АшIыцраква
Ачвахъабага син хIврапшдза азыщтIарцIатI, Ащамакъа чвамза адыркIытI, НартыргIа рмгъымцагьи цIырхъыйтI – абараса йнардастI Апсны апны КIавкIаз айсра йаладзыз рджьабара мшы.
АкIавкIаздырыгIв бергьльы Генко Анатолий йзынархаз хъмаштылра айззара акIвшатI Санкт-Петербург йтагылу Кунсткамера музей апны.
Апсуа-абаза уагIахъа ргвбайара ахчара йазынарху АААК апроект апкъ йтата йхъырхыз, апсуа ашва йгIаквчважвауа абзазара йгIахъыху афильм шIыц СогIвым апны ажвлара хабарргагаква рыхъаз йгIадырбатI.
АААК акъыль зрыпшгIауа апроект «Иарбан? Иаба? Ианба?» апкъ йтата йгIвбахауа ахъвмарра аднагалитI. Апсны, КъЧР рхъвмарыгIвчва гвыпкви апроект адгалагIвчви скайпла йабабан йабадыртI, йырпыру ахъвмаррагьи йалачважватI.
СогIвым йаъу АААК ауысхарта апны «Апсуа бызшва ауагIахъа ртурых узырдыруа йпасарайу гIалцIыртапI» ахьызта йхътIыз лекция акIвшатI, ауи дгIапхьатI атурыхдырыгIв Инджгиа Джамбул.
Апсуа ашва йгIаквчважвауа абзазара йгIахъыху афильм шIыц апсуа-абаза уагIахъа ргвбайара тынха йазынарху АААКи «Алашара» жвлара адкIылари рпроект «Амазара» йащтагIайуа йахъвыта йалитI. Афильм гIанзыршаз аъачIвагIагIвчва ауи шхъырхуази йшадынхалуази АААК ахабарргарта портал агвып йгIарархIвтI.
Гвдауыта район йаланакIуа Лыхны кыт апны АААК ашIыпIа хъвшара агIаджвыквцIарала йхътIу спорт тшыбжьарта – воркаут – дыргылтI.
«Агвы апхара» зхьзу ужвыгьи акциякI – къвльейсызта йбзазауа ауагIа гвчIагIв цхърагIарата чгIвычи щапIхъацIи рзышара – акIвшатI Апсны апны.
А-Конгресс анхагIвчва Facebook социал сетьла райшата йакIвшуз аэфир апны Апсны а-Парламент апны алхраква шакIвшази а-Конгресс агвып рмурадкви руысла апшыгIвчва разцIгIараква джьауап рырттI.
Апсны р-Президент Бжаниа Аслани АААК ЙхIаракIу асовет аунашвачпагIв Эгьзакь Мусси СогIвым апны йанйатI. Эгьзакь Мусса ауаъа нхара уысла дцатI.