Россия алагъь къала хъада апны араъа йбзазауа апсыуакви абазакви рыхъазла Асквш ШIыц йадахIвуа агвыргъьахъв хъвлапны адыргалтI.
Барганджиа Саид
Санкт-Петербург апны абаза уагIа рыхъазла Асквш ШIыц йадахIвуа агвыргъьахъв хъвлапны акIвшатI. Ауи адыргалтI Санкт-Петербург апны йаныргIалу Адуней апсуа-абаза конгресс ашIыпIа хъвшара.
Ари агIаншара асуратлента апшра >>
АшIыпIа хъвшара аунашвачпагIв Реквава Темур йшгIаликIгIазла, Асквш ШIыц агвыргъьахъв зымгIва йрапхъата йыззынархаз асабиква ракIвын: ауат 50-гIв райхIа надзун. АдгалагIвчва мурад хъадата йрыман Санкт-Петербург йтабзазауа апсыуакви абазакви абазырбуш, йабазырдыуаш анйарта шIыцкI атагIандыршахырныс.
«Агвыргъьахъв апрограмма швабыж йджьащахъван, ауи ауысла чкIвынргIа джьгарта адгалра уыс ду дырхъйатI. Араъа йсасуан Ахьтададагьи АсхьырчIвачIвагьи. АгIахъвмарраква рщарда уагIахъа нархара рыман. ХIара абаза ашвакви апсыуа ашвакви хIхIвун, агIахIвраквагьи хIуагIа рчIвква ракIвын. ЗымгIва бзидздзата йакIвшатI», – йхIватI Темур.
Аконцерт йалакваз рыуазаджв Шакая Марикагьи йгIалылкIгIатI «агвыргъьахъв шбзихаз», асасчвагьи адгалагIвчвагьи «Асквш ШIыц агвщтIыхра лашарала йшырчвыз».
Санкт-Петербург ашIыпIа хъвшара апхъагылагIвчва йрыуу Шашура Диана АААК ахабарргарта портал драчважвауата йшылхIвазла, йара аконцерт анадыргалуазгьи агвып йацацхърагIауа, йацIагылуа йынхун.
«Сара магIны ду азызбитI хIъащтаныкъвауа, хIъацацхърагIауа, азаджв азаджв хIъайшIацIгIауа, араса акIвзапI зынгьи йшIымчIвуш, уызквгвыгъа йауаш азазаъащаква шщаквгылуа. Ари йапшу анйараква рпны сара схъатала сызщту закIыпI: араъа йгIайуа дзачIвызлакIгьи хIцри бызшви хIцри макъымкви анигIара хIцришта даъазшва йылайхIварныс. Сшгвыгъауала, абари ахачIвы хIзырхъйатI, йхIзынардзатI», – лхIватI Диана.
Асквш ШIыц йадахIвуата Санкт-Петербург апны Адуней апсуа-абаза конгресс ашIыпIа хъвшара йадыргалыз аконцерт апшыгIвчва зымгIвагьи швабыж йыргвапхатI, ауи араъа йаднакIылтI уагIа 100-гIв райхIа.
швталра йа тшаншвцIара атахъыпI.