.

ХIапIатI АхIмад ахча азкIкIра акультура квтаква (адарнагьква), ахIаракьатчпагIвчва гIаланайыркIтI. Октябрь а 4 ачгIвычаква СогIвым йгIаргтI. АААК ахIапчыпква зымгIва ажвлара йгьи агвчIагIв адкIылараква, репатриацияла Апсны а-Министерства (ужвы репатриацияла Апсны Республика АкъральыгIва комитет) йырнатын, ауахьауатгьи ачгIвычаква йырзыбжаз йырзыргахтI. Агъын чгIвыча комплектква рызджьакI асквшква 1992-1993 рагIан йакIвшаз Апсны ауагIа р-Абашта айсра йарныкъвадыкъвата Гагра йаъу а-Республика реабилитация квта йыцIу айсчва йырзалырхтI.

ТIакIв анцIы акция атаджвыквырцIахтI – ари азын ауи адыргалтI АААК, Трыквшта Апсуа культура квтаква р-Федерация (Апсуафед) йгьи «Алашара» жвлара адкIылара. Агъын чгIвыча шIыцква Апсны апны цхърагIара йазыбжу атгIачваква Асквш шIыц гIаталуашта йрырттI. ЙащтагIайуаз асквш 2019 агIангьи ахIапчыпква йызнымкIва йыршатI, абарауаса гъын щапIхъацIа агIвызарата 1000 Апсны йгьи Къарча-Черкес рпны зтахъы намхъауа ацIайква йрырттI.

АААК ахачIв хъада – апсуа-абаза уагIахъа йгIарыцIанакIуата адуней йыкву зымгIва адкIылра, абашталагIвчва ращтаныкъвара рыбагъьара – дырхъйауата АААК аунашвачпагIвчва асквш 2019 ауацIа апсуа-абаза йгьи убых диаспораква ъану акъральква – Трыквшта, Египет, Иордания, Великобритания, Нидерланды, Бельгия, Германия йцатI.

А-Конгресс агвып адиаспораква ргIащтийыгIвчва, хIабашталагIвчва ъату акъральква рыжвлара йгьи рполитика уыснкъвгагIвчва йрынйатI. Анйараква сабап гIаргтI: ауысхагIвчва абадыртI, йшацынхуш лырхтI. АААК адуней шабгу апны апсуа-абаза тгIачва ращтаныкъвара зрыбагъьауа, аэтнокультура байараква апхъала йназрыскIьауа, адиаспоракви ауат рыжвла ъану рпсадгьыли шацынхуш йацхърагIауа адкIыларата тшгIанарбатI.

АААК Апсни Трыквшти рыкъалакви ркыткви рпны ашIыпIа хъвшараква гIаныршарала анхара гьашIанамрыстI. Асквш 2019 ауацIа ашта хъвшараква Мараташварта Европа акъральква рпынгьи йгIаншатI: Великобритания, Голландия, Бельгия, Германия. Апсны апны ашта хъвшара дахъадзгылтI АААК архъйагIв секретарь Гьыцба Инар.

Ауи агIан Реквава Темур (уацIыхъван ауи СогIвым апны АААК ауысхарта даунашвачпагIвхатI) унашва зхъицIуз Санкт-Петербург апны йгIандыршаз АААК ашта хъвшари Санкт-Петербург АуагIахъаква ртдзи асквш 2019 агIан ацынхарала ангIалра мачвы ацIарцIатI. Ауи абзирала ауат йапшым ауысква – ауагIахъа гвыргъьахъвква, асеминарква, анаука-практика конференцияква, ауатыкв айчважвараква, аршIыйара анйараква, аконцертква, датшагьи щарда – йалата йакIвдыршаларныс рылшитI. Санкт-Петербург апны АААК ашта хъвшара йаланакIуата агIахIвчва гвып «Абаза» гIандыршатI. Джьгарта тшгIадырбатI асквш 2019 агIан Гвдауыта ашIыпIа хъвшара ауысхагIвчва: ауат хпроекткI дырхъйатI – воркаут-тшыбжьарта руыхватI, акъала апны анышвкъваратапсартаква дыргылтI, апхьартакIгьи дзцага азыргатI.

Асквш 2019 агIан хъвшара шIыц – АААК Аппарат – гIандыршатI. Ауи АААК ауставла анхара аднагалитI, йаму ахъгалраква йыртымцIуата ЙхIаракIу асовет аунашвачпагIв йхъвдаквцIараква шырхъйахауа йахъпшылитI. Аппарат даунашвахъцIагIвта апсуа дипломат Таниа Кан ддыргылтI, ауи дитарагылыгIвта – Калинкин Михаил, ужвыгьи тарагылыгIвкIта, хабарргарала аполитики абадыргакви унашва рхъцIарагьи ацйырцауата, ддыргылтI Тарба Тенгьыз.

Аппарат йалкIгIу гватра а-Конгресс ашта йгьи ашIыпIа хъвшараква рынхара агвныргIвра йазалнахитI. Ауи акIвымкIвагьи ауи йахъвдаквпI а-Конгресс асквш хачIвква рыхIазырра, ауат ЙхIаракIу асовет аунашвачпагIв йпны йрыбагъьара, рырхъйара ахъпшылра, асквш ауацIа анхара афинанс датшагьи агIарбараква гIапхьадзара, аунашвачпагIв дрылата йакIвшуш айззараква адгалра, ауагIа ртшазынархараква рылапшра, датшагьи ауысква аунашвачпагIв йшрыхъвдаквицIауа апшта йырхъйара.

АААК агвып шIыц адкIылара алаща чкIвыныргIа йгьи апхIвысква рсоветква аларцIатI, ауат рынхара ашIари ахIвссакви ргвы ззыбжу ауысква сабап алата йырхъйара йазынархапI. Асоветква рхъвшара хъадаква рпны йынхушыз уагIа гIараутI. Ауат ацасуа йъанхаз абзирала асквш 2019 ауацIа Асабиква рхчара адуней мшы йгьи Апсны Республика акъральыгIва баракъ амш йрапшу агвыргъьахъв дуква адыргалырныс рылшатI.

Асквш 2019 апрель агIан АААК ащтийыгIвчва, Санкт-Петербург апны АААК ашта хъвшара йаланакIуа агIахIвчва гвып йгьи а-Конгресс йалу ашвахIвагIв Шашура Диана Санкт-Петербург апны IХ КIавкIаз ауагIахъаква ркультура афестиваль йалан.

Май агIан АААК йалакву а-Конгресс ЙхIаракIу асовет аунашвачпагIв Эгьзакь Мусса драхIбата, датшагьи апсуа-абаза диаспора йрыуу ауагIа Санкт-Петербург апны АйгIайра амш йазынархаз агвыргъьахъв алалраква йрылан. Ауат Апсни Къарча-Черкеси йрыуата Ленинград зхчауата зхъа щтIазцIаз айсчва рчвахъабага гъвквагьи ъакIыду Пискарев нышвынтара апны ахъмаштылга синква хIврапшдза рзыщтIарцIатI.

КIавкIаз айсра йаладзыз ауагIа рхъмаштылра амш, май а 21, АААК йапхъахауата апсуаква йырцIасу ачвамза Ащамакъи НартргIа рмгъымци адыркIын ХIХ асквшышв йрыцхIагIаз агIаншаракви амхIаджьырри рзарар зквшваз зымгIва рджьабауата алалра адыргалтI. Ауищтара ауи акция цIасхан ансисквша йакIвдыршитI.

Асквш 2019 агIан Адуней апсуа-абаза конгресс йгIванхауата Москва апны Апсуа культура йхътIу афестиваль «Апсны» йалалтI. «Пресня Къапщы» парк апшцIа йакIвшуз афестиваль апны а-Конгресс атыпгьи нхун, ауаъа йызтахъыз дзачIвызлакIгьи АААК далал йауан.

А-Конгресс Адырраква рымш агIангьи хъатакIла йгьымгылтI. АдкIылара анхагIвчва Апсны апны йапхъахауа акласс йцаз асабиква зхъкъьа апсуа алфавит, апсуа бызшвала ажважвкви ауагIахъа дамыгъакви рныз тетрадь хвынзыкь рыларшатI. ЙащтагIайуаз асквш йара ауи апш акция апкъ йтата йрыхъвуш асогIаква апхьартаква йрыцIалшIыцыз асабиква йрыквшватI.

Асквш 2019 мартI агIан Санкт-Петербург апны уыжвгIанчIви заман зыхьыз дута йгаз агIвгIвы Искандер Фазиль дангIадрийызищтара сквшы 90 ъацIуаз йазынархата литература хъвлапны акIвшатI. Ауи АААК ашIыпIа хъвшара йалу чкIвыныргIа йадыргалтI. Ахъвлапын апны ачкIвынчва йгьи ахIвсса шIаква Искандер Фазиль йуысакви йгIахIвахраква ршIчIваракви йгIарыпхьатI, апсуа йгьи абаза ашваква рхIватI, ауагIахъа гIахIвыщаквала йгIахIвытI.

Июль агIан Къарча-Черкес апны ансисквша йакIвшалауа акультура-спорт фестиваль «Абаза» акIвшатI. Ауи гIахъыртIытI Абаза уагIа VI рхъвмарраква. Ауат йрылан Россия йапшым аштакви агIвыма къралькви йгIартыцIыз уагIа 600-гIв райхIа. Афестивальгьи анкъвакъвраквагьи, йанакIвызлакIгьи апшта, Абаза-апсуа уагIахъа ртшауацIыхра ацхърагIара знархару «Алашара» Дуней адкIылари Адуней апсуа-абаза конгресси йадыргалтI.

Йара ауи асквш октябрь агIан АААК «Абаза» фестиваль Апсны апынгьи йаднагалтI. Ауи йалан апсуа йгьи абаза гIахIвчва йгьи амакъымршIыйагIвчва гвыпква; афестиваль апкъ йтата агIарбартаква, апсуаква йгIадрысабапуа басон алапащала (схьа мачвыла йалапара – аредакция ррытаразга), хьапщ рахъвала тадзахрала амастер-классква адгалан, апсуа-абаза рызкъква рыпшцIа нхун.

АААК анхара апны рахIа магIын ду ззырбауа анархараква йрыуазакIыпI апсуа йгьи абаза бызшваква гIащаквыжьрала анхара. А-Конгресс, абызшвадырыгIв ПIаз Сергей дахъпшылуата, рыцIа йымчу апсуа йгьи абаза апхьахьаква алата цри бызшва, атурых, алитература хчара йгьи тшауацIдрыхрала асквш 2026-дза йдырхъйуш программа арыбагъьатI. Апрограмма АААКгьи «Алашарагьи» рсайтква рпны уапшы йауаштI. А-Конгресс аъачIвагIагIвчва йрыцынхауамцара абаза бызшва арыпхьарала аметодика цхърагIагаква йзакIымкIва йлырхын йгIацIырщттI, авидео апхьарасахIатква дрыхIазыртI, щардагIвы бзи йырбауа амультфильмква абаза бызшвала йатаркIтI, ашва шIыцква аларцIатI.

А-Конгресс датшагьи магIын ду змата йархъйауа анархараква йрыуапI арыпхьарала апроектква. Араъа зымгIва йрапхъата СогIвым йаъу АААК ауысхарта апны асквш 2019 агIан йгIандыршаз Айкьангьашырта клуб анхара гIалукIгIушта йаъапI. Айкьангьашырта клуб апсуаква ргвбайара, ртурых, рэтнография, рлитература, абашта наука атшауацIыхра, апсабара ахчара йырзынарху йхътIу айчважвараква адугалырныс, йагъьу аъачIвагIагIвчва гIазшIутуамцара йапшым аинтерактив анйараква акIвуыршарныс лшара гIауызтуа уатыквпI. Ауи йайхIахугьи – Айкьангьашырта клуб апны грант гIатуга йауитI. ДзачIвызлакIгьи ажвлара рыхъаз магIны зму проект йымазтын араъа ауатыкв йгIатайгата, аъачIвагIагIвчва алайырпш йауитI, ауат йдрыбагъьузтын – АААК ЙхIаракIу асовет аунашвачпагIв Эгьзакь Мусса ауи злайырхъйуш ахча гIайыйтуаштI.

Йара ауи асквш 2019 агIан АААК апны Ан-абачва рклуб нхауа йалагатI. Ауи ан-абачви асабиква ргIзара-бжьара йапщылу йапшым аъачIвагIагIвчви йранйартапI. Ауаъа йакIвшалауа, ан-абачва рборчи агIариква рбжьащи йырзынарху айчважвара-амакIыраква рформат щардагIвы йыргвапхитI, йазыразта ажва бзи азырхIвитI.

Асквш 2020 агIангьи СогIвым йаъу АААК ауысхарта апны Айкьангьашырта йгьи Ан-абачва рклубква джьгарта йынхун. Асквш ауацIа апсабара ахчара, экология, ани асабии рзгIвдара, психология йырзынархаз анйара 20 акIвшатI. Асквш аурала йгьашIамстI ашIыпIа хъвшараква гIахътIрала анхарагьи: Апсны апны ауи апхъала йгIандыршаз ашIыпIа хъвшараква ужвыгьи 31 гIарылахIатI, Трыквшта апны – 8.

А-Конгресс агвып уыста 28 адыргалын йакIвдыршатI, Апсны Республика абаракъ амш йазынархаз агвыргъьахъв адгалрагьи йалан. Асквш 2020 агIан арыпхьарала магIны змаз йапшым апроектква джвыквырцIатI. ЙгIалкIгIара атахъыпI аорганизация Апсны апны коронавирус апшIагылра джьгарта йшалалыз.

Коронавирус згIва тшъауацIнахуаз йгIалцIла Апсны гвжвайыгIва аъаща йантагыл АААК анхара акъраль абзазагIвчва рзгIвадара ахчара йазынанархатI. Ауи лшарахатI Апсны абзазагIвчва коронавирус йачвыхчарала йапшым акъвырльыкъвхартаква алата йгIандыршаз аштаб, «Киараз» гвчIагIв организация, «Адгылара» жвлара хабарргарта квта йгьи Апсны медицина нхагала, хъвшвыла, фачIвыла йгIарцхърагIуз Москва апсуа диаспора рыцынхара абзирала. АААК аъаща баргвы йалашвата фачIвы йазыбжаз арепатриантква ртгIачваква йырцхърагIатI. ЗымгIва шалу ауат 126-гIв йнадзун.

Пандемия ангIаджвыквыл АААК ахабарргарта портал анхаща апсахын Апсны абзазагIвчва коронавирус йачвыхчарала аштаб йгIатыцIуаз ахабарква гIатанацIун.

АААК ЙхIаракIу асовет аунашвачпагIв Эгьзакь Мусса Апсны коронавирус апшIагылра апны йатахъхушыз медицина ъамапсыма, хъахчага гIайщтитI. АААК ахъада Апсны згIвадарахчарала а-Министерства апны йгIандыршаз аштаб йарыхIазырыз ашвъа йаныз амедицина нхагаква зымгIва йхвгIатI.

Трыквшта апны АААК ашта хъвшара карантин агIамта агIан Трыквшта апны йапхьуз апсуа астудентква ахчала йырцхърагIун.

Асквш 2020 агIан АААК агвчIагIв уысква коронавирус апшIагылрагIвацала йгьгIашIамстI. АдкIылара Баслахв кыт апны арыпхьагIв йтгIачва тдзы дыргылырныс йырцхърагIатI. Ауыхвага пкъыгIваква а-Конгресс зцынхауа йгьи йагIвзу ауагIа йырхвгIатI. ЙацхърагIатI АААК Джьырхва кыт апхьарта аспорт пещ арчIаджьрагьи.

Асквш 2020 агIангьи АААК Апсны акытква рпны апхьартаква йрыцIалыз ацIайква апсуа бызшвала атетрадкви амшгIвыракви согIата йырнаттI, дара апхьартаква Трыквшта йаъу, ХIапIатI АхIмад унашва зхъицIауа АААК ашта хъвшара йалакву йырзырхвгIаз футбол, баскетбол, волейбол, гандбол йызласуаш атопква рырттI.

Асквш 2020 агIан АААК «Апсышвала хIчважвитI / Абазала хIчважвитI» видеокурс арыхIазыртI. Ауи апхьарасахIат 300 райхIа гIацIанакIитI, ауат аорганизация асайти асоциал сетква рпны анапакви йыртапI, йапшым акъральква йырту, йапшым абызшваквала йчважвауа апсуа-абаза диаспораква йрыуу дзачIвызлакIгьи йшгIайгвынгIвуаш апшта йыргIапспI. Апроект йгIацIагылтI Москва абызшва апхьарта Capital School Center – ауи апхьарасахIатква йара интернет тыпта йаму зымгIва рпны йгIатанацIатI.

Апсуа бызшвала апхьараква ауи асквш агIан Санкт-Петербург апынгьи йгIахъыртIытI, Москва апны ауи апхъала йапкъьахаз абаза бызшвала апхьараква АААК ацхърагIарала йджвыквырцIахтI.

Апсуа-абаза уагIахъа ргвбайара тынха ауагIа йрылагара апны уыс ду архъйитI АААКи «Алашара» жвлара адкIылари рпроект «Амазара» (апсуа бызшвала – «байарахчарта» – аредакция ррытаразга). Ауи дагIаджвыквцIагIвхатI Эгьзакь Мусса.

УахьчIвала ауи апроект апкъ йтата абаза уагIа ргвбайара тынха йгIаквчважвауа афильмква хъырххьатI, ауат адуней шабгу апны уагIа жванызкьыгIвпхьадзара рпшхьатI. Ауи абаркIыра апны йапхъахауата йхъырхыз апсуа гIахIвыща йазынарху афильм акIвпI, ауи асквш 2020 ацIыхъваква йадынхалуа йалагатI. Йшабгу йгIауахвырквын апроект абаза уагIа йырцIасу акультура апшдзари ацIолари гIанарбара атахъыпI.

Йджьащахъву ачIвыйа? «Амазара» проект абзирала йыдзуаз абаза хIваспа чпаща гIащаквдыргылхтI: афильм адынхалра йгIахъшахъыцIын Къарча-Черкес апны йатахъыз анхагаква рхвгIатI, йазалхта хIваспачпарта гIандыршан ужвы ауаъа йызтахъу ауи азъазара йазырбжьитI.

Июнь агIан, Апсны апны пандемия йгIалцIла йщаквдыргылыз ашIакIраква райхIара аннырхх, Адуней апсуа-абаза конгресс Атара кыт апны Асабиква рхчара адуней мшы йазынархата саби гвыргъьахъв адыргалтI. УацIыхъван абзазагIвчва рахIварала АААК агвыргъьахъвква ПакIващ, РекIа, Баслахв, АкваскIьа, Гвып кытква рпынгьи йакIвнаршатI, ауат цIайта 200-гIв райхIа рылан. Йара ауи апш гвыргъьахъв адыргалтI СогIвым «Акытыжв» апынгьи.

Датшагьи магIны зму проект джьащахъвакI АААК «АМЧ» жвлара адкIылара ацта йацдырхъйатI. «Ашьҭра» (апсуа бызшвала – «ткъвым, гIаншара» – аредакция ррытаразга) зхьырцIаз ауи апроект апкъ йтата акытква рапхьартаква йцауа ацIайква рыхъазла Апсны апны турых зпщылу ашIыпIаква рпны амдараква адыргалитI. МгIва йъадзакву асабиква щымта къуат ацIата кIара ддрыфитI, амдара йаналгара амщтахьгьи апсабара апны йдырчитI. АшIыпIа джьащахъваква дырбара йахъазымкIва ацIайква тшанпсырщауа апсуа хъвмарщаквала йдрыхъвмаритI.

Асквш 2020 агIан апхьагIвчва АнакIапия багъьата йыргарныс рылшатI, ауаса уацIыхъван пандемия атагIацIсхын апроект зныкIдза йашIадрыстI. Ауи асквш 2021 агIан «Аимадара» – хIва (апсуа бызшвала – «абанпараква рабамдара» – аредакция ррытаразга) ахьырцIан йатаджвыквырцIахтI.

Асквш 2020 октябрь агIан АААК архъйагIв секретарь Гьыцба Инари ЙхIаракIу асовет йалу Алшундба Инвери Сирия йцан апсуа-абаза йгьи агвхъауа диаспораква руысхагIвчва йрынйатI. А-Конгресс ащтийыгIвчва ауат АААК амурадкви ахачIвкви йрыхадыргIвазатI, уыста йархъйауа, проектта йыздынхалуа, апхъахьыла йыргвыгъу рархIвтI. Сирия йту хIабашталагIвчва
а-Конгресс анхара рымагIальаматхатI, ацынхара йшазыхIазыругьи рхIватI.

Асквш 2021 ауацIа а-Конгресс агвып аэтнокультура байараква рыбагъьара, агвбайара гIахчара йырзынархаз гIаджвыквцIара щарда дырхъйатI. АААК анхара аэпидемиология аъаща йгIалцIла Апсны апынгьи, адиаспораква ъабзазауа акъральква рпынгьи йщаквгылаз ашIакIраква гIапхьадзахауата йаднагалуан. ЙгьашIамсуазтI ашIыпIа хъвшараква гIахътIрала анхара: асквш 2021 агIан АААК 11 хъвшара шIыцкI гIаннаршатI. ЙакIвшун адкIылара уагIа шIыц гIалажьрала анхарагьи.

Асквш 2021 агIан АААК СогIвым Арайон шIыц апны ауаъа йауата асквшква 1992-1993 рагIан йакIвшаз Апсны ауагIа р-Абашта айсра йаладзыз айсчва йырчвахъабагата цIла 85 ларцIан «Ахъмаштылра аллея» гIандыршатI.

Калдахвара кыт апны ашIыпIа хъвшара агIаджвыквцIарала йгьи ахIаракьатчпагIв Уатырба Денис йцхърагIарала апхьарта-интернат апны йынхауа атлетика хьантала асекция йатахъыз спорт ъамапсымала йадыргалтI. Йара ауи акыт апны АААК йалакву ареспублика мгIва йыквгылу ажвлара транспорт агIашIасырта дрыцкьатI йгьи йгIадыршIыцхтI. Мгвыдзырхва апны АААК айззарта пещ арчIаджьра йацхърагIатI, ЧIлоу апны – абакIра йъазырбжьауа апещ.

Баслахв апхьарта апарк апны а-Конгресси акыт абзазагIвчви апсуа гIвгIвчва рыхьызкви ражвакви зну гъвы 70 дыргылтI. Сентябрь а 1 йадахIвуата Уатхара аквтанай апхьарта апны йъапхьауа акласс дырчIаджьтI, Пицунда апны суратгIврала асекция ахъазла амольбертква рхвгIатI, шахматасрала анкъвакъвра йалаз ацIайквагьи согIа рырттI.

АААК агвып Гагра апсуа апхьарта апхьагIчва гIарцхърагIан апхьарта апшцIа апны цIла ларцIатI, уацIыхъван Colors of nation жвлара адкIылара алата экология нархара зму агIаджвыквцIараква руысла анйара-лекция акIвдыршатI.

АААК акоманда йъадзанхауа ахвысквша руацIа знархараквала йапшымыз – спортызтI, культуразтI, арыпхьаразтI – проект 107 дырхъйатI. Апсны апны ауи анхара йахъпшылитI Жьыба Дмитрий унашва зхъицIауа, Самсониа Херсони Гарзолиа Дамири ъанхауа АшIыпIа хъвшараква рыцынхарала ахъвшара.

ЙшцIасхаз апшта асквш 2021 агIан АААК агвып ахъмаштылра йгьи агвыргъьахъв алалраква джьгарта йрылан. СогIвыми Гвдауыти рпны асаби гвыргъьахъвква акIвшатI, Санкт-Петербург апны АААК, «Охта» чкIвыныргIа рквти дари алата, Апсны ауагIа р-Абашта айсра апны йгIатыргаз АйгIайри Ахъахвитри рымш дыртлапIауата концерт адыргалтI.

Асквш 2021 агIан АААКи «Алашара» адкIылари апсуа-абаза бызшва гIащаквжьрали тшауацIнарыхрали апрограмма шIыцра аларцIан йдрыбагъьатI. Ужвы ауи цхъвыкIта йалапI: арыпхьагIвчва рыхIазырра йгьи рдырраква йрылархIара; анаука йгьи анаука-педагогика нхагIвчва рыхIазырра; апхьагаква лыхра йгьи йгIацIщтра; абаза йгьи апсуа бызшваквала теория магIны зму, анхарагьи йахъвуш архъвыхраква акIвыршара; абаза бызшвали литературали адырраква ауагIа йрылагара. Цри бызшвала арыпхьара онлайн амальла йадыргалуа йалагатI. АААК Айкьангьашырта клуб апроект абзирала абаза бызшвала йапхъахауа бжьыла йану книга гIацIцIтI – ауи ХХ асквшышв ахъаква рагIан Трыквштала йагаз абазаква рыцхIагIата йзынйаз йгIаквчважвауа ТхIайцIыхв Бемырза йроман «Нышв напIыкI» акIвпI.

А-Конгресс ахъазла асквш адахIвра хъадаква йрыуапI хIабашталагIвчва дырра хIаракIы раура ахъазла цхърагIара рзыгIаныршара. АААКи Санкт-Петербург къральыгIва бнатехника университети мачвы зцIарцIаз ангIалра абзирала Апсны йауу 8-гIв абитуриентчва асквш 2021 агIан ауи апхьарта хIаракIы ацбзазартагьи гIарыртуата бюджет ахъвыла йыцIалныс лшара раутI. Асквш 2022 агIан йара ауаса йапхъахауа акурс йыцIалыз рпхьадзара 18 йнадзатI.

АААК ангIалра адначпалтI Петр Ду йыхьыз зхъу антропологии этнографии рмузейгьи (Кунсткамера). Ауи ацынхара амгIва гIахънатIытI: гвыпла монография дрыхIазыритI, Кунсткамера архив йгIалху асуратква ргIарбарта адыргалитI, анаука статйаква ргIвитI, архъвыхраква акIвшитI, апхьахьа шIаква аспирантура йыцIалырныс лшара рауитI.

СогIвым йаъу АААК ауысхарта апны асквш 2021 агIан апсуаква ртурых, ргвбайара, рэтнология йырзынархаз алекцияква акIвшатI. Ауат дгIарыпхьатI АААК ЙхIаракIу асовет йалу, йбергьльу апсуа этнолог Барцыц Марина.

Ауи акIвымкIвагьи Адуней апсуа-абаза конгресс апсуа-абаза уагIахъа ртурых, ргвбайара, рыбызшва шазакIу йгIаквчважвуз алекция Уарча кыт апны йаднагалтI. Ауи дгIапхьатI АААК ЙхIаракIу асовет йалу, Гулиа ДырмытI йыхьыз зхъу Апсны агуманитар рхъвыхраква ринститут адиректор, йбергьльу апсуа апхьахьа Ашуба Арда.

СогIвым апны Ан-абачва рклуб алачIвараква акIвшалун, анйараква адыргалтI Гагра апынгьи.

Йцаз асквшква зымгIва рагIан аспорт проектква рырхъйара а-Конгресс агвып йалкIгIу гватра рзалырхуан. Асквш 2021 гIаншара дута йалтI Россия йауу «Зенит» футбол клуб ахъвшара Апсны апны йгIахътIра. АААК ауи ауыс швабыж йацхърагIатI. «Зенит» ахъвшара анхара Апсны апны футбол атшауацIыхра мчыта йахъвитI, ареспублика апны аспортсменква гIадзныргылра йазынхитI, йагъьу афутболасчва шIаква Россия апынгьи адуней атопасыртаква рпынгьи йхъвмарныс мгIва рнатитI.

Асквш 2021 агIан арыпхьарала апроект «Аимадара» атаджвыквырцIахтI, ауи апкъ йтата ацIайква арыпхьагIвчвагьи ан-абачвагьи рыцта Афон ШIыц ахIатшпы, асльанква рпарк «Прайд» йцатI, «Апсны» этнопарк апны дырра щарда гIазлыркIгIаз алекция йаздзыргIвытI. «Аимадара» проект йапшым акытква рапхьагIвчва 400-гIв райхIа гIаланакIхьатI.

«Амазара» проект апкъ йтата асквш 2021 ауацIа 3 видеороликкI хъырхын ауагIа йддырбатI: ауагIахъа гIахIвыщаква, апсуа уагIа рашва «Нарҭаа рышҭыбжь» (апсуа бызшвала – «НартргIа ргьарпагьаджь» – аредакция ррытаразга) йгьи абаза хIваспа шырчпауа йгIарыквчважвауата.

Асквш 2021 июль агIан АААК абаза уагIа ртурыхи рэтнографии йырзынархата «Иарбан? Иаба? Ианба?» («ЙачIвыйа? ЙабакIву? ЙанбакIву?») акъыльрыпшгIага хъвмарра аднагалын йакIвнаршатI. Ауи Апсны акъральыгIва телерадиуакомпания астудия апны йхъырхтI. АдгалагIвчва шгвыгъауала, ахъвмарра авидеоверсия Апсны апны йахъазымкIва ауи утыцIтагьи щардагIвы запшуаштI.

АААК «ХIара хIацыпI» квта апны йызхьпшквауа ачымазагIвква йазалху аъамапсымаква – йанрыдынхалуа йызквызлауа агвабанква, йымкIахIауата тшыркIныс тшызларбжьауа аплатформаква, айъазагIвчва асабиква йанрыдынхалуа йгIартахъхалауа йазалху ароликква – рзыднаргатI. Аквта апшцIа апны саби хъвмарырта дыргылтI. Ари аквта йалкIгIата йыздынхалуа зызгIвадара йшыртахъу апш йамрыпIатIауквауа ракIвпI, ауаъа йаъу райхIарагIв сабипI.

1992-1993 рагIан Апсны ауагIа р-Абашта айсра анакIвшуз Гагра ангIадырхвитх амш – октябрь а 6 агIан АААК айсра аветеранква, айсра ныкъвадыкъвара гIалызгаз рреспублика адкIылара «Апсны» зхъпшылквауа согIа рызнарыхIазыртI. Ауат ателевизорква, апещрпхагаква, ахъыза пхаква рырттI.

Ареспублика йауата 10 апхьартакI коронавирус азгIва тшанауацIнахуаз агIамта йыртахъдзаз абактерицид рецеркуляторкви агIвычIвгIвыс йыдуымрысылуа атермометркви рырттI.

Асквш ацIыхъва – Асквш шIыц ангIаталуаз АААК Апсны йауу гIари щардагIв зму, баргвыра йалашваз, асоциал къвырльыкъвхарта ахъпшылра йацIу атгIачваква согIата фачIвы, ахъагIараква рзыднаргатI. ЦхърагIара рыквшватI Гагра къали Гагра район йаланакIуа Цандрыпщ, Гьаджьрыпщ, Махадыр, Лапстархта, Алахадзыхь, Бзыпта кыткви рбзазагIвчва.

СогIвым, Адыгьа урам апны АААК Асквш шIыц агвыргъьахъв агIаталымта саби хъвмарырта аргылтI.

ХIызту асквш 2022 февраль агIан йазалху хъвдаквцIара зму Апсны агIвымакъраль уысквала а-Министерства ахIвачIвгIвы Гриттани Вито йгIаджвыквцIарала АААК агвып «АуагIахъаква рхъа дара-дара йагвындыргIвныс рхвитнагIа. Апсни Европа Дуи» ахьызта адепутат Далль-Оссо Маттео йпресс-конференция адыргалтI. Ауи Рим, Италия р-Парламент апны йакIвшатI. Ауи йалан йгьи йгIачважватI Апсны р-Президент Бжаниа Аслан, АААК ЙхIаракIу асовет аунашвачпагIв Эгьзакь Мусса, АААК Аппарат аунашвахъцIагIв Таниа Кан.

Ауи апхъала асквшква йрапшта асквш 2022 агIангьи а-Конгресс хабарргарала анхара гватра ду азалнахуан. ЙгIалкIгIара атахъыпI АААК анхагIвчва дара ркъарула асквш 2021 агIан жвасквша зхъыцIыз хвитта абакIрала аклуб «Абаза» йгIаквчважвауа фильм шхъырхыз.

Афильм АААК ЙхIаракIу асовет аунашвачпагIв, абзихагIв, хвитта абакIрала СССР аспорт амастер Эгьзакь Мусса йгIанйыршаз аклуб атурых гIанахIвитI. Ауи йалашватI Москва, Наро-Фоминск, Санкт-Петербург, СогIвым, Гвдауыта рпны йхъырхыз акадрква.

Ауи акIвымкIвагьи АААК апроект шIыц «АААК алактаква» апкъ йтата а-Конгресс агвып йалакву гIадырчважвауата йырхъырхыз авидеоква гIатарцIауа йалагатI. Апроект гIалазгаз ахабарргарта портал аредактор хъада Лазба Амина лакIвпI. СогIвым апны а-Конгресс ауысхарта анхагIвчва ргIачважвараквакI анырцIахьатI, ужвы Санкт-Петербург йаъу АААК ауысхарта хъада анхагIвчва, АААК ЙхIаракIу асовет йалакву гIадырчважвара ргвыгъапI.

Апсуакви абазакви ргвбайара тынха йазынарху апроект «Амазара» апкъ йтата апсуа ашва йгIаквчважвауа ужвыгьи фильмкI хъырхтI. Ауи асценарий лгIвытI, режиссертагьи дадынхалтI Апсны апны гIатгара зму артистка, Чанба Самсон йыхьыз зхъу Апсуа драмтеатр арежиссер Аргвын Мадина. УахьчIва «Амазара» проект йаланакIуата хроликкI йрыдынхалитI – атацанадылра йапщылу ацIасква, ауагIахъа макъымасгаква йгьи Апсуара ахабзаква йгIарыквчважвауа.

АААК Апсны ауагIа ргIвгIвы Гогуа Алексей йгIахIвахра «Сыс» йгIахъыху, йара ауи апш хьзы зму афильм айшыс Апсны апны йапхъахуз агIарбара аднагалтI. Афильм дарежиссерпI Герасимов С.А. йыхьыз зхъу кинематографияла Россия акъральыгIва институт (ВГИК) йгIалгаз Къварча Амина. А-Конгресс ацхърагIарала апсуа мультфильм «АбраскIьыл йфыруысква» ангьльыз бызшвала йатаркIтI. Ауи алайцIатI йгьи йгIанйыршатI асуратчпагIв, амультипликатор Квициниа Астамур. АтакIра дадынхалтI АААК ахабарргарта портал аредактор хъада Лазба Амина.

Асквш 2022 сентябрь йгIашIарышвта СогIвым йаъу АААК ауысхарта апны арыпхьарала, жвлара джьгаррала йгьи згIвадарахчарала ахъвшара гIандыршатI, ауи даунашвахъцIагIвхатI Хагба Изольда, ъачIвагIагIвта ауаъа дынхитI Хьышба Науыр. Ахъвшара йапхъахауа медицина цхърагIарали ъачIвагIа гIалхрали атшыбжьараква джвыквнацIатI. Гвдауыта йгьи Очамчыра районква йгIарыланакIуа акытква рпны апхьагIвчва швкIыгIвпхьадзара агIвычIвгIвыс тамамта йапхъахауа медицина цхърагIара шйурадзуш рдырхьатI, зуыс йазъазу аъачIвагIагIв йдйырбауамцара ахвыртаква шшIаухIвуш, псып змаухуа ушицхърагIуш тшазырбжьатI. Апроект апкъ йтата ареспублика апхьартипхьадза айъазагIв дъадзагIамис закI зызныйыз уызлайцхърагIуш ахъвшвкви аъамапсымакви зту адестаква рыртуаштI.

СогIвым йаъу АААК ауысхарта апны Зантариа Рустам йхьырпшыру Айкьангьашырта клуб нхауаркIвитI. УахьчIвала ауи нархара хъадата йызланхауа Апсуара акIвпI.

СогIвым йаъу АААК ауысхарта апны алекторийгьи нхитI: атурыхдырыгIв, АААК ЙхIаракIу асовет йалу Инджгиа Джьамбул апсуа уагIахъа ркультури ртурыхи дгIарыквчважвауата хлекциякI акIвйыршахьатI, ауат йызтахъу дзачIвызлакIгьи дрыздзыргIвы йауитI.

Июль агIан Къарча-Черкес Республика апны «Алашара» адкIылари АААКи йадыргаллауа Абаза уагIа VII рхъвмарраква акIвшатI. Ансисквша йакIвшалауа «Абаза» культура-спорт фестиваль йахъвыкIта йалтI Черкесск апны йдыртлапIаз апсуа-абаза уагIахъа ркультура амши Апсны абаракъ амшгьи.

Асквш 2022 сентябрь агIан СогIвым апны апсуа уагIа рхъвмарщаквала «Ахьышьҭра» анкъвакъвра акIвшатI. Ауи йалан Дурыпщ, Джьгьарда, ЧIлоу, СогIвым апхьагIвчва ргвыпква. Анкъвакъвраква йрадгалагIвхатI СогIвым къала аунашвахъцIарти АААКи. Ари анкъвакъврагьи, а-Конгресс ауысхагIвчва Апсны йапшым апхьартаква рпны йадыргалуа ауагIахъа хъвмарщаквала амастер-классквагьи мурадта йрымапI «Аимцакьачара», «Ахылпахас», «Акьыаброу» йрапшу апсуа уагIа рхъвмарщаква гIащаквыргылхра, чкIвыныргIа аспорт йадкIылра, ауагIа апсуаква ргвбайара рыцIа йабгата йрыладырхIвара. Ауи анархарала джьгарта йынхитI Апсны апны АААК ашта уысхарта апны йгIандыршаз чкIвыныргIа ртшауацIыхри физкультури рхъвшара. Ауи унашва ахъицIитI Берзениа Валерий, ъачIвагIагIвта ауи дйыцынхитI Квициниа Эсма.

АААК апхьартаква цхърагIара драдзарала анхарагьи гьашIанамрыстI. Ауи апшта, Лыхны апны АААК ашIыпIа хъвшара ауысхагIвчва ауыжвгIанчIви спорт тшыбжьагаква дыргылтI. Воркаут ахъазла атурникква зымгIва акыт ажьира апны йырчпатI.

Асквш 2022 агIан йапахъахуз агвчIагIв акция АААК гIари зщарду атгIачваква йырзынанархатI. Ауи Асквш шIыц агвыргъьахъв амшква рагIан йакIвшатI.
А-Конгресси «Асабихъа адуней» гвчIагIв фонди «Турист» турист компании йацыта Гагра район йауу атгIачва дуква йрыуу асабиква Апсны акъала хъада йдрайгватI. 36-гIв йнадзуз агвып ран-рабачвагьи рыцта январь а 11 амш шабгаз СогIвым йтаргатI, ауаъа йанцуз «Апсны» этнопарклагьи йыдсылын джьащахъвара щарда рдыртI.

Асквш 2022 агIан АААК ЙхIаракIу асовет йалу, Трыквшта апны ашта хъвшара унашва ахъызцIауа ХIапIатI АхIмад йгIаджвыквцIарала Трыквшта апны АААК ашIыпIа хъвшараквагьи алата йцIасхаз «Агвы апхара» гвчIагIв акция атакIвшахтI, ауи апкъ йтата Апсны апны къвльейсызта йбзазауа ауагIа чгIвычи щапIхъацIи рзыршатI. ХIабашталагIвчва рсогIаква рзыргатI Гвдауыта аковид чмазагIвтарагьи, СогIвым апны ашIашIкIгIара згIваква йъарайъазауа ачымазагIвтарагьи, СогIвыми Гвыльрыпщи рпны 13 сабигIзартакI, СогIвым, Калдахвара, Очамчыра ртдзы-интернатква, СогIвым ацхърагIага апхьарта рпны зынхаша дууым анхагIвчвагьи.

Июнь агIан Асабиква рхчара амш йадахIвуата АААК Апсны акъала хъада апны ацIайква йыргIвыз асуратква ргIарбарта аднагалтI, ауи апхъала Гвдауыта район йаланакIуа Уатхара кыт апны ахвыцква ауагIахъа хъвмарщаква ддырбауата, уыпкъ райшата йшукIуаш йазырбжьауата йрыдынхалтI.

АААКи «Алашара» адкIылари рхъпшылра йацIата Черкесск апны йшцIасхаз апшта Абаза уагIа ркультура амши Апсны акъральыгIва баракъ амши дыртлапIатI.

КIьыдата уаквчважвушта йаъапI Апсны апхIвысква р-Координация совет сынчIва сентябрь агIан йджвыквырцIаз апроект шIыц «АнгIалра уаззырцауа амгIва». Апроект апхIвысква йырзынарху анхарала стратегия лыхра йазынархапI. Апроект апкъ йтата ажвлара рпны атгIачва ахв щтIыхрала, абзазаща агъьчIврала апрограммаква лырхтI. Асовет даунашвачпагIвхатI Апсны апынгьи ауи утыцIтагьи бзита йырдыруа ажурналист Бебиа Екатерина.

Асквшква 1992-1993 рагIан йакIвшаз Апсны ауагIа р-Абашта айсра апны йгIатыргаз АйгIайра асквш 29 андыртлапIушыз апхъала Бебиа Екатерина «Апсны анчваква амамыри асоциал захвари йрызгылапI» жвлара мгIвайсра ауысхагIвчва дрынйатI. Анйара пхата йакIвшатI, ауаъа ареспублика апны йбергьльу апхIвысква ргIагвалашвахраква чкIвыныргIа йрархIвуан, ауат йрылабжьун.

Асквш 2022 октябрь агIан АААК йаланакIуа Апсны апхIвысква р-Координация совет ащтийыгIвчва Лагъь КIавкIаз акъалаква Ставрополь, Черкесск, Нарцана йгьи Гвым кыт рпны йакIвшаз Апсуа-абаза форум йалан. Анйараква злалгаз гIаншара хъадата йалтI а-Конгресс йаланакIуа адкIылари Ставрополь шта абазаква рыжвлара адкIылара «Абази» йацыта аршIыйара проектква рхъйара ауысла йадырчпалыз АнгIалра. Ауи ауат йапшым ауысква радгалра апны ацацхърагIара шрызбжьазлуш, ахIбачви йгIадзынгылуа абанпари ращтаныкъвара рыбагъьара йшазынхуш гIанахIвитI.

УахьчIва Адуней апсуа-абаза конгресс, ахърыкъьаракIгьи аламкIва, зкъаруквагьи зпсгьи зымгIва йхIзацалу ауыс йазынзырхауа акъыльагIвчвала йалу гвыппI. ЙхIмураду ари акIвпI: хIчIвырхъаква атыхIп-атыхIпуамцара йазакIу абаза уагIа зкъазща зму уагIахъата йгIащаквыжьра йахъазымкIва рызхIара, ртшауацIыхра, ркъагIара хIацхърагIарныс. Ауи акIвызтIхIва, араъа йгIахIырбазгьи йгIаунахIвитI тахъырагIвацала ахачIвкви апроекткви шузымырхъйуш – рыцIа магIны зму ахъвыцракви асоциал гIаджвыквцIаракви рахIа гIаумахвыргьи, ауи анхара ймачIымкIва ахча атахъхуштI.

УахьчIвала а-Конгресс абзазага щатагьи анхарагьи йыргIалцIыртата йаъу АААК ужвы йахъаду йхъатачIв ахчагIвацаква ракIвпI – ухIва ауаштI. Заджв йыхъазла ауи зджьара йгIанымхауата йхIатлапI, йаргьи ужвы ахча гIалцIырта шIыцква гIаурала ахачIвы мчыта йгIагылитI. А-Конгресс ауи ауысла хъвыцра-пшыщата йаъу зымгIва йрыздзыргIвныс йхIазырпI. СогIвым апны а-Конгресс счет амапI, ауи нхитI, дзачIвызлакIгьи ауаъа кIара йзалацIуштI. АААК алазара ахъазла ашвачIвкви апроектква рырхъйара ахъазла ацхърагIаракви а-Конгресс асайтлагьи йалауцIа йауитI.